ޝަރީއަތް ނިމެންދެން އަދީބު ބަންދުގައި ބެހެއްޓުމުގެ އަމުރަކަށް އެދެފި
އެމްއެމްޕީއާރްސީގެ ޚިޔާނުގެ މުގުލުގައި ހުރި ކަމަށް ދައުލަތުން ތުހުމަތުކޮށް ކުރީގެ ނައިބު ރައީސް އަހްމަދު އަދީބުގެ މައްޗަށް އުފުލާފައިވާ ދައުވާތައް ކްރިމިނަލް ކޯޓުން ބޭރުކޮށްލި މައްސަލައިގެ އިސްތިއުނާފު ނިމެންދެން އަދީބު ބަންދުގައި ބެހެއްޓުމުގެ އަމުރަކަށް ދައުލަތުން ހައިކޯޓްގައި މިއަދު އެދިއްޖެ އެވެ.
ދައުލަތުން ހައިކޯޓުގައި އެގޮތަށް އެދުނީ އަދީބުގެ މައްޗަށް އުފުލި ހަތް ދައުވާ ކުރިމިނަލް ކޯޓުން ބާތިލް ކުރި މައްސަލައިގައި ހައިކޯޓްގައި މިއަދު އޮތް އިސްތިއުނާފު ޝަރީއަތުގެ ފުރަތަމަ އަޑުއެހުމުގަ އެވެ.
އެގޮތުން މި އަމުރާ މެދު ގޮތެއް ނިންމަން މެންދުރު ފަހު 3:00 ގައި ހައި ކޯޓުގައި އަޑުއެހުމެއް ބާއްވަން ވަނީ ނިންމައިފަ އެވެ.
އަދީބުގެ މައްޗަށް ދައުލަތުން އުފުލި ހަތް ދައުވާ ވެސް ކްރިމިނަލް ކޯޓުން ބޭރުކޮށްލުމުން އޭނާ މިހާރު ވަނީ މިނިވަން ވެފައެވެ. ދައުވާތައް ބާތިލް ކުރުމުގައި ބޮޑަށް ބިނާކޮށްފައި އޮތީ އަދީބު އާއިއެކު ތަހުޤީގު މަރުހަލާގައި ޕްރޮސެކިއުޓަރ ޖެނަރަލް އާއި އަދީބުއާއެކު ވެފައިވާ އެއްބަސްވުންތަކުގެ މައްޗަށެވެ.
މި ދައުވާތައް ކޯޓުން ބޭރުކޮށްލުމުން ޕްރޮސެކިއުޓަރ ޖެނެރަލް ވަނީ މައްސަލަ ބެއްލެވި ގާޒީ އިސްމާއިލް ރަޝީދަށް ފާޑު ވިދާޅުވެ އޭނާގެ މައްސަލަ ޖޭއެސްސީ އަށް ހުށަހަޅާފައެވެ. އަދި ޖޭއެސްސީން މިހާރު ވަނީ ގާޒީ އިސްމާއިލް ސަސްޕެންޑު ކުރުމަށް ވަނީ ނިންމާފައެވެ.
އެމްއެމްޕީއާރްސީގެ ހިޔާނާތާ ގުޅިގެން، އަދީބުގެ މައްޗަށް އުފުލާފައި ވަނީ، ހިޔާނާތްތެރިވުމުގައި ބައިވެރިވުމުގެ ދެ ދައުވާއަކާއި، މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާއެއް ހޯދައިދިނުމުގެ ދެ ދައުވާއަކާއި، މަނީ ލޯންޑަރިންގެ ދެ ދައުވާއަކާއި ރަސްމީ ހައިސިއްޔަތު ނަހަމަގޮތުގައި ބޭނުންކުރުމުގެ ދައުވާއެކެވެ.
