މުސްކުޅިވީ ދުވަހު އެޅުނީ ޖިންސީ ފުރައްސާރައިގެ ތުހުމަތު، އެވެސް ކާފަ ދަރިއެއްގެ ފަރާތުން!
މިދުވަސްކޮޅަކީ "ރޭޕް" ނުވަތަ "ޖިންސީ ފުރައްސާރައިގެ" ވާހަކަތަށް އެންމެ ގިނައިން މީސްމީޑިއާގައި ފެތުރެމުން އަންނަ ދުވަސްކޮޅެވެ.
ވަރަށް ގިނަ ކުދިން އެމީހުންނަށް ދިމާވެފައިވާ އެފަދަ މައްސަލަތަކުގެ ވާހަކަތަށް ހިއްސާ ކޮށްފައި ހުރެއެވެ. އަދި އެވާހަކަތަކަށް ގިނަ ބައެއްގެ ސަމާލުކަމާއި ހަމްދަރުދީގެ ބަސްތައް ވެސް ލިބިފައިވެއެވެ. އިންސާފު ލިބުމަށް ވެސް އެމީހުން އެދެއެވެ.
ނަމަވެސް ސުވާލަކީ، މިފަދައިން ހިއްސާ ކުރާ ހުރިހާ ވާހަކައަކީ ހަމަ ތެދެއް ބާއެވެ؟ ބައެއް ޒުވާނުންނަކީ ވެސް އެހެން ކަހަލަ ޖޯޝަކާއި ފޯރިއެއް ހުންނަ ބައެެކެވެ.
މިއީ ވެސް އެފަދަ ވާހަކައެއްގެ ސަބަބުން ދިމާވެފައިވާ ކަމެކެވެ. ނަމާއި އަމިއްލަ މައުލޫމާތު ސިއްރު ކޮށްދިނުމަށް އެދި އުމުރުން 70 އަހަރުން މަތީގެ އެމީހާއަށް ދިމާވި ކަންތަށް ހިއްސާ ކޮށްދިނުމަށް "ދެން" ގައި އެދިފައިވަނީ އޭނާގެ ދެވަނަ ދަރިފުޅެވެ.
"ބައްޕައަކީ ގަވާއިދުން ނަމާދު ކުރާ މީހެއް. ކޮވިޑްގެ ކަންތަކުގެ ސަބަބުން ގޭގައި ނަމާދު ކޮށްފަ، މިސްކިތްތައް ހުޅުވި ނަމަވެސް ވަރަށް ފަހުން މިސްކިތައް އަނެއްކާވެސް ދާން ފެށި. އެެއީ ބައްޕަ އަމިއްލަ ރައްކާތެރިކަމަށްޓަކައި.
ބައްޕަ ވާހަކަ ދައްކާނެ އެންމެންނާވެސް. ވަކި އުމުރަކަށް ނުބަލާނެ. ޚާއްސަކޮށް މިސްކިތުން ކުޑަ ކުދިންނާއި ޒުވާން އުމުރުގެ މީހުން ފެނުމަކީ ބައްޕަ ވަރަށް އުފާވާ ކަމެއް. އަބަދުވެސް ހުންނާނީ ހިނިތުންވެފަ.
އެކަމަކު ކުރީ ދުވަހު ގެއަށް އައި އިރު ހުރީ ވަރަށް ބޮޑަށް ދެރަވެ ފެންކަޅިވެފަ. ކިހިނެއްވީތޯ މަންމަ އެހުމުން ރޯންވެސް ފެށި. އަހަރެންގެ އުމުރުން ވެސް މިހާރު މިވީ 40 އަަހަރު. ބައްޕަ އެގޮތަށް ރުއިތަނެއް ދުވަހަކުވެސް ނުދެކެން. އެހެންވެ އެންމެން ވެސް ވަރަށް ހާސްވެ ދެރަވި. އެދުވަހު ބައްޕަ ނުވެސް ކައި. ވެގެން އުޅޭ ގޮތެއް ބައްޕަ އެރޭ މަންމަ އަށް ކިޔައިދިން.
ބުނީ ތިމަންނަ ނަމާދުކޮށް ނިމިގެން މިސްކިތުގައި ތިބި ޒުވާނުންތަކަކަށް ހީލީމޭ، އެކަމަކު އެމީހުން ވަރަށް ރުޅި މޫނެކޭ ދެއްކީ. އެކަކު ބުނި އަޑު އިވުނޭ މާމާތް މީހަކަށް ވާންވެގެން އަދި މިސްކިތަށް އެބަ އަރައެއް ނޫންހޭ. އެމީހުން މިސްކިތުން ނިކުންނަންދެން ތިމަންނަ ބޭރުގައި މަޑުކުރި ކަމަށާއި މިސްކިތުން ނިކުތުމުން، އެހެން ބުނީ ކީއްވެތޯ ރީތިކޮށް އެހީމަ އަނެއްކާވެސް ރުޅިއައިސްގެން އޭގެން އެކަކު އަހަރެންގެ ބޭބެގެ ދަރިފުޅުގެ ނަން ކިޔާފަ ބައްޕަ އާއި ދިމާލަށް ބުނީ ތިއީ އަމިއްލަ ކާފަ ދަރި އާއި ބެހިފަ ހުރި މީހެކޭ ފޭސްބުކްގައި އެހުރިހާ ވާހަކައެއް އެބައޮތޭ މިހެން ކަމަށް ބައްޕަ ބުނި.
އެހެން ބުނީމަ އަހަރެން ހަނދާންވި އެކަހަލަ ގްރޫޕްތަކެއް އެބަ އުޅޭކަން ހަދައިގެން ފޭސްބުކްގައި. އެހެންވެ އެކި މީހުން ކައިރީގައި އަހައިގެން އޭގެން ދެތިން ގްރޫޕަށް ވަދެގެން ވަރަށް ހާވައިގެން ފެނުނީ އެވާހަކަ. އަހަންނަށް ވެސް ލިބުނީ ޝޮކެއް.
އޭގައި އަަހަރެންގެ ބޭބެގެ ދަރިފުޅު ލިޔެފަ އޮތީ އޭނަ ކުޑައިރު މިގޭގައި އުޅުނުއިރު އަހަރުމެންގެ ބައްޕަ އޭނަ ގައިގަ އަތްލަން ނުވާ ގޮތަށް އަތްލި ކަމަށާއި އޭނަ ލައްވާ ބައްޕަގެ ލަދުވެތި ގުނަވަނުގައި ވެސް އަތްލުވި ކަމަށް. އަދި އެވާހަކަތަށް ވަރަށް ހިތްވަރު ކޮށްފަ އަހަރެންގެ މަންމަ އަށް ކިޔައިދިން ކަމަށާއި މަންމަ އެކަމާއި އަޅާނުލުމަށާއި އެއްވެސް މީހެއް ގާތު ނުބުނަން ބުނިކަމަށް. އޭނަގެ ބައްޕަ (އަހަރެންގެ ބޭބެ) ވެސް ފަހުން އޭނަ ގައިގަ އެގޮތްގޮތަށް އަތްލި ކަމަށް އޭނަ ލިޔެފަ އޮތް. އަދި އެހުރިހާ ކަމަކުން ސަލާމަތްވެވުނީ މިގެއިން އޭނަގެ މަންމަ އޭނަ ގެންދިޔައިމަ ކަމަށް ވެސް ލިޔެފަ އޮތް. އެއަންހެން ކުއްޖާގެ މަންމަ އާއި ބޭބެ ތިބެނީ ވަރިވެފަ.
އެބުނާ ދުވަސްތަކެއްގައި އޭނަ މިގޭގައި އުޅުނު. އެކަމަކު އަހަރުމެން އޭނަ ގެންގުޅެ ބަލާ ބޮޑުކުރީ ވަރަށް ލޯބިން. އޭނަގެ އުމުރުން 9 އަހަރުގައި ބޭބެއާއި އޭނަގެ މަންމަ ވަރިވީ. އޭނަގެ މަންމަ އެހެން މީހަކާއި އިންނަން ބޭނުން ވެގެން. އޭނަގެ މަންމަ އަމިއްލައަށް އޭނަ ނުގެންދިޔައީވެސް. ދެން އެކުއްޖާގެ އުމުރުން 15 އަހަރު ވަންދެން އަހަރުމެން އޭނަ ބެލިން. އޭނަ ނިދީ އަހަންނާއެކީ އަހަރެންގެ ކޮޓަރީގަ. އަހަންނަކީ އަންހެނެއް.
ބައްޕައަކީ ހުރިހާ ދަރިން ދެކެވެސް ވަރަށް ލޯބިވާ މީހެއް. އެކަމަކު އެއްވެސް ކުއްޖަކާއި އެކީ އެކަނި ކޮޓަރިއެއް ތެރޭގައި ނުހުންނާނެ. އެބުނި ދުވަސްތަކުގައި ބައްޕައަކީ ގިނަ ވަގުތު ގޭގައިވެސް އުޅުނު މީހެއް ނޫން. އެއިރު ބައްޕަ ވަޒީފާ އަދާކުރޭ. ތަނެއްގެ ވޮޗަރަކަށް އުޅުނީ. އެހެންވެ ޝިފްޓް ޑިއުޓީއަށް ދަނީ. ހެނދުނު ދިޔައިއްޔާ އެދުވަހު އައިސްފައި ކައިގެން ނަމާދުކޮށްގެން ބައްޕަ ނިދާނީ. ދެން އެރޭ ދާނީ ރަށްޓެހިންނާއެކީ ރާޒުވާ ކުޅެން. ދެން ކޮން އިރަކުބާ މިކަމެއް ކުރަނީ؟ އަހަރެން އެކުއްޖާ ގޮވައިގެން އުޅެނީ އޭނައަށް ކިޔަވާދީ ފިލާވަޅުތަށް ވެސް ހަދުވަން. އަހަރެން ބަލަނީ މިއީ އަހަރެންގެ މޫނުމަތީގައި ވެސް ކޮޅުފައިން ޖެހުން ކަމަށް" އުމުރުން ދުވަސްވީ ފިރިހެންމީހާގެ އަންހެން ދަރިފުޅު ކިޔައިދިނެވެ.
މިދުވަސްކޮޅަކީ "ރޭޕް" ނުވަތަ "ޖިންސީ ފުރައްސާރަ" އޭ ބުނެ، މީހަކު ވާހަކައެއް ކިޔައިދީފިއްޔާ އޭގެ ދެކޮޅު ބެލުމެއް ނެތި މީހުން އެވާހަކަތަށް ދެލޯމަރައިގެން ޤަބޫލު ކުރާ ދުވަސްކޮޅެކެވެ. މިއީ ހަގީގަތުގައި ވަރަށް ހިތާމަހުރި ކަމެކެވެ. މިފަދައިން ކަންތައް ކުރުމުން އެތައް ބަޔަކަށް ދެރަދެވި، އެތައް ބައެއްގެ ދިރިއުޅުން ކުޑަ ހިނދުކޮޅެއްގެ ތެރޭގައި ބަދަލުވެ ލަދުވެތި ކަމެއްގެ ތެރެއަށް ވެއްޓެއެވެ. މިފަދަ ކަންތަށް ނުކުރަމާތޯއެވެ؟ ވާހަކައެއް ހިއްސާ ކުރަންނާވެސް ތެދު މައުލޫމާތު އެކަނި ހިއްސާ ކުރާށެވެ. އަދި މިވާހަކަތަށް މީސްމީޑިއާގައި ޝާއިއު ކުރާ މީހުންވެސް އޭގެ ތެދު ހަގީގަތް ހޯދުމަށް ޒިންމާދާރު ވާށެވެ. ނޫހެއްގައި ވަނަވަރު ހާމަ ނުކޮށްވެސް ލިޔެވިދާނެއެވެ. ނަމަވެސް މީސްމީޑިއާގައި އެހުންނަނީ ކާކުގެ އައިޑިއެއް ކަމާއި ކާކުކަން އެނގޭށެވެ. އެކެއްގެ ތުންތުންމަތިން އަނެކެއްގެ ތުންތުންމަތިން މިފަދަ ވާހަކަތަށް ފެތުރޭނެއެވެ.
Ads by STO
