މުޢިއްޒުގެ އިލްތިމާސް، ވަކި ޕާޓީއަކަށް ނުބަލާ، ވޯޓް ދޭންވާނީ ނަތީޖާ ނެރެވޭ އިޚްލާސްތެރި ކެނޑިޑޭޓަކަށް
ލޯކަލް ކައުންސިލް އިންތިޚާބަށް ވަގުތު ކުޑަތަން ވެއްޖެ ކަމަށާއި ރައްޔިތުން ގޮތް ނިންމާއިރު، ވަކި ޕާޓީއެއްގެ މީހަކަށް ވޯޓް ދިނުމުގެ ބަދަލުގައި، ރައްޔިތުންނާއެކު މަސައްކަތް ކުރާނެ އިޚްލާސްތެރި ކެނޑިޑޭޓަކަށް ވޯޓް ދެއްވުމަށް މާލޭ ސިޓީ މޭޔަރުގެ ގޮނޑިއަށް އިދިކޮޅުން ވާދަ ކުރައްވާ ކެނޑިޑޭޓް، ޑރ.މުޙައްމަދު މުޢިއްޒު ވިދާޅުވެއްޖެއެވެ.
މުޢިއްޒުގެ މީސްމީޑިއާ މަންސަތައް ރަސްމީކޮށް ލޯންޗް ކުރުމަށް ފަހު ވާހަކަފުޅު ދައްކަވަމުން މުޢިއްޒު ވިދާޅުވީ، ކައުންސިލް އިންތިޚާބުގައި އެންމެ ރަނގަޅު ނަތީޖާ ނެރެދެވޭ ކެނޑިޑޭޓަކު އިޚްތިޔާރު ކުރަން ޖެހޭ ކަމަށާއި ރައްޔިތުން އިޚްތިޔާރު ކުރާ ކެނޑިޑޭޓަކީ އެންމެ ފަހު ސިކުންތާ ޖެހެންދެން ރައްޔިތުންގެ ފަޅީގައި ހުރި ކެނޑިޑޭޓެއްތޯ ޔަޤީންކުރަން ޖެހޭ ކަމަށެވެ.
"ތިމާ ހުރި ޕާޓީގެ ކެނޑިޑޭޓް ތޯ ޚިޔާރު ކުރާނީ ނޫންތޯއެއް ނޫން. އެންމެ ރަނގަޅަށް ނަތީޖާ ނެރެދެވޭނީ، ކޮންމެ ބަޔަކަށް. އެންމެ އިޚްލާސްތެރިކަމާއެކު ރައްޔިތުން އިޚްތިޔާރު ކުރާނީ ކޮން ކެނޑިޑޭޓެއްތޯ. ރައްޔިތުންގެ ފަޅީގައި އެންމެ ފަހުގެ ސިކުންތާ ޖެހެންދެން ތިބޭނީ ކޮން ބައެއްތޯ" މުޢިއްޒު ވިދާޅުވިއެވެ.
މިރޭގެ ރަސްމިއްޔާތުގައި މުޢިއްޒު ޓީވީއާއި، މުޢިއްޒު ރޭޑިއޯ އަދި މުޢިއްޒުގެ ރަސްމީ ކެންޕެއިން ލަވަވެސްވަނީ އިފްތިތާޙް ކޮށްފައި
މިރޭގެ ޖަލްސާގައި މުޢިއްޒު ވަނީ މޭޔަރު ކަމަށް ހޮވިވަޑައިގެންފި ނަމަ ،ރައްޔިތުންގެ ވިންދާ އެއްގޮތަށް ގުޅިފަޅަކީ ގެދޮރުވެރި ކަމަށް ޚާއްސަ ކުރާނެ ބިމެއް ހެދުމަށް މަސައްކަތް ކުރާނެ ކަމަށް ވިދާޅުވާ ވާހަކަ ތަކުރާރު ކުރައްވާފައެވެ. އެ މަނިކުފާނު ވިދާޅުވީ، ރައްޔިތުންގެ ވިންދާ އެއްގޮތަށް ސަރުކާރުން ކަންތައް ކުރާނަމަ އެކަމަށް ފުރިހަމައަށް އާނ ބަސް ވިދާޅުވާނެ ކަމަށާއި ނަމަވެސް ގުޅިފަޅު ފަދަ މައްސަލަތަކަކީ ސީދާ ރައްޔިތުންގެ ވިންދާ ޚިލާފަށް ސަރުކާރުން ގެންގުޅޭ ސިޔާސަތެއް ކަމަށެވެ.
"ރައްޔިތުންނަށް ފައިދާ ހުރި، ރައްޔިތުންގެ ވިންދާ ގުޅޭ ކޮންމެ ކަމެއްގައި ސަރުކާރާ އެކީގައި އެންމެ އިސްވެ، އަޅުގަނޑު މަސައްކަތް ކުރާނަން." މުޢިއްޒު ވިދާޅުވިއެވެ.
މާލޭގެ އެކި ދާއިރާތަކަށް ވާދަ ކުރައްވާ ޕީޕީއެމްގެ ކެނޑިޑޭޓުން ވެސް ބައިވެރިވެ ވަޑައިގަތް މިޖަލްސާގައި މުޢިއްޒު އިތުރަށް ވިިދާޅުވީ، އަބަދުވެސް މަސައްކަތް ކުރާނީ ޓީމެެއްގެ ގޮތުގައި ކަމަށާއި އެކުގައި މަސައްކަތް ކުރާއިރު، އެއީ ކޮން ފިކުރެއްގެ މީހެއްތޯ ނުބައްލަވާނެ ކަމަށެވެ.
"އަޅުގަނޑު ދޭ ޔަޤީންކަމަކީ އަޅުގަނޑު މަސައްކަތް ކުރާއިރު އެއްވެސް ވަރަކަށް ބަލާ ކަމެއް ނޫނޭ، އަޅުގަނޑާ އެކީގައި މަސައްކަތް ކުރާ މީހުންނަކީ ކޮން ފިކުރެއްގެ ބައެއްތޯ. އަޅުގަނޑު އިސްކަން ދޭނަމޭ ޓީމެއް ގޮތުގައި މަަސައްކަތް ކުރަން" މުޢިއްޒު ވިދާޅުވިއެވެ.
ލޯކަލް ކައުންސިލް އިންތިޚާބު އޭޕްރީލް 10 ވަނަ ދުވަހު ބޭއްވުމަށް ހަމަޖެހިފައިވާއިރު، މުޢިއްޒުގެ ކެންޕެއިން ގިނަ ހަރާކާތްތަކެއް ކުރިޔަށް ގެންދާކަން ފާހަގަކޮށްލެވެއެވެ.
Ads by STO
