އެމްޑީޕީ ޕީޖީގެ މީޑިއާ ކޯޑިނޭޓަރަކަށް އިންތި
އެމްޑީޕީ ޕާލަމެންޓްރީ ގްރޫޕްގެ މީޑިއާ ކޯޑިނޭޓަރަކަށް މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ (އިންތި) ހަމަޖައްސައިފިއެވެ.
އެމްޑީޕީގެ ޕާލިމެންޓަރީ ގުރޫޕްގެ ލީޑަރު އަދި މެދު ހެންވޭރު ދާއިރާގެ މެންބަރު އަލީ އާޒިމް ވިދާޅުވީ އެޕާޓީގެ ޕީޖީ ގުރޫޕްގެ މީޑިއާ ކޯޑިނޭޓަރަކަށް އިމްތިޔާޒު ހަމަޖައްސަވާފައިވަނީ މިއަދު ކަމަށެވެ. އަދި އިންތި އެ މަގާމަށް ހަމަޖެއްސެވީ ޕީޖީ ގަވާއިދުގެ 46 ވަނަ މާއްދާގެ ދަށުން ކަމަށެވެ.
އެމްޑީޕީގެ ޕީޖީ ލީޑަރަކީ އާޒިމް ކަމަށްވާއިރު، ނައިބް ލީޑަރުންނަކީ ހުޅުދޫ ދާއިރާގެ މެމްބަރު އިލްޔާސް ލަބީބާއި، ހެންވޭރު ދެކުނު ދާއިރާގެ ހުސައިން ޝަހީމް އެވެ. ޕީޖީ ގްރޫޕްގެ އަމީންއާންމުގެ މަގާމުގައި ހުންނަވަނީ އަލިފުށި ދާއިރާގެ މެމްބަރު މުހައްމަދު ރަޝީދު ހުސެއިން (ބިގޭ) އެވެ.
އަދި އަމީންއާންމުގެ ނައިބުގެ މަގާމުގައި ފުވައްމުލަކު މެދު ދާއިރާގެ މެންބަރު ހުސައިން މުހައްމަދު ދީދީ ހުންނަވާއިރު، ޗީފް ވިޕްއަކީ އައްޑޫ މީދޫ ދާއިރާގެ މެންބަރު ރޮޒައިނާ އާދަމް އެވެ.
