މާގިނަ ވާހަކަ ދެއްކުމުން ސުޝާންތުގެ ކޭސްގައި ސުވާލު ކުރުމަށް ކަންގްނާ ވެސް ފުލުހަށް ހާޒިރު ކުރަނީ!
ބޮލީވުޑްގެ އެކްޓަރ ސުޝާންތު ސިންގް ރާޖްޕޫތު މިދިޔަ މަހުގެ 14 ވަނަ ދުވަހު އަމިއްލައަށް މަރުވުމާއި ގުޅިގެން، އެކަމާއި އެންމެ ގިނައިން ވާހަކަ ދައްކާ އެތައް ބަޔަކާއި ދިމާލަށް ބަސްބުނި އެކަކީ އެކްޓްރެސް ކަންގްނާ ރަނާވަތެވެ.
ކަންގްނާގެ ވާހަކަތަކާއި ތުހުމަތުތަކާއި ގުޅިގެން މުމްބައީ ފުލުހުން ވަނީ ސުޝާންތުގެ ކޭސްގައި ކަންގްނާ އާއި ވެސް ސުވާލު ކުރުމަށް ނިންމާފައެވެ. އެގޮތުން މިމަހުގެ 4 ވަނަ ދުވަހު ވެސް ފުލުހަށް ހާޒިރުވުމަށް ކަންގްނާ އަށް ޗިޓު ފޮނުވިއެވެ.
ނަމަވެސް އެދުވަހު ކަންގްނާ ފުލުހަށް ހާޒިރު ނުވީ އޭނާއަށް ޗިޓު ދޭން ފުލުހުން ދިޔައީ މުމްބައިީ ގައި ކަންގްނާ ދިރިއުޅެމުންދާ ގެއަށް ކަމަށް އޭނާގެ މެނޭޖަރު އަމްރިތާ ދަތު ބުނެފައިވެއެވެ. އެހެންކަމުން އެހެން ދުވަހަކު ކަންގްނާ އަނެއްކާވެސް ފުލުހަށް ހާޒިރު ކުރަން ނިންމާފައިވާ ކަމަށް ރިޕޯޓުތަކުން ބުނެފައިވެއެވެ.
ކަންގްނާ މިވަގުތު ހުރީ މުމްބައީއަކު ނޫނެވެ. އެހެންކަމުން އޭނާ ފުލުހަށް ހާޒިރު ކުރާނީ އެނބުރި މުމްބައީއަށް ދިޔުމުން ކަމަށް ވެސް ރިޕޯޓުތަކުން ބުނެއެވެ.
ސުޝާންތުގެ މަރާއި ގުޅިގެން ކަންގްނާ ވަނީ ވަރަށް ގިނަ ތުހުމަތުތަކެއް ބޮލީވުޑްގެ އިސް ސަފުގައި ހަރަކާތްތެރިވާ ބައެއް ފަރާތްތަކަށް ކޮށްފައެވެ. އެގޮތުން ކަރަން ޖޯހަރް އާއި މަހޭޝް ބަޓް އަށް ވެސް ކަންގްނާ ވަނީ ސުޝާންތަށް ފުރުސަތު ނުދިންކަމަށް ބުނެ ތުހުމަތު ކޮށްފައެވެ.
