ރޯދަ މަހު ހަވީރު 5:30 އިން މެންދަމު 3:00 އަށް ރެސްޓޯރަންޓުތައް ހުޅުވާފައި ބެހެއްޓޭނެ
ރޯދަ މަހު ހަވީރު 5:30 އިން މެންދަމު 3:00 އަށް ރެސްޓޯރަންޓުތައް ހުޅުވާފައި ބެހެއްޓޭނެ ކަމަށް އިކޮނޮމިކް މިނިސްޓްރީން އިއުލާނު ކޮށްފިއެވެ.
އިކޮނޮމިކް މިނިސްޓްރީގެ އިއުލާނުގައި ބުނެފައި ވަނީ މި ފެށޭ ރަމަޟާން ރޯދަމަހުގެ ރޭތަކާއި ޝައްވާލްމަހުގެ ފުރަތަމަ 7 ދުވަހުގެ ރޭތަކުގައި ކެއިން ބުއިމުގެ ޚިދުމަތްދޭ ތަންތަން ހުޅުވާފައި ބަހައްޓަން ވާނީ އެދުވަހެއްގެ ހަވީރު 5:30 އިން މެންދަމު 3:00 އާ ދެމެދުގެ ވަގުތެއްގައި ކަމަށެވެ. މި އާއެކު ކަސްޓަމަރުންނަށް ހުޅުވާލައިގެން، ވިޔަފާރިކުރާ ފަރާތްތަކުން އެޗްޕީއޭއިން ކަނޑައަޅާ އުޞޫލުތަކާ އެއްގޮތަށް އަމަލު ކުރުން ވާނެ ކަމަށް ވެސް އެ މިނިސްޓްރީން ބުނެފައި ވެއެވެ.
އެހެންކަމުން ރާއްޖޭގައި މީހުން ދިރިއުޅޭ ރަށްތަކުގައި ހިންގާ ކެއިންބުއިމުގެ ޚިދުމަތްދޭ ތަންތަނުން މިއަދު އިއުލާނު ކުރި މި ގަޑިތަަކަށް ތަންތަން ހުޅުވައިގެން ހިދުމަތް ދިނުމަށް އިކޮނޮމިކް މިނިސްޓްރީން ވަނީ އެދިފައެެވެ.
ކެއިން ބުއިމުގެ ޚިދުމަތް ދޭ ތަންތަން މި އަަހަރުގެ ރަމަޟާންމަހު ހުޅުވައިފައި ބެެހެއްޓޭ ވަގުތު އިކޮނޮމިކް މިނިސްްޓްރީން އިއުލާނު ކޮށްފައިވާއިރު، ރަމަޟާން މަސް ފެށުމުގެ ކުރިން ރެސްޓޯރަންޓު ފަދަ ތަންތަން ފަތިހު 4:30އިން މެންދަމު 1:00 ހުޅުވާފައި ބެހެއްޓޭނެ ކަމަށް ވެސް އެ މިނިސްޓްރީން ވަނީ އިއުލާނު ކޮށްފައެވެ.
