ބޮޑުފިނޮޅުން ބިދޭސީން ބާލުވާތީ ޕީއައިއެލްސީން ކަންބޮޑުވުން ފާޅުކޮށްފި
ރިސޯޓެއްގެ ގޮތުގައި ތަރައްގީ ކުރަމުން އަންނަ ބ. ބޮޑުފިނޮޅުގައި ތިބި ބިދޭސީން ރަށުން ބާލުވަން، ސީލް މޯލްޑިވްސް އިން ނިންމި ކަމުގެ މައުލޫމާތު ލިބިފައިވާ ކަމަށް ބިދޭސީންނަށް ގާނޫނީ އެހީތެރިކަން ދެމުން އަންނަ ޕަބްލިކް އިންޓްރެސްޓް ލޯ ސެންޓަރު (ޕީއައިއެލްސީ) އިން ބުނެފިއެވެ.
އެ ޖަމިއްޔާ އިން އިއްޔެ ނެރުނު ބަޔާނެއްގައި ބުނީ ޒަރޫރީ ބޭނުންތަކެއްގައި ބޮޑުފިނޮޅުން ފޭބި ހަތަރު ބިދޭސީއަކު އެ ރަށަށް އަނބުރާ އެރުމުގެ ހުއްދަ ފުލުހުންނާއި ސީލް މޯލްޑިވްސް އިން ނުދިން ކަމުގެ މައުލޫމާތު ލިބިފައިވާ ކަމަށެވެ. ބާކީ ތިބި ބިދޭސީން ރަށުން ބޭލުވުމުގެ މަސައްކަތް ސީލް މޯލްޑިވްސް އިން މިއަދު ކުރަން ނިންމާފައިވާ ކަމުގެ މައުލޫމާތު ލިބޭ ކަމަށް ވެސް ބުންޏެވެ.
"މަސައްކަތްތެރިންގެ ހައްގުތައް ހިމާޔަތްކޮށް ކުރިއެރުވުމަކީ ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީގެ 18 ވަނަ މާއްދާގެ ދަށުން ދައުލަތުގެ ވެސް ޒިންމާއެއްކަން މި ފުރުސަތުގައި ފާހަގަކޮށް، އެ ބިދޭސީ މަސައްކަތްތެރިންނަށް މި ވަގުތަށް ލިބިފައިވާ ބޯހިޔާވަހިކަމުން މަހުރޫމް ކުރުމާއި އެ ފަރާތްތަކަށް ކެއުމާއި ބުއިމާއި ސިއްހީ ފަރުވާ އާއި އެންމެހާ ޟަރޫރީ ބޭނުންތައް ނުފުއްދޭނެ ފަދަ ހާލަތްތައް މެދުވެރި ކުރުވުމަކީ އެ ފަރާތްތަކުގެ އިންސާނީ ހައްގުތަކާ ގުޅޭ ކަމެއް ކަމުގައިވާތީ، ދައުލަތުގެ އިދާރާތަކުގެ އަމިއްލަ އިސްނެންގެވުމުގައި މި މައްސަލަ ބައްލަވައި އަވަސް ފިޔަވަޅުތައް އެޅުއްވުމަށް މި ޖަމިއްޔާގެ ފަރާތުން އެ އިދާރާތަކަށް އިލްތިމާސްކުރަމެވެ،" ޕީއައިއެލްސީގެ ބަޔާނުގައި ބުންޏެވެ.
ބޮޑުފިނޮޅުގައި މަސައްކަތް ކުރާ 179 ބިދޭސީންނަށް އެތައް މަހެއް ވަންދެން މުސާރަ ނުދީ ގެންގުޅުނު މައްސަލައިގައި އެމީހުން ވަނީ އެ ރަށުގައި މުޒާހަރާކޮށް މުދަލަށް ބޮޑެތި ގެއްލުންތަކެއް ދީފައެވެ. އަދި ހަމަނުޖެހުންތައް ކޮންޓްރޯލް ކުރަން ދިޔަ ފުލުހުންނަށް ވެސް ވަނީ ހަމަލަދީފައެވެ. ބޮޑުފިނޮޅުގައި ހިނގައި ދިޔަ ހަމަނުޖެހުންތަކާ ގުޅިގެން ގިނަ އަދަދެއްގެ ބިދޭސީން ވަނީ ހައްޔަރުކޮށްފައެވެ.
