ތިން މަސް ތެރޭ ދެވަނަ ފަހަރަށް ކޮވިޑަށް ފައްސިވިޔަސް އެއީ އަލުން ބަލި ޖެހުނީއެއް ނޫން: ޑރ. ފައިސަލް
ތިން މަސް ތެރޭ ދެވަނަ ފަހަރަށް ކޮވިޑް-19 އަށް ފައްސިވިޔަސް އެއީ އަލުން ބަލި ޖެހުނީ ކަމަށް ނުބެލެވޭނެ ކަމަށް ކުޑަކުދިންގެ ހާއްސަ ޑޮކްޑަރު، ޑރ. އަހުމަދު ފައިސަލް ވިދާޅުވެއްޖެއެވެ.
ކޮވިޑް-19އާ ގުޅޭ ދިރާސާއެއް އާންމު ކުރައްވާ ޓްވިޓް ކުރައްވަމުން ޑރ. ފައިސަލް ވިދާޅުވީ ކޮވިޑް-19 ޖެހުމަށްފަހު ޢަލާމާތެއް ނެތް ނަމަ ތިން މަސް ތެރޭގައި ޓެސްޓުކޮށްގެން ފައްސިވިޔަސް އެއީ އަލުން ބަލި ޖެހުނީ ކަމަށް އަދި ބުނެވެން ނެތް ކަމަށާއި އެއީ ވައިރަސްގެ ބައިތައް ޓެސްޓުން ދެއްކުން ކަމަށެވެ.
"މިހާތަނަށް ދެވަނަ ފަހަރަށް ކޮވިޑު ޖެހުނުކަމަށް ޔަގީންކަމާއެކު ސާބިތު ކުރެވިފައެއް ނެތް." ޑރ. ފައިސަލް ވިދާޅުވިއެވެ.
ކޮވިޑު ޖެހުމަށްފަހު ޢަލާމާތެއް ނެތިއްޔާ 3 މަސްތެރޭގައި ޓެސްޓުކޮށްގެން ފައްސިވިޔަސް އަދި ބުނެވެން އޮތީ އެއީ ބަލި އަލުން ޖެހުމެއްނޫނޭ، ވައިރަސްގެ ބައިތައް ޓެސްޓުން ދެއްކީއޭ
މިހާތަނަށް ދެވަނަފަހަރަށް ކޮވިޑުޖެހުނުކަމަށް ޔަގީންކަމާއެކު ސާބިތުކުރެވިފައެއްނެތް pic.twitter.com/7QNF4GuI5M— Ahmed Faisal (@Faisalnaifaru) July 24, 2020
ޑރ. ފައިސަލް މިހެން ވިދާޅުވެފައި ވާއިރު، ކޮވިޑް-19 ބަލިން ރަނގަޅުވި ދިވެއްސަކު އަނެއްކާވެސް އެ ބައްޔަށް ފައްސިވެފައިވާ ކަމަށް ބައެއް މިޑިއާތަކުން ވަނީ ރިޕޯޓު ކޮށްފައެވެ. ބައްޔަށް އަލުން ފައްސިވެފައިވަނީ ބޭސްފަރުވާއަށް އާސަންދަގެ އެހީގައި އިންޑިއާށް ދިޔަ މީހެކެވެ.
އާސަންދައިން ބުނި ގޮތުގައި އޭނާ ބައްޔަށް ފައްސިވީ އަންގާރަ ދުވަހުއެވެ. އެ މީހާ އަކީ މީގެ ކުރިން ރާއްޖޭގައި ހުރެ ފައްސިވި ފަހުން ރަނގަޅުވެފައިވާ މީހެކެވެ.
Ads by STO
