ކޮވިޑް-19: މާފުށީ ހޯމް ކަރަންޓީނުގައި ހުރި މީހަކު ފައްސި ވެއްޖެ!
ކ. މާފުށީގައި ހޯމް ކަރަންޓީނުގައި ހުރި މީހަކު ކޮވިޑް-19 އަށް ފައްސި ވެއްޖެއެވެ.
މާފުށީ ކައުންސިލް ރައީސް އުސްމާން ރަޝީދު "ދެން" އަށް މައުލޫމާތު ދެއްވަމުން ވިދާޅުވީ ހޯމް ކަރަންޓީނުގައި ހުއްޓާ ކޮވިޑް އަށް ފައްސި ވެފައިވަނީ އަންހެނެއް ކަމަށާއި އޭނާ މިބައްޔަށް ފައްސިކަން އެނގުނީ އިއްޔެ ކަމަށެވެ.
"މާލެއިން މިރަށަށް އައިސް ހޯމް ކަރަންޓީންގައި މަޑުކޮށްގެން ތިބި (މާފުށްޓަށް ނިސްބަތްވާ) އާއިލާއެއްގެ މީހެއް ފައްސިވީ. އެމީހުންގެ ތެރެއިން އިތުރު މީހަކު ޕޮޒިޓިވް ނުވޭ" އުސްމާން ވިދާޅުވި އެވެ.
އެ މީހާ ކޮވިޑަށް ފައްސިވިކަން އެނގުނީ ހޯމް ކަރަންޓީން ފުރިހަމަ ކުރުމަށްފަހު ދޫކޮށްލުމުގެ ކުރިން ނެގި ސާމްޕަލްގެ ނަތީޖާއިންނެވެ.
ފައްސިވީ މީހާގެ އާއިލާ ކޮވިޑަށް ނައްސި ނަމަވެސް، ރައްކާތެރި ކަމަށްޓަކައި އެމީހުން އިތުރަށް ކަރަންޓީނުގައި މަޑު ކުރަން އަންގާފައިވާ ކަމަށް ވެސް އުސްމާން ވިދާޅުވިއެވެ.
