ޗައިނާއާއެކު އިތުރު މަޝްރޫއުތައް ކުރިއަށް ގެންދަން ރާއްޖެއިން ތައްޔާރު: ޝާހިދު
ޗައިނާއަކީ ރާއްޖޭގެ އިޖުތިމާއީ އަދި އިގުތިސޯދީ ތަރައްގީގެ މުހިއްމު ބައިވެރިއެއް ކަމަށާއި މި ސަރުކާރުން ވެސް ދެ ގައުމުގެ މެދުގައި އޮތް ރަހުމަތްތެރި ގުޅުން އިތުރު ހަރުފަތަކަށް ގެންދަން ތައްޔާރަށް އޮތް ކަމުގެ ޔަގީންކަން ފޮރިން މިނިސްޓަރު އަބްދުﷲ ޝާހިދު ދެއްވައިފި އެވެ.
ޗައިނާގެ ޒިންހުއާ ނިއުސް އެޖެންސީ އަށް ޝާހިދު ދެއްވި އިންޓަވިއުއެއްގައި ވިދާޅުވީ ޗައިނާ އަކީ މިހާރުވެސް އަދި ކުރިއަށް އޮތް ތަނުގައި ވެސް އިގްތިސާދީ ގޮތުންނާއި ތަރައްގީގެ ގޮތުން ވެސް ރާއްޖޭގެ މުހިއްމު ބައިވެރިއެއް ކަމަށާއި ދެ ގައުމުގެ ދެމެދުގައި އޮތް އެކުވެރި ގުޅުން އިތުރަށް ބަދަހިކުރަން ސަރުކާރުން ތައްޔާރަށް އޮތް ކަމަށެވެ.
ޝާހިދު ވިދާޅުވީ ސިނަމާލެ ބުރިޖަކީ ދެ ގައުމުގެ ރަހުމަތްތެރިކަމުގެ ރަމްޒެއް ކަމަށާއި އިޖުތިމާއީ ބޯހިޔާވަހިކަން ފަދަ ރާއްޖެއަށް ނުހަނު ބޭނުން ވެފައިވާ މަޝްރޫއުތަކަށް ޗައިނާ އިން އެހީތެރިކަން ފޯރުކޮށްދީފައިވާ ކަމަށެވެ.
"ސަރުކާރުން މަސައްކަތް ކުރަނީ، ޗައިނާ އާއެކު ގުޅިގެން މިހާރު ހުރި މަޝްރޫއުތައް ނިންމައި، އަދި މުސްތަގުބަލުގައި ވެސް އިތުރު މަޝްރޫއުތައް ކުރިއަށް ގެންދަން،" މިނިސްޓަރު ޝާހިދު ވިދާޅުވި އެވެ.
ކުރީގެ ރައީސް އަބްދުﷲ ޔާމީންގެ ސަރުކާރުގެ ގިނަ މަޝްރޫއުތައް ހިންގަން ހަވާލުކޮށްފައިވަނީ ވެސް ޗައިނާގެ ކުންފުނިތަކަށެވެ. ނަމަވެސް މި ސަރުކާރު ވެރިކަމާ ހަވާލުވުމަށްފަހު އަލުން ވަނީ އިންޑިޔާއާ ގުޅުން ބަދަހިކުރަން ފަށާފައެވެ.
