ރާއްޖޭގެ މިނިވަންކަން ދިވެހި ރައްޔިތުންނަށް ގެއްލިދާނެ ކަމުގެ ބިރު ބޮޑުވެއްޖެ: އަދުރޭ
ރާއްޖޭގެ މިނިވަންކަން ދިވެހި ރައްޔިތުންނަށް ގެއްލިދާނެ ކަމުގެ ބިރު ބޮޑުވެފައިވާ ކަމަށް އިދިކޮޅު ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
އަދުރޭ މިހެން ވިދާޅުވީ ރާއްޖޭގެ 55 ވަނަ މިނިވަން ދުވަހާ ގުޅިގެން ނެރުއްވި ހާއްސަ ހިތޯބެއްގައެވެ.
އެގޮތުން އަދުރޭ ވިދާޅުވީ ދިވެހި ރާއްޖޭގެ މިނިވަންކަން ދިވެހި ރައްޔިތުންނަށް ގެއްލެން ކުޑަތަންވެފައިވާކަމަށާއި މި މައްސަލައަކީ މިހާރު ޤައުމު ދެކެ ލޯބިވާ ކޮންމެ ދިވެހި ރައްޔިތަކު އިޙްސާސް ކުރާ ބިރެއްކަމަށެވެ.
އަދުރޭ ވިދާޅުވީ ދައްޕަރުގައި މިހާރު ވަޒަންވެރިކުރުވަން އެ އުޅޭ އެތައް ހާސް ހިންދީންނެއް އެ ރަށުގައި ވަޒަންވެރި ކުރުވާކަށް ދިވެހިން ނޭދޭނެ ކަމަށާއި ހުޅުމާލޭގައި ވަޒަންވެރި ކުރުވާން އެ އުޅޭ އެތައް ހާސް ހިންދީންނަކަށް އެ ތަނުން ބިން ދޭކަށް ވެސް ދިވެހިން ނޭދޭނެ ކަމަށެވެ.
"އާންމު ދިވެހި ރައްޔިތުންކުރެ ހަމަ އެކަކުވެސް ނޭދޭ އައްޑު އަތޮޅަކީ ދިވެހީން އެރުން މަނާ އަތޮޅަކަށް ވާކަށް. އާންމު ރައްޔިތުން ކުރެ ހަމަ އެކަކު ވެސް ނޭދޭ ރާއްޖޭގެ ކޮންމެ ވައިގެ ބަނދަރަކުން، ކޮންމެ މަގަތު ފާލަމަކުން ކޮންމެ ހޮސްޕިޓަލަކުން އެހެން ގައުމެއްގެ ފުލުހަކު އެއްތެޔޮ ގަނޑަކުން ގައިގައިޖެހީމާ ވަދެނުކުމެވޭ ދުވަހެއް ދެކޭކަށް. މިހެން ވީ އިރު، މިއީ ކިހާ އަސަރު ހުރި ޙަޤީޤަތެއްތޯ؟ ކިހާ ފަރުވާތެރިވާން ވެއްޖެ މައްސަލައެއްތޯ؟ ކިހާ ބިރުގަންނަން ޖެހޭ ޙާލަތެއްތޯ؟." އަދުރޭ ވިދާޅުވިއެވެ.
އަދުރޭ އިތުރަށް ވިދާޅުވީ ރައީސް އަބްދުﷲ ޔާމީނަށް އަނިޔާ އެދެނީ މި ކަންކަމަށް ފާޅުގާ ނޫނެކޭ ވިދާޅުވީމުވުން ކަމަށާއި އެއީ އޭނާ އަޅުގަނޑު ލޮލުން ދެކި އަތުން ހިފި މަންޒަރުތައް ކަމަށެވެ. އަދި ދިވެހިރާއްޖޭގެ މިނިވަން ދުވަހު ޖަލުގައި އެ އޮންނެވީ ދިވެހި ޤައުމުގެ މިނިވަންކަން ކަމަށާއި ބޭރުން ބުނާހާ އެއްޗަކަށް ސަރުކާރަކުން އާނއެކޭ ބުންނާ ނަމަ އާޚިރުގައި ރައްޔިތުންނަށް ލިބޭނީ އަޅުވެތިކަން ކަމަމާއި ދަނޑިބުރިންނާ ލަޓިބުރިންނާ ބަޑިން އަރާ ހަމަލާތައް ކަމަށް އަދުރޭ ވިދާޅުވިއެވެ.
"ލޮބުވެތި ދިވެހި ރައްޔިތުން! ތިޔައިން ކޮންމެ ބޭފުޅަކު މި މައްސަލަ ރަނގަޅަށް ދިރާސާކުރައްވާ! ވަމުންދާ ގޮތް މި ވަގުތު ހޯއްދަވާ! މި ދުވަހު! ހަމަ މިހާރު! މަސައްކަތް ފައްޓަވާ! ކޮންމެ ބޭފުޅަކު އެ ބޭފުޅެއްގެ މަޖިލިސް މެންބަރުގެ އަރިހަށް ވަޑައިގަންނަވާ! އާދޭސް ދަންނަވާ! މި ކުޑަކުޑަ ހިމޭން ދިވެހި ނަސްލުގެ މެދުގައި ދީނުގެ ގޮތުން ތަފާތު، އަޚްލާޤުގެ ގޮތުން ތަފާތު، ސާފުތާހިރުކަމުގެ ގޮތުން ތަފާތު، މުޅިން އެހެން ޒާތެއްގެ ބަޔެއްގެ އާބާދީއެއް އުފައްދަން ޖެހޭ ބޭނުމަކީ ކޮބައިތޯ؟ އަމިއްލަ ނަފުސާ ވެސް ސުވާލުކުރައްވާ!" އަދުރޭ ވިދާޅުވިއެވެ.
އަދުރޭ އިތުރަށް ވިދާޅުވީ ރާއްޖޭގައި ބޭރު ގައުމަކުން އެހީތެރިކަން ދޭ ކަމަށް ބުނާ ހޮސްޕިޓަލެއް އެބަ ހުރި ކަމަށާއި އެ ތާނގައި ލޭ ނަގާ މީހުންގެ ގޮތުގައި އެ ތިބީ ބޭރުގައުމެއްގެ ސިފައިން ކަމަށެވެ. އަދި ރާއްޖޭގައި ހެލިކޮޕިޓަރެއް ވެސް އޮންނަ ކަމަށާއި އޭގައި ވެސް ތިބެނީ ބޭރުގައުމެއްގެ ސިފައިން ކަމަށެވެ.
"ދެން އެ ގެންނަނީ އަސްކަރީ މަތިންދާ ބޯޓެއް. އޭގައި ވެސް މަސައްކަތްކުރަނީ ދިވެހި ސިފައިންނެއް ނޫން. ދެން ރާއްޖޭގެ އެތައް ތަނެއްގައި އެތައް ބިމެއްގައި ބޭރު މީހުން ވަޒަންވެރިކުރުވަން ނިންމާ އިރު އެއީ ވެސް ސިފައިން ނޫން ބަޔަކަށް ވެދާނެ ކަމަށް ވެސް އޮތީ ކޮން ޔަގީން ކަމެއް ތޯ؟" އަދުރޭ ސުވާލު ކުރެއްވިއެވެ.
Ads by STO
