ފުލުހުންގެ ޗިޓަކީ ރައްޔިތުންގެ ހައްގުގައި ނުކުތީމަ ލިބޭ އަގުބޮޑު ސެޓްފިކެޓެއް: އަދުރޭ
ފުލުހުން އިދާރާއަށް ހާޒިރުވުމަށް ފޮނުވާ ޗިޓަކީ ރައްޔިތުންގެ ހައްގުގައި ނުކުތުމުން ލިބޭ އަގުބޮޑު ސެޓްފިކެޓެއް ކަމަށް ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
އަދުރޭ މިހެން ވިދާޅުވީ އިދިކޮޅުން މިދިޔަ އާދީއްތަ ދުވަހުގެރޭ މާލޭގައި ކުރި މުޒާހަރާއާ ގުޅިގެން އިސްކޮށް ތިއްބެވި ރައްޔިތުން މަޖިލީހުގެ ކުރީގެ މެމްބަރު މުހައްމަދު އިސްމާއީލާއި ޕީއެންސީގެ ނައިބު ރައީސް އަހްމަދު ނިމާލް މިއަދު ހަވީރު ފުލުހަށް ހާޒިރު ވުމަށް ޗިޓް ފޮނުވުމާ ގުޅިގެންނެވެ.
މިކަމަށް އިޝާރާތް ކުރައްވައި ރޭ އިދިކޮޅުން ބޭއްވި ޖަލްސާއެއްގައި އަދުރޭ ވިދާޅުވީ ފުލުހުންގެ ޗިޓަކީ އެ ދެ ބޭފުޅުންނަށް ލިބުނު އިތުރު ސެޓްފިކެޓެއް ކަމަށާއި އަދި މިއީ އެ ދެ ބޭފުޅުން ހާސިލުކުރެއްވި މާސްޓާސް ޑިގްރީ އަށްވުރެ މާ މަތީ ސެޓްފިކެޓެއް ކަމަށެވެ.
"އެ ސެޓްފިކެޓް މަތިވީ ތިބޭފުޅުންނަށް ތި ސެޓްފިކެޓް ތި ލިބުނީ ދިވެހި ގައުމުގެ ހައްގުގައި، ދިވެހި ގައުމުގެ ދިފާއުގައި ނިކުތީމަ، ދިވެހި ރައްޔިތުންގެ ހައްގުތައް ކަށަވަރުކޮށްދޭން ނިކުތީމަ. އެހެންވީމަ ތި ބޭފުޅުން މެލޭޝިޔާ އިންނާއި ސްރީލަންކާ ފަދަ ތަންތަނުން ތި ހެއްދެވި މާސްޓާސް އަށްވުރެ ހަގީގަތުގައި ވެސް މާ އަގުބޮޑު ސެޓްފިކެޓެއް ތި ބޭފުޅުންނަށް ތި ލިބުނީ" އަދުރޭ ވިދާޅުވިއެވެ.
އަދުރޭ ވަނީ ފުލުހުންގެ ޗިޓު އޭނާ އަށް ނުލިބުމުން ހިތާމަކުރައްވާ ކަމަށް ވިދާޅުވެފައެވެ. އަދި އެ ޗިޓު ނުލިބުމުން ގައުމުގެ ހައްގުގައި އެއްވެސް ކަމެއް ނުކުރެވުނީއޭ މިހާރު ހިތަށް އަރާ ކަމަށް އަދުރޭ ވިދާޅުވިއެވެ.
ނިމާލު އަދި މުހައްމަދު އިސްމާއިލް އަށް ފުލުހުން ފޮނުވާފައިވާ ޗިޓުގައި ވަނީ މިމަހުގެ 26 ވަނަ ދުވަހުގެރޭ ޕީޕީއެމް އާއި ޕީއެންސީން ގުޅިގެން ސުލްހަވެރިކަމާއި އެކު އެއްވެ އުޅުމުގެ ޤާނޫނާއި ހިލާފަށް، ޤާނޫނީ ގޮތުން އުފެދިފައިވާ ސަރުކާރާއި ދެކޮޅަށް އަޑު އުފުލައި، އެ ޤާނޫނާއި ހިލާފަށް އަމަލު ކުރުމަށް އަމަލުކުރުމަށް އާންމުންނަށް ހިތްވަރުދީފައިވާ ކަމަށެވެ.
"ޤާނޫނު އަސާސީގައި ބަޔާން ކުރާ އެއްތަނުން އަނެއްތަނަށް ދިޔުމުގެ މިނިވަންކަމަށް ހުރަސް އެޅޭގޮތަށް މަހުގައި ހިނގާ މީހުންނާއި ދުއްވާ މީހުންނަށް ހުރަސްއަޅާ، ޤާނޫނު ތަންފީޒު ކުރާ މުވައްޒަފުންނަށް ހުރަސް އަޅާ ދައުލަތުގެ މަސައްކަތް ކުރުމަށް ދަތިކޮށް ހުރަސް އެޅިކަމަށް ތުހުމަތު ކުރެވޭ ކަމަށެވެ. އަދި އެ މައްސަލާގައި ބަޔާން ނެގުމަށް މާދަމާ 15:00 އަށް ފުލުސް އޮފީހަށް ހާޒިރުވުމަށް އަންގަން." ޗިޓުގައި ވެއެވެ.
