ޕެޕާ ސްޕްރޭ ޖަހައި އިދިކޮޅުން ބޭއްވި މުޒާހަރާ ރޫޅާލައިފި
އިދިކޮޅު ކޯލިޝަނުން މިރޭ މާލޭގައި ބޭއްވި މުޒާހަރާ ޕެޕާ ސްޕްރޭ ބޭނުންކޮށްގެން ފުލުހުން ރޫޅާލައިފިއެވެ.
މިނިވަން ދުވަހުގެ ރެއިން ފެށިގެން ޕީޕީއެމް/ޕީއެންސީގެ މެންބަރުން ކޮންމެ ރެއަކުވެސް ގެންދަނީ މުޒާހަރާ ކުރަމުންނެވެ. މިރޭގެ މުޒާހަރާ ފުލުހުން ރޫޅާލާފައިވަނީ މަޖީދީމަގާއި ސޯސަން މަގު ގުޅުނު ކަންމަތިންނެވެ.
ގިނަ އަދަދަކަށް ޕެޕާ ސްޕްރޭ ބޭނުންކުރުމުގެ ސަބަބުން އިދިކޮޅު ޕީއެންސީގެ ނައިބު ރައީސް އަދި ރައްޔިތުން މަޖިލިހުގެ މާވަށު ދާއިރާ މެމްބަރު މުޙައްމަދު ސަޢީދަށް އަނިޔާވެ އޭނާވަނީ އޭޑީކޭ ހޮސްޕިޓަލަށް ގެންގޮސްފައެވެ.
ސައީދަށް ހޮސްޕިޓަލުގައި ފަރުވާ ދެމުން އަންނައިރު މިރޭގެ މުޒާހަރާގެ ތެރެއިން ޕީއެންސީގެ ކައުންސިލު މެންބަރު އަޙްމަދު ނަރީޝު ވަނީ ހައްޔަރުކޮށްފައެވެ.
މުޒާހަރާ މިރެޔަށް ނިންމާލާފައިވާއިރު މުޒާހަރާގެ ބައިވެރިން ވަނީ ރައީސް އިބްރާހިމް މުހައްމަދު ސޯލިހުގެ އިސްތިއުފާ އަށާއި، ވައުދުތައް ފުއްދުމަށާއި ރައްޔިތުންނަށް އަނިޔާ ނުކުރުމަށް ގޮލާފާފައެވެ. އަދި ޖަލަށްލާފައިވާ ކުރީގެ ރައީސް އަބްދުﷲ ޔާމީން މިނިވަން ކުރުމަށް ވެސް މުޒާހަރާގެ ބައިވެރިން ވަނީ ގޮވާލާފައެވެ.
