މިއީ މުޒާހަރާކޮށް އެއްވުމުގެ އަދަދު ދައްކަންވީ ވަގުތެއް ނޫން، އޮންލައިންކޮށް އަޑުއުފުލާ: އަމީން
މިއީ މުޒާހަރާކޮށް އެއްވުމުގެ އަދަދު ދައްކަންވީ ވަގުތެއް ނޫން ކަމަށާއި ސަރުކާރާ ޚިޔާލު ތަފާތުވާނަމަ އޮންލައިންކޮށް އަޑުއުފުލުމަށް ހެލްތު މިނިސްޓަރު އަބްދުﷲ އަމީން ވިދާޅުވެއްޖެއެވެ.
ރާއްޖެ ޓީވީ "ފަލަ ސުރުހީ" ފްރޮގްރާމްގައި ބައިވެރިވެވަޑައިގެން ވާހަކަފުޅު ދައްކަވަމުން މިނިސްޓަރު އަމީން ވިދާޅުވީ މާލޭގެ ހާލަތު މިހާރު އޮތީ ގިނަބަޔަކު އެއްތަނަކަށް އެއްވެ އަޑުއުފުލެވޭ ފަދަ ހާލަތެއްގައި ނޫންކަމަށާއި މި ދުވަސްވަރު ހާލަތު ހުރި ގޮތުން މުޒާހަރާ ކުރުމަކީ އެހާ ޒިންމާދާރު ކަމެއް ނޫން ކަމަށެވެ. އަދި މުޒާހަރާ ކޮށްގެން ނޫން ގޮތްގޮތަށް ވެސް ހިޔާލު ފާޅުކުރެވޭނެ ކަމަށް މިނިސްޓަރު ވިދާޅުވި އެވެ.
"ކޮވިޑް19 މާލޭގައި މިއޮތް ހާލަތަކީ މުޒާހަރާތަކުގެ ގޮތުގައި އެގޮތަށް މުޒާހަރާ ކުރަން އޮތް ހާލަތެއް ނޫން. އަދި މި ހާލަތަކީ މަގުމަތީގައި އެތައް ސަތޭކަ ބަޔަކު އެއްވެ، އެއްވުމުގެ އަދަދު ދެއްކުމަށް މަސައްކަތް ކުރަން ޖެހޭ ހާލަތެއް ވެސް ނޫން. ސަރުކާރުން ކުރާ ކަންތައްތަކާ ހިޔާލު ތަފާތުވާނަމަ އަޑު އުފުލޭނެ ގޮތްތަކެއް އެބަހުރި. އޮންލައިންކޮށް އެކަން ކުރެވޭނެ ގޮތްތަކެއް ވެސް އެބަހުރި،" މިނިސްޓަރު ވިދާޅުވި އެވެ.
އަމީން ވިދާޅުވީ ކޮވިޑް-19 އަކީ ސިޔާސީ ކަމެއް ނޫން ކަމަށާއި ކޮވިޑާއި ގުޅޭ ކަންކަމުގައި ނިންމުންތައް ނިންމަން ޖެހޭނީ ޓެކްނިކަލް ކަންކަމަށް ބެލުމަށް ފަހު ކަމަށެވެ. ސިއްހީ ދާއިރާގެ ކަންކަން ބެލެހެއްޓުން މަތިކޮށްފައިވާ މީހެއްގެ ހައިސިއްޔަތުން ގައިޑްލައިންތަކާއި އެއްގޮތައް ޚިޔާލުފާޅުކުރުމަށް މިނިސްޓަރު އަމީން ވަނީ އިލްތިމާސް ކުރައްވާފައެވެ.
