އަހަންނަށް ތައުބާ ވެވިދާނެތަ؟
"އަހަންނަށް ތައުބާ ވެވިދާނެތަ؟" މިއީ ވަރަށް ގިނަ ބޭފުޅުންގެ ސުވާލެކެވެ. އެގޮތުން ތިމަންނާއަށް ވަރަށް ގިނަ، ވަރަށް ބޮޑެތި ފާފަތަކަށް އަރައިގަނެވިފައިވާ ކަމަށް ވެސް ބުނެ، އަދި ތިމަންނާގެ މުޅި ޙަޔާތް މިވަނީ ފާފަ ކުރުން މަތީގައޭ ބުނެ އުޅޭ މީހުން ވެސް އަޅުގަނޑުމެންގެ ތެރޭގައިވެއެވެ.
އެފަދައިން ފާފަ ކުރެވޭ ބައެއް މީހުންގެ ހިތްތަކުގައި އުފެދިފައިވާ ސުވާލަކީ، އެ ހުރިހާ ފާފަތަކެއް ކުރެވިފައިވީ ނަމަވެސް ތިމަންނާއަށް ތައުބާ ވެވިދާނެތޯއެވެ.
މި ރަމަޟާން މަހު "ދެން" އިން ގެނެސްދޭ "ހިދާޔަތް" ޕްރޮގްރާމުގައި މަޝްހޫރު ދީނީ ޢިލްމުވެރިޔާ ޝެއިޚް އާދަމް ނިޝާން ވަނީ އެ ސުވާލުތަކަށް ޖަވާބު ދެއްވާފައެވެ.
"މާތް ﷲ ތަޢާލާގެ ވަޙީ ބަސްފުޅެއްގެ މާނައިގައިވެއެވެ. 'ކަލޭގެފާނު އެބައިމީހުންނަށް (ފާފަ ކުރުމުން އެބައިމީހުންގެ ނަފްސުތައް އިސްރާފު ކޮށްފައިވާ މީހުންނަށް) ވިދާޅުވާށެވެ. ތިމަން ﷲގެ އަޅުތަކުންނޭވެ، (އެއިލާހު ބޭނުންވެ ވޮޑިގެންނެވިނަމަ، ވަޙީ ކުރެއްވުނީސް އޭ ފާސިޤުންނޭވެ، އުރެދިފައިވާ މީސްތަކުންނޭވެ. އެކަމަކު އެ އިލާހު ބަސް ވަޙީ ކުރައްވަނީ ޝަރަފްވެރިކަމުގެ ބަސްމޮށުންތެރިކަމަކުން..ތިމަން އިލާހުގެ އަޅުތަކުންނޭވެ) ﷲ ގެ ރަޙްމަތުން ތިޔަބައި މީހުން އުންމީދު ކަނޑައިނުލާށެވެ. ﷲ ތަޢާލާއަކީ ހުރިހާ ފާފައެއް ފުއްސަވާ އިލާހެވެ.'
"ފަހަރެއްގައި ސުވާލު އުފެދި ދާނެ ކިތަންމެ ބޮޑު ފާފައެއް އަދި ކިތަންމެ ގިނަ ދުވަހަކު ކޮށްފައިވާ ފާފައެއް ނަމަވެސް ފުއްސަވާނެތޯ، އެކަލާނގެ ވަޙީ ބަސްފުޅުގައި އެވަނީ އެކަލާނގެއީ ހުރިހާ ފާފައެއް ފުއްސަވާ ރަސްކަލާނގެއޭ. އެހެންވީމަ އުންމީދު ކަނޑާނުލާށޭ ، މާޔޫސް ވެސް ނުވާށޭ" ޝެއިޚް އާދަމް ނިޝާން ވިދާޅުވިއެވެ.
މީގެ އިތުރުން ވެސް ޝެއިޚް ވިދާޅުވީ ކިތަންމެ ބޮޑު، ކިތަންމެ ގިނަ ދުވަހަކު ކުރެވިފައިވާ ފާފައެއް ނަމަވެސް އަދި ފާފައިން ތިމާގެ ނަފްސު އިސްރާފު ކޮށްފައިވާ މީހެއް ނަމަވެސް، ﷲ ތަޢާލާ ނުފުއްސަވާވަރު ފާފައެއް ނުވާ ކަމަށެވެ. އެއީ ޝިރުކުގެ ބޮޑުވެގެންވާ، އަދި ނުބައި ވެގެންވާ ފާފަ ކަމުގައިވީ ނަމަވެސް އެމީހަކު މަރުވުމުގެ ކުރިން ތަޢުބާވާ ނަމަ ﷲ ސުބްޙާނަހޫ ވަޠަޢާލާ އެ ފާފައެއް ވެސް ފުއްސަވާ ދެއްވާ ކަމަށެވެ.
Ads by STO
