އިއްވި ލިޔަނި: ވާހަކަ ދައްކާ ވަރަކަށް ޓައިޕްކޮށްދޭ ދިވެހި އެޕްލިކޭޝަނެއް

ލިޔަން ބޭނުންވާ އެއްޗެއް ނުވަތަ ޖުމުލައެއް ކިޔާލުމުން، އެ އެއްޗެއް ޓައިޕް ކޮށްދޭ ދިވެހިބަހުގެ އެޕްލިކޭޝަނެއް ތައާރަފް ކޮށްފިއެވެ.
ދިވެހިބަހުގެ ދުވަހާ ގުޅުވައިގެން ދިވެހިބަހުގެ އެކެޑަމީއިން އިއްޔެ އިފްތިތާހު ކުރި މި އެޕްލިކޭޝަނަށް ކިޔަނީ "އިއްވި ލިޔަނި" އެވެ. އަދި މީގެ އިތުރުން، ޓައިޕް ކުރުމުން، އެ ޓައިޕް ކުރާ އެއްޗެއް ކިޔައިދޭ އެޕްލިކޭޝަނެއް ވެސް އެ އެކެޑަމީ އިން ވަނީ އިފްތިތާހު ކޮށްފައެވެ. އެ އެޕްލިކޭޝަަނަކީ "ލިޔަނި އިއްވި" އެވެ.
ދިވެހިބަހުގެ އެކެޑަމީގައި މިއަދު އޮތް ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ދިވެހިބަހުގެ އެކެޑަމީގެ ރައީސް އަޝްރަފް އަލީ ވިދާޅުވީ މި އެޕްލިކޭޝަންތަކުގެ ސަބަބުން ޓައިޕް ކުރުމުގައި ދިމާވާ ދަތިތަކާއި އުނދަގޫތައް ހައްލު ކޮށްދޭ ކަމަށެވެ. އަދި މިއީ ލޯފަން ކުއްޖާއަށް ވެސް އެ ކުއްޖާގެ ކަންފަތާ ހަމައަށް ދިވެހިބަހުގެ އަޑުތައް ގެނެސްދޭ އެޕްލިކޭޝަނެއް ކަމަށް ވެސް އަޝްރަފް ފާހަގަ ކުރެއްވިއެވެެ.
މި ނޫސްވެރިންގެ ބައްދަލުވުމުގައި މި އެޕްލިކޭޝަންތަކުގެ "ބާނީ" އަހްމަދު މަހްފޫޒް ވެސް ބައިވެރި ވެލެއްވިއެވެ. މަހްފޫޒް ވިދާޅުވީ މިއީ ވަރަށް ކުރީއްސުރެ ކުރަމުން އަންނަ މަސައްކަތެއް ކަމަށާއި މި މަސައްކަތް އިތުރަށް ކުރިއަރުވާ މިހާ ހިސާބަށް ގެނައުމަށް ދިވެހިބަހުގެ އެކެޑަމީގެ ފަރާތުން ވަރަށް ބޮޑު އެހީތެރިކަމެއް ލިބުނު ކަމަށެވެ. އަދި މި އެޕްލިކޭޝަންގެ އެހީގައި ލޯފަން ކުދިންނަަށް ދިވެހިބަހުގެ އަޑުތައް އިއްވައިދިނުމަށް ޓަކައި ލޯފަން ކުދިންގެ ޖަމިއްޔާއާ ވެސް މިހާރު ވާހަކަ ދެކެވެމުން ދާ ކަމުގައި އޭނާ ވިދާޅުވިއެވެ.
<img class="alignnone size-large wp-image-79621" src="https://cdn.dhen.mv/wp-content/uploads/2021/04/Capture-1-1024x508.png" alt="" width="690" height="342" />
މިއަދުގެ ނޫސްވެރިންގެ ބައްދަލުވުމުގައި މަހްފޫޒް ވަނީ މި އެޕްލިކޭޝަން މަސައްކަތް ކުރާ ގޮތް ވެސް ނޫސްވެރިންނަށް ދައްކައިލައިފައެވެ. މަހްފޫޒް ބުނީ މި އެޕްލިކޭޝަންތަކަކީ 95 އިންސައްތަ މަސައްކަތްކުރާ އެޕްލިކޭޝަންތަކެއް ކަމަށެވެ.
މި އެޕްލިކޭޝަން ތަކަށް ވަދެވޭނީ <a href="http://kamana.ai/">ކަމަނަ.އޭއައި</a> އިންނެވެ. އަދި ކަމަނަ އަށް ވަނުމުން <a href="https://kamana.ai/stt">އިއްވި ލިޔަނި</a> އާއި <a href="https://kamana.ai/tts">ލިޔަނި އިއްވި</a> ފެންނާނެއެވެ. މިއީ ހަމަ ޔަގީނުން ވެސް ދިވެހިބަހަށް ލިބިގެން ދިޔަ ވަރަށް ބޮޑު ކުރިއެރުމެއް ކަން ޔަގީނެވެ.






ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.