މާތް ﷲ އަށްޓަކައި މަޝްހޫރުކަމާއި މަތީ މަޤާމުތައް ދޫކޮށްލި ދިވެހި ފިރިހެނެއްގެ ވާހަކަ
ދުނިޔެވީ މި ޙަޔާތުގައި މަޝްހޫރުކަމާއި މަތީ މަޤާމުތަކަކީ އަޅުގަނޑުމެންގެ ތެރެއިން ގިނަ ބަޔަކު ހާސިލު ކުރަން ފެން ބޮވައިގެންފައިވާ ދެ ކަންތަކެވެ. މި ދެ ކަންތައް ޙާސިލު ކުރުމަށްޓަކައި އެތައް ބަޔަކު ކިތަންމެ ކަމެއް ކުރެއެވެ. އެއީ ކުރުން އެންމެ ރަނގަޅު ކަންތައްތައް ނޫން ކަމުގައި ވިޔަސް، ބައެއް މީހުން އެފަދަ ކަންކަން ވެސް ކުރަނީ ބޭނުންވެފައި ހުންނަ އެފަދަ ވަގުތީ އުފަލެއްގެ ބޮޑުކަމުންނެވެ.
މިއީ ވެސް އެފަދައިން ދިރިއުޅުން ހޭދަ ކުރަމުންދިޔަ ދިވެއްސެއްގެ ވާހަކައެވެ. އެ ފިރިހެން މީހާއަކީ އޭނާ ކުރިން އަދާކުރަމުން ދިޔަ ވަޒީފާގައި ވެސް ކުރިއަރަމުން ދިޔަ، އޭގެ އިތުރުން ސިޔާސީ މައިދާނުގައި ވެސް ވިދަމުން ދިޔަ ހިތްވަރުގަދަ ޒުވާނެކެވެ.
އޭނާގެ އެދުމުގެ މަތިން، އޭނާގެ ވަނަވަރު ސިއްރުކުރުމަށް ފަހު، މި ވާހަކަ ތިޔަ ކިޔުންތެރިންނާ ޙިއްސާ ކޮށްލާނަމެވެ. އޭނާ ވެސް އެދެނީ އޭނާގެ ވާހަކައިގެ ޒަރީޢާއިން އެންމެންނަށް ވެސް އިބުރަތެއް ލިބުމަށެވެ.
"އަހަރެން އޭރު މަސައްކަތް ކުރީ ރާއްޖޭގައި ވަރަށް ނަން ހިނގާ ކުންފުންޏެއްގައެވެ. އެ ކުންފުނީގައި އަހަންނަކީ އެންމެ ސީނިއަރ މީހަކަށް ނުވި ކަމުގައި ވިޔަސް، އެ ކުންފުނީގެ ނަމާއި އަހަރެންގެ ނަން ވަނީ ގުޅިފައެވެ. އެހެންގޮތަކަށް ބުނާ ނަމަ، އޭރު މީހުންނަށް އަހަރެން އެންމެ ބޮޑަށް އެނގެމުން ދިޔައީ ވެސް އަހަރެން އަދާކުރި އެ ވަޒީފާއިންނެވެ. އަހަންނަށް ވަޒީފާގައި ކުރިއެރުން ލިބި، މާލީ ގޮތުން ވެސް އަހަންނަކީ ވަރަށް ފޯރާ މީހަކަށްވިއެވެ.
އަހަރެން ދެން ގުޅުނީ ސިޔާސީ މައިދާނާއެވެ. ވަޒީފާގައި އުޅެމުން، ރާއްޖޭގެ އެންމެ ބޮޑު އެއް ސިޔާސީ ޕާޓީގައި އަހަރެން ފުރަތަމަ މަސައްކަތް ކުރީ އެ ޕާޓީގެ އެކްޓިވިސްޓެއްގެ ގޮތުގައެވެ. މީހުންނާ ހަމައަށް އަހަރެންގެ ފިކުރުގެ އަޑު އިއްވާކަށް މާބޮޑު ދަތިކަމަކަށް ނުވިއެވެ. ކުރިން ވެސް އަހަންނަކީ މީހުންގެ ތެރޭގައި ނަން މަޝްހޫރު ވެފައިވީ މީހަކަށް ވުމުން، އަހަރެން ދައްކާ ވާހަކަތަކާއި ކުރާ ޢަމަލުތަކާއި އަދި ބައެއް ފަހަރު މީސް މީޑިއާގައި ޖަހާ ޕޯސްޓުތައް ވެސް ޚަބަރުތަކުގެ ފަލަ ސުރުޙީއަށް އަރަމުން ދިޔައެވެ. ނަތީޖާއެއްގެ ގޮތުން އަހަރެން ތާއީދުކުރި ސިޔާސީ ޕާޓީން ވެސް އަހަންނަށް މަތީ މަގާމު ލިބުނެވެ.
މި ހުރިހާ ކާމިޔާބީއަކާއި ފައިސާއަކާއެކު ވެސް، އަހަރެންގެ ޙަޔާތް އެހާ އުފާވެރިއެއް ނޫނޭ ބުނުމުން، ގިނަ މީހުންނަށް އެ ވާހަކަ ޤަބޫލެއް ނުކުރެވެއެވެ. ނަމަވެސް ހަގީގަތަކީ އެއީއެވެ. ވަޒީފާއާއި ޕާޓީގެ ކަންކަމުގައި އުޅޭއިރު އަހަރެންގެ މާޔޫސްކަން އަހަރެން ނުދެއްކި ނަމަވެސް، އެކަނިވާ ހިނދު އަބަދުވެސް އިނދެވެނީ ކޮންމެވެސް ކަމަކާ ވިސްނާށެވެ. ކޮންމެވެސް ކަމެއް މަދުވާކަމުގެ، ފުރިހަމަ ނުވާ ކަމުގެ އިޙުސާސް އަހަންނަށް ކުރެވެމުން ދިޔައެވެ. އަދި އެ ޚިޔާލުތަކުގައި އަހަންނަށް އެތައް އިރަކު ގެއްލިފައި ވެސް އިނދެވެން ފެށިއެވެ.
މާޔޫސްކަން މާ ބޮޑަށް އިތުރުވަމުން ދިޔުމުން، އަހަރެން ގަސްދުކުރީ އެކަމަށް ޙައްލެއް ހޯދާށެވެ. އޭރު ކުރަން އެންމެ ރަނގަޅު ކަމެއްގެ ގޮތުގައި ފުރަތަމަ ފެނުނީ ސައިކޭޓްރިސްޓަކަށް ދެއްކުމެވެ. އަހަންނަށް ވާ ގޮތްތައް ކިޔައިދިނުމުން އޭނާއަށް އެކަންކަން މާބޮޑަކަށް ވިސްނުންހެން ވެސް އަހަންނަކަށް ހިއެއް ނުވެއެވެ. އޭނާ ބުނީ އަހަރެން މާ ބުރަކޮށް އުޅޭތީ ކަމަށް ވެދާނެ ކަމަށެވެ. ނަމަވެސް ހަގީގަތުގައި އަހަރެން ކުރާ މަސައްކަތަކީ ބުރަ މަސައްކަތެއް ނޫނެވެ.
ޑޮކްޓަރީ ބޭހުން ފަރުވާއެއް ނުލިބުމުން އަހަރެންގެ ނަފްސާނީ ބަލިމަޑުކަން ދިޔައީ އިތުރުވަމުންނެވެ. ކުރަން ފެށި ފިކުރުތައް އިތުރުވެ، ވަޒީފާއަށް ވެސް ކޮންމެވެސް ވަރަކަށް އަސަރު ކުރަން ފެށިއެވެ. އެހެންކަމުން ގާތް އެކުވެރިއަކާ އެ ވާހަކަތައް ހިއްސާ ކުރީމެވެ. އޭނާ ދިން ނަސޭޙަތް ވެގެން ދިޔައީ އަހަރެންގެ މުޅި ދިރިއުޅުން ބަދަލު ކޮށްލަން އެޅުނު އަލިގަދަ އައްޔަކަށެވެ.
އެކުވެރިޔާ ބުނީ، އެ މާޔޫސްކަމަކީ އަހަރެން ދީނާ ދުރުވުމުގެ ސަބަބުން ލިބޭ މާޔޫސްކަމެއް ކަމުގައި އޭނާއަށް ވަރަށް ޤަބޫލު ކުރެވޭ ކަމަށެވެ. އެހެންކަމުން ދީނާ ގާތް ވުމަށް އޭނާ ނަސޭޙަތްތެރިވިއެވެ. އަދި ދީނާ ބެހޭ ގޮތުން އިތުރަށް އުނގެނުމަށް އޭނާ އަހަންނަށް ގޮތްތަކެއް ވެސް ދިނެވެ.
އަހަރެންގެ އެ އެކުވެރިޔާ މިހާރު ދުނިޔެއަކު ނެތެވެ. ނަމަވެސް އޭނާ ދިން ނަސޭޙަތް އަހަރެން އޭރު ވެސް އަޑުއެހީމެވެ. އެ ފޮތްތައް ކިޔުމަށް ފަހު، އިސްލާމްދީނާ ބެހޭ ގޮތުން ކުރިން އެނގުނު ވަރަށް ވުރެ ބޮޑަށް ޢިލްމު ލިބުނެވެ. އަދި ޝައުޤުވެރިކަން ވެސް އިތުރުވިއެވެ.
އެކިއެކި ދީނީ ޢިލްމުވެރިންގެ ދަރުސްތަކާއި ނަސޭހަތްތައް ވެސް އަހަރެން އަޑުއަހައި، ވީޑިއޯތައް ވެސް ބެލީމެވެ. އަހަރެންގެ މާޔޫސްކަން ފިލައި، އިސްލާމްދީނާ ބޮޑަށް ގާތް ވެވެން ފެށިއެވެ. ޤަވާއިދުން ނަމާދު ކުރަން ފެށީމެވެ. އަދި އަހަންނަށް ކުރެވެމުން ދިޔަ ކުދިބޮޑު ކުށްފާފަތައް ވެސް ވިސްނި، އެކަންކަމަށް ތައުބާވާނެ ހިތްވަރު ވެސް ލިބުނެވެ.
އަހަރެން ނިޔަތް ކަނޑައެޅީ އެ ހުރިހާ ކަމެއް ދޫކޮށްލާށެވެ. މިހާރު އަހަންނަކީ އެއްވެސް ތަނެއްގެ މަތީ މަގާމެއްގައި ހުރި މީހެއް ނޫނެވެ. ބާޒާރުގައި ގޮޅިއެއް ހިންގައިގެން، ޙަލާލް އާމްދަނީއަށް ހޯދައި، އަނބިދަރިންނަށް އެ ފައިސާއިން ހޭދަ ކުރާ، މާތް ﷲ ގެ އަޅަކީމެވެ. އެންމެ ހިނދުކޮޅަކަށް ވެސް އަހަރެންގެ ކުރީގެ ޙަޔާތާއި މަޤާމާއި ފައިސާތައް ދޫކޮށްލެވިގެން ދެރައެއް ނުވެއެވެ. މާތް ﷲ ގެ އިރާދަފުޅާއެކު މިހާރު އަހަންނަކީ އުފަލުގައި އުޅޭ ހެޔޮލަފާ އަޅަކީމެވެ. ދުނިޔެވީ ޙަޔާތަށްވުރެ އަހަންނަށް މުހިންމީ އުޚްރަވީ ޙަޔާތެވެ.
