ކުރު ވާހަކަ: ފިރިމީހާ
އަހަރެންގެ ފިރިމީހާ އެއީ އަހަރެންގެ މައިންބަފައިންނަށް ފަހު މިދުނިޔޭގައި ހުރި އަހަރެން އެންމެ ލޯބިވި ފަރާތެވެ. އަހަރެން އެންމެ އިތުބާރުކުރި ފަރާތެވެ. އެމީހަކަށް ޓަކައި އަހަރެންގެ ޖާނާއިމާލުން ޤުރުބާންވާން ތައްޔާރަށް ހުރި ފަރާތެެވެ. އަހަރެން އޭނާއާ ކައިވެނި ކުރީ މައިންބަފައިންގެ އެދުމުގެ މަތިން ނަމަވެސް ކައިވެންޏަށް ފަހު އަހަންނަށް އޭނާ ދެކެ އިންތިހާއަށް ލޯބިވެވުނެވެ. އޭނާގެ ފަރާތުން އަހަންނަށް ލިބެމުން ދިޔަ ލޯތްބާއި އަޅާލުމާއި އޯގާތެރިކަމުގެ ސަބަބުން އަހަރެންގެ މި ހިތް އޭނާގެ މައްޗަށް ލެނބުނީ އެއްވެސް އިޚްތިޔާރެއް ނެތިއެވެ. އަހަންނަށް އެންމެ ކަމުދިޔައީ އޭނާގެ ހުންނަ ހިތްހެޔޮ މަޑުމައިތިރި މިޒާޖެވެ. އަހަރުމެން ދެމީހުން އުޅެމުން އައީ ވަރަށް ވެސް އުފާވެެރި ހަމަޖެހޭ ދިރިއުޅުމެކެވެ. ނަމަވެސް ކައިވެންޏަށް ފަސް އަހަރު ވާން ކުޑަ ދުވަސްކޮޅަކަށް ވެފައި ވަނިކޮށް ރަށުތެރޭގައި ފިރިމީހާއާ ގުޅުވައިގެން ވާހަކަތަކެއް ދައްކަން ފަށައިފިއެވެ. ފިރިމީހާއާ އެހެން އަންހެނުންނާ ގުޅުވައިގެން ދައްކާ ވާހަކަތަކެކެވެ.
އަހަރެންގެ ހިތުގައި ފިރިމީހާއަށް އޮތް އިތުބާރެއްގެ ބޮޑުކަމުން އެގޮތަށް ރަށުތެރޭގެ ދެކެވޭ ވާހަކަތައް އަހަރެންނަށް ގަބޫލެއް ނުކުރެވުނެވެ. އަހަރެން ކައިރީގައި އެފަދަ ވާހަކަތައް ދައްކާ ކޮންމެ މީހަކަށް އަހަރެން ރައްދު ދެމުން ގެންދިޔައީމެވެ. އެއިން ކޮންމެ މީހެއް ކައިރީގައި އަހަރެން އައީ ފިރިމީހާއަށް ވަރަށް އިތުބާރު ކުރާކަމަށް ބުނަމުންނެވެ. އަދި އެފަދަ މަންޒަރެއް ލޮލަށް ނުފެންނަހާ ހިނދެއްގައި ފިރިމީހާއަށް ކުރާ އިތުބާރު ނުކެނޑޭނެ ވާހަކަ އަހަރެން ބުނީމެވެ. އަހަރެން ފިރިމީހާއާ އެއްވެސް ސުވާލެއް ނުކުރަމެވެ. ސުވާލު ކޮށްފިނަމަ ފިރިމީހާ ދެރަަދާނެތީއެވެ. އަހަރެމެން ދެމަފިރިން ދެމެދުގައި އޮތް ސާފު ލޯތްބަށް އަހަރެން ޝައްކުކުރާހެން ފިރިމީހާއަށް ހީވެދާނެތީއެވެ. ނޫނީ އެކަމުގެ ސަބަބުން އަހަރުމެން ދެމަފިރިންގެ ގުޅުމަށް ބަދަލެއް އައިސްދާނެތީއެވެ. އެހާ ވަރަށް އަހަރެން ހިތުގައި ފިރިމީހާއަށް ޓަކައި ޔަގީންކަން އޮތަސް އަހަރެން ހިތުގައި ނުތަނަވަސްކަމެއް އުފެދެން ފަށައިފިއެވެ. އެކިކަހަލަ ނުބައި ވަސްވާސްތަކުން އަހަރެންގެ ހިތާއި ސިކުނޑިއަށް އުނދަގޫ ކުރަމުން ގެންދިޔައެވެ.
އަހަރެންނަކީ އެއްވެސް އިރެއްގައި ގިނަ ވަގުތު ގެއިން ބޭރުގައި އުޅޭ މީހެއް ނޫނެވެ. ގޭގައި އިނދެގެން އާމްދަނީ ހޯދުމަށް އަހަރެން ކުރާ މަސައްކަތަކީ މީހުންނަށް އަގަށް ފަހައިދިނުމެވެ. އެހެން ނަމަވެސް ފިރިމީހާއަކީ ރަށުގައި ފިހާރައެއް ހުޅުވައިގެން އުޅޭ މީހަކަށް ވާތީ ގިނަ ވަގުތު އޭނާ ހޭދަކުރަނީ ގެއިން ބޭރުގައެވެ. ނުވަތަ ފިހާރައިގައެވެ. ގެއިން ބޭރުގައި ގިނަ ވަގުތު އުޅުނަސް ފިރިމީހާ އަހަރެންނަށް ގުޅައިގެން ވާހަކަދައްކައެވެ. އަހަރެން ކައިގެން ހުރިތޯ ބަލައެވެ. ފިރިމީހާގެ އެ އޯގާތެރިކަން އަހަރެންގެ ހިތުގައި އޭނާއަށް އޮތް ލޯބި އިތުރަށް ވަރުގަދަ ކުރުވައެވެ. ދުވަހަކު ވެސް އަހަރެންގެ ފިރިމީހާ އަހަރެންނަށް ބޭވަފާތެރި ވެދާނެކަމަށް ހިއެއް ނުކުރަމެވެ. ނަމަވެސް އަހަރެން އޭނައަށް ކުރަމުން އައި އިތުބާރަށް ލޮޅުމެއް އައީ އެއްރޭ އަހަރެންނަށް ފެނުނު މަންޒަރަކުންނެވެ. އެރޭ އަހަރެން ބޭރަށް ނިކުތީ އަހަރެން ފެހި ހެދުމެއް ރައްޓެއްސަކާ ހަވާލު ކުރުމަށެވެ. ރަށު އަތިރިމަތީގައި ހުންނަ ގެއެއްގެ ކައިރިން ހުރަސް ކުރި ވަގުތު އަހަންނަށް ފެނުނީ ބޮޑުގަހެއްގައި އެލުވާފައިވާ އުނދޯއްޔެއްގައި އަހަރެންގެ ފިރިމީހާގެ އުނގުތެރޭގައި ޝަޒްނާ އިންދައެވެ. ޝަޒްނާއަކީ ފިރިހެނުން ހިތި އަންހެނެކެވެ. ޝަޒްނާގެ ވިޔާނުދާ ވާހަކަ އެއީ މުޅި ރަށަށް މަޝްހޫރު ވާހަކައެކެވެ. އެކަހަލަ އަންހެނެއްގެ މަޅީގައި އަހަރެންގެ ފިރމީހާ ޖެހިދާނެކަމަކަށް އަހަރެން ހިއެއް ނުކުރަމެވެ. އެ މަންޒަރު ފެނުމާއެކު އަހަރެންގެ ފައިދަށުން ބިންގަނޑު ދެމިގެން ދިޔަކަހަލަ އިހުސާސެއް ކުރެވުނެވެ. ނުފެންނަ އަތަކުން މޫނު މަތީގައި ވިހެލިހެން ހީވިއެވެ. އެކި ދުވަސްމަތިން މީހުން އަހަރެން ކައިރީގައި ދައްކާފައި ހުރި ވާހަކަތައް ކަންފަތްދަށުގައި ގުގުމަން ފަށައިފިއެވެ. ބޮލަށް އެނބުރުން އަރައިގެން ދިޔަހެން ހީވުމުން ގަހަކުން އެލިފައި އޮތް އޮފިކޮޅެއްގައި ހިފުނެވެ. އެމަންޒަރަށް ބަލަަން ހުންނަހާ ހިތްވަރެއް އަހަރެންނަށް ނުލިބުނެވެ. ދެމީހުން ކައިރިއަށް ހުއްޓިފައި ހަޅޭއްލަވައި ގަންނަން ހިތަށް އެރި ނަމަވެސް އެ ހިތްވަރެއް ވެސް އަހަރެންނަށް ނުލިބުނެވެ. ދެފައިން ވާގި ދޫވެފައިވާ ހާލު އަހަރެން އައިކޮޅަށް ދިއުމަށް ހިނގައިގަތީމެވެ.
ގެއަށް އައިސް އަހަރެންނަށް ވަރަށް ރޮވުނެވެ. ދުވަހަކުވެސް ހިތްދަތި ނުވާ ވަރަށް ހިތުގައި ޖެހިއްޖެއެވެ. ރަށުތެރޭގައި ދެކެވުނު ވާހަކަތަކަކީ ހައްޤު ތެދު ވާހަކަތަކެއްކަން ޤަބޫލު ކުރުވުނެވެ. އަހަރެން ވަރަށް ވިސްނީމެވެ. އެހެން އަންހެނުން ފަދައިން ކޯޓަށް ގޮސް ވަރިވާކަށް އަހަރެން ބޭނުމެއް ނުވިއެވެ. އަހަރެންނަށް ވިސްނުނު ގޮތުގައި އަހަރެންގެ ފިރމީހާ އެހެން އަންހެނެއް ކައިިރިއަށް ދާން ޖެހުނީ އަހަރެންގެ ހުރި ކޮންމެވެސް ނުކުޅެދުންތެރި ކަމެއްގެ ސަބަބުންނެވެ. ނޫނީ އަހަރެންގެ ހުރި ކޮންމެ ވެސް ކަމުނުދާ ސިފަތަކެއްގެ ސަބަބުންނެވެ. އެތައް އިރަކު ވިސްނައިފައި އަހަރެންގެ ހިތް ގޮތެއް ނިންމިއެވެ. އަހަރެންގެ ފިރިމީހާ ހަމަ މަގަށް އެޅުވުމަށެވެ. ފިރިމީހާގެ ހިތުގައި ހަމައެކަނި އަހަރެން ރަސްކަން ކުރުމަށެވެ. އެކަމަށްޓަކައި ކޮންމެފަދަ ގުރުބާނީއެއް ވާން ޖެހުނަސް އަހަރެންގެ ފަރުވާލެއް ނެތެވެ.
އެ ދުވަހުގެ ފަހުން އަހަރެންގެ ދިރިއުޅުން މުޅިން ބަދަލުކޮށްލީމެވެ. ކޮންމެ ނަމާދެއްގެ ފަހަތުގައި އަހަރެންގެ ވެރި ރައްބަށް ދުއާ ކުރަމުން ދިޔައީމެވެ. އަހަރެންގެ ފިރިމީހާއަށް ހެޔޮ ވިސްނުން ދެއްވުމަށެވެ. ޝައިޠާނީ ލޯތަކުން އަހަރެމެންގެ ދިރިއުޅުން ސަލާމަތް ކުރައްވައި ބަރަކާތް ލެއްވުމަށް އެދިއެވެ. ފިރިމީހާ އާ އަހަރެން ބައްދަލުކުރަމުން ދިޔައީ އެއިން އެއްވެސް ކަމެއް އަހަރެންނަށް އެނގުނުކަމަށް ނަހަދައެވެ. ލޯތްބާއި އޯގާތެރިކަމާއެކު ފިރިމީހާގެ ހުރިހާ ކަމެއް އަހަރެން ކޮށްދެމުން ދިޔައިމެވެ. އެކަމަށް ޓަކައި އަހަރެން ޖެހުނީ ދިރިއުޅުމަށް ވަރަށް ބޮޑެތި ބަދަލުތައް ގެންނާށެވެ. ފިރިމީހާއަށް މީރު ކާނާ ތައްޔާރުކޮށް، އޭނާ އެންމެ ހިތްހަމަޖެހޭ ގޮތަށް ހެނދުން އެޅުމާއި އަބަދު ރީތިވެލައިގެން ހުރުމެވެ. ހަށިގަނޑުގައި މަސްޖަހާ ކުރިއަށް ވުރެ ފަލަވެފައި ހުރުމުން ގަވައިދުން ކަސްރަތުކުރަން ފެށީމެވެ. ކެއުމުގެ ވައްޓަފާޅިއަށް ބަދަލު ގެނައީމެވެ. ފިރިމީހާ ފިހާރައިގައި އިންނަ ވަގުތު ފިހާރައަށް ގޮސް ފިރިމީހާއާއެކު ވަގުތު ހޭދަކުރަން ފެށީމެވެ. ހުރިހާ ވަގުތެއް ފިރިމީހާއަށް ޓަކައި ހުސްކުރީމެވެ. އަހަރެމެންގެ އަމިއްލަ ދިރިއުޅުމުން ކުޑަ ޗުއްޓީއެއް ނަގައިގެން އެކި އެކި ރަށްރަށަށް ދަތުރުކުރީމެވެ. އަހަރެންގެ އެންމެ ބޮޑު އަމާޒަކަށްވީ ދަރިއަކު ހޯދުމެވެ. ދަރިއަކު ހޯދުމަށްޓަކައި ކުރަމުންދިޔަ މަސައްކަތަކަށް ކުރިއެރުމެއް ނުލިބުނެވެ. އެކަމަށް އެދި އަހަރެން ﷲ ގެ ހަޟްރަތަށް ދުޢާ ދެންނެވީމެވެ. އަދި ފިރިމީހާއަށް ވެސް އެގޮތަށް ކަންތައް ކުރުމަށް ނަޞޭހަތްތެރިވީމެވެ. އެގޮތުގައި ދުވަސްތައް ފާއިތުވަމުން ދިޔައެވެ. ފިރިމީހާ ކުރިއަށްވުރެ ވެސް ބޮޑަށް އަހަރެންނަށް އޯގާތެރިވާން ފެށިއެވެ. ބޭރުގައި އުޅޭ ވަގުތު މަދުކޮށް ގިނަވަގުތު އަހަރެންނާއެކު ހޭދަކުރަން ފެށިއެވެ. އަހަރެން ކުރަމުން އައި މަސައްކަތް ކާމިޔާބުވާހެން ހީވުމުން އަހަރެން ﷲ ތަޢާލާއަށް ހަމްދުކޮށް އެކަމާ އުފާކުރީމެވެ.
ދެމަފިރިންގެ އުފަލަކަށް ކައިރި ރަށަކަށް ދިޔައީމެވެ. އަހަރުމެން މަޑުކުރީ ގެސްޓް ހައުސްއެއްގައެވެ. ރިސެޕްޝަނުގައި އިނީ ތަންކޮޅެއް އުމުރުން ދޮށީ އަންހެނެކެވެ. ހިތްހެޔޮ މަޖާ މިޒާޖެއްގެ އަންހެނެކެވެ. އަހަރުމެންނާ ވަރަށް ވާހަކަ ދެއްކިއެވެ. އަދި ރަށުގައި ހުރި ރީތި ތަންތަނުގެ ވާހަކަ ކިޔައިދިނެވެ. ރަށު މީހުންގެ ހިތްހެޔޮކަމުގެ ވާހަކަތަކާ ދުނިޔޭގެ އެކި ކަހަލަ ވާހަކަތައް ދެއްކިއެވެ.
އެއީ ގެސްޓްހައުސްގައި ތިންވަނައަށް ވީ ރެއެވެ. އެރޭ ވަރަށް ދަންވި ފަހުން އަހަންނަށް ހޭލެވުނެވެ. ކައިރީގައި ފިރިމީހާ ނެތްކަން އެނގުނު ހިނދު ފާހާނާއާ ދިމާލަށް ބަލައިލެވުނެވެ. ފާހަނައިގައި ފިރިމީހާ ނެތްކަން އެނގުނީ ސުވިޗު ނުޖައްސައި ހުރުމުންނެވެ. އެހާ ދަންގަޑިއެއްގައި ފިރިމީހާ ދިޔައީ ކޮންތަނަކަށް ބާއޭ ހިތަށް އެރިއެވެ. އެނދުން ތެދުވެގެން ގޮސް ކޮޓަރިން ބޭރަށް ބޯދިއްކޮށްލީމެވެ. ފިރިމީހާ ހުރިތޯ ދެކޮޅު ހޯދައި ބަލައިލީމެވެ. އެއްދިމާލަކުން ވެސް ނުފެނުމުން ސިޑިން ތިރިއަށް ފައިބަން ފެށީމެވެ. ދެ ހަރުފަތް ހުރަސް ކޮށްލިތަނާހެން ފެނުނު މަންޒަރުން އަހަރެން ހުރި ތަނަށް ގަނޑުވިއެވެ. އަހަރެންގެ ފިރިމީހާގެ އަތުތެރޭގައި ހުރި އަންހެނަކީ ރިސެޕްޝަނުގައި އިން އަންހެންމީހާއެވެ. އިތުރަށް ބަލަން ހުންނާކަށް އަހަރެންނަށް ކެތެއް ނުވިއެވެ. މި ފަހަރު ވެސް އަހަރެން އެނބުރުނީ އައިކޮޅަށް ދިއުމަށެވެ. މި ހުރިހާ ދުވަހު އަހަރެން ކުރަމުން އައި އުންމީދުތައް ފުނޑުފުނޑުވިއެވެ. ފިރިމީހާއަށް ކުޑަވެސް ބަދަލެއް ނާންނަކަން އަހަރެންނަށް އެނގުނެވެ. ހިތަށް ކެތްނުވާވަރު ވުމުން ނަމާދަށް އެރީމެވެ. ކެތްތެރިކަން ދެއްވުމަށް އެދި ﷲ ގެ ހަޟްރަތަށް ދުޢާ ދެންނެވީމެވެ. އަހަރެން އުންމީދު ކަނޑައެއް ނުލަމެވެ. ކުރިން ކުރަމުން އައި މަސައްކަތް ދެގުނައަށް އިތުރު ކުރީމެވެ. އަހަރެންގެ ފަރާތުން ފިރިމީހާއަށް ކޮށްދެވެން އޮތް ހުރިހާ ކަމެއް އޭގެ އެންމެ ރަނގަޅު ގޮތުގައި އަހަރެން ކޮށްދެމުން ދިޔައީމެވެ. ކުޑަވެސް ޝަކުވާއެއް ކުރާނެ ފުރުސަތެއް ނުދެމެވެ. ކުރިއެކޭ އެއްގޮތަށް ފިރިމީހާ އަހަރެންނަށް އަޅައިލައެވެ. އަހަރެން ދެކެ ލޯބިވާވަރު ބުނެދެއެެވެ. އަހަރެންނާއެކު ގިނަ ވަގުތުތަކެއް ހޭދަކުރަމުން ދިޔައެވެ. އަހަރެން ވެސް އުންމީދު ކުރަމުން ދިޔައީ ކޮންމެވެސް އެއް ދުވަހަކުން ފިރިމީހާ ބަދަލުވެ ހެޔޮ މަގަށް ރުޖޫއަވާނެ ކަމަށެވެ.
އެއްރެއަކު އަހަރެމެން ރައްޓެއްސެއްގެ ކައިވެނި ޕާޓީއަކަށް ދިޔައިީމެވެ. ފިރިމީހާ އޭނާގެ ރަޙުމަތްތެރިންނާ އެކު މަޝްއޫލުވާން ފެށުމުން އަހަރެންވެސް އޭނައަށް ވަގުތު ދިނުމަށް ފަހު އަހަރެންގެ ރަޙުމަތްތެރިން ކައިރިއަށް ޖެހިލީމެވެ. އިރުކޮޅަކު ރައްޓެހިންނާ ވާހަކަ ދައްކަން ހުރުމަށް ފަހު ފިރިމީހާ ކޮބައިތޯ ބަލައިލިއިރު ފެންނާކަށް ނެތެވެ. އަހަރެންގެ ހިތުގައި ބިރުވެރިކަމުގެ ރާޅެއް ދުވެލިއެވެ. ތަފާތު އެކި ޝައްކުތަކާ ވަހުމްތަކުން ހިތަށް އުނދަގޫވާން ފެށިއެވެ. އަވަސްވެފައިވާ ހިތާ އެކު ފިރިމީހާ ހޯދެން ފެށުނެވެ. ހޯލުން ބޭރުގައި އޭނާގެ ރަޙުމަތްތެރިންނާ ވާހަކަ ދައްކަން ހުރިތަން ފެނި އަހަރެންނަށް ހިތްހަމަޖެހުމުގެ ނޭވައެއް ލެވުނެވެ. އެނބުރި އެތެރެއަށް ދާން ހިނގައިގަތް ވަގުތު ފިރިމީހާ ބުނެލި ޖުމްލައެއް އިވިފައި އަހަރެން ހުއްޓުން އެރިއެވެ. އެމީހުންނަށް ނުފެންނާނެހެން އެއްކައިރިއަކަށް ޖެހިލާ އެތަނުގައި ދެކެވެމުން ދިޔަ ވާހަކަތަކަށް ސަމާލުވެލީމެވެ.
" ހީވަނީ ޝާލިޔާއަށް ޝައްކުވެއްޖެހެން... އެހެންވެ މިހާރު ބަލަނީ ވީހައި ވެސް ގިނަވަގުތު އޭނައާ އެކު ހޭދަ ކުރެވޭތޯ... " އަހަރެންގެ ފިރިމީހާ ބުނެލި އަޑުއިވުނެވެ. އަހަރެންނަށް ހުރެވުނީ ނޭވާ ހިފަހައްޓައިލައިގެންނެވެ.
" ކަލޭ ތިއުޅޭ ގޮތެއް ދޯ މުނާޒް. އަނބިމީހާ އެހާ ވަފާތެރިއިރު ވެސް އޭނައަށް ވަފާތެރިކަން މަތީ ހުންނާކަށް ނޭނގުނެއްނު.. މިހާރު މިރަށު ނުހުންނާނެ ކަންނޭނގެ ކަލޭ ރައްޓެހިނުވާ އަންހެނެއް... " އެތަނުން އެހެންމީހަކު ބުންޏެވެ.
" ކަލޭތީ މާރީތި މީހެއް ނޫނޭ ތި ވާހަކަދައްކަން... ކިީއްކުރާނީ ރީތި ކުދިން ފެނުނީމަ ނޭނގެ ވާގޮތެއް ވެސް... އަހަރެންނަށް އެންމެ ކަމުދަނީ ޝަޒްނާ... މަލްހާއާ ސިޔަރާ ވެސް އެހާ ސަޅި... އަދި މިހާރު މިގެންގުޅެނީ މާ ފައްކާ މަންޖެއެއް... އެނގެއެއްނު މޫސަބެގެ އާލިޔާ... ހެހެހެ..." ފިރިމީހާ ބުނި އަޑު އިވުނެވެ. އެއާ އެކު އެތަނުގައި ތިބި ފިރިމީހާގެ އެކުވެރިން ހޭންފެށި އަޑު އިވުނެވެ. އަހަރެންގެ ހިތް ކަތިލެވުނު ފަދައެވެ. ދެލޮލުން ކަރުނަ އޮހޮރެން ފެށީ ކުޑަ ހިނދުކޮޅެއްގެ ތެރޭގައެވެ. އެރޭ އަހަރެންނަށް ވިސްނުނެވެ. ބައެއް ފިރިން އެހެން އަންހެނުން ކައިރިއަށް ދަނީ އޭނާގެ އަނބިމީހާގެ ހުންނަ އުނިކަމަކުން ނުވަތަ ނުކުޅެދުންތެރި ކަމަކުން ނޫނެވެ. ބައެއް ފިރިހެނުންނަށް އަން ކިޔަފިއްޔާ އަންނާރެއް ވެސް ހެވެވެ. އަނބިމީހާ ކިތަންމެ ރީތިވެފައި ވަފާތެރި ނަމަވެސް ބައެއް ފިރިހެނުން ދާން ބޭނުން އަންހެނެއް ކައިރިއަށް ދާނެއެެވެ. ބައެއް ފިރިހެނުންނަކީ އަންހެނުން ހިތި ބައެކެވެ. ކިތަންމެ ވަރަކަށް ލިބުނަސް ހިތެއް ނުފުރޭނެއެވެ.
އެރޭ ގެއަށް އައިސް ފުރަތަމަ ފަހަރަށް އަހަރެން އެހެން ގޮތެއް ނިންމީމެވެ. ބޮޑު ނިންމުމަކަށް ވާތީ އިސްތިޚާރާ ނަމާދު ވެސް ކުރީމެވެ. އޭގެ އަނެއް ދުވަހު އަހަރެން ފިރިމީހާ އާ ވާހަކަދެއްކީމެވެ. އަހަރެންގެ ހިތުގައިވި ހުރިހާ ޝަކުވާއެއް ބޭރުކުރީމެވެ. ފިރިމީހާގެ އޭނާގެ ދިފާއުގައި އެއްވެސް އެއްޗެއް ނުބުނެއެވެ. އެދުވަހު އަހަރެން އެގެއިން ނިކުމެގެން ދިޔައީ ދެން ބައްދަލު ކުރާނީ ކޯޓުން ކަމުގައި ބުނަމުންނެވެ.
އަހަރެންގެ ނިންމުމާ މެދު މިއަދު އިންތިހާއަށް އުފާ ކުރަމެވެ. އެކަހަލަ ވިޔާނުދާ ފިރިއެއްގެ ކިބައިން ސަލާމަތް ވީތީއެވެ. އެކައިވެންޏަށް ދަރިއަކު ނުދެއްވި ކަމީ ވެސް ﷲ ތަޢާލާ އަހަރެންނަށް ދެއްވި ނިޢުމަތެކެވެ. ކޮންމެ ކަމެއް ވެސް ވާނީ އެންމެ ރަނގަޅަށް ކަން އެދުވަހު އަހަންނަށް ވިސްނުނެވެ. އަހަރެންގެ ދުޢާ އަކީ އެފަދަ ފިރިންގެ ކިބައިން ހިތްދަތިކަން ތަޙައްމަލު ކުރަމުންދާ ނިކަމެތި އަނބިންނަށް ކެތްތެރިކަން ދެއްވާ ސާބިތުކަން ދެއްވުމެވެ. އަދި އެފަދަ އަނބިންނަށް ކާމިޔާބު ދެއްވާ ރަނގަޅު ގޮތް މެދުވެރި ކޮށްދެއްވުމެވެ.
ނޯޓް: މިއީ މި ރަމަޟާން މަހަށް "ދެން"އިން ހުޅުވާލި ކުރުވާހަކަ ލިޔުމުގެ މުބާރާތަށް ހުށަހެޅި ވާހަކައެކެވެ. މިވާހަކަ ލިޔެފައި ވަނީ އައްޒަ މުޙައްމަދެވެ. ވާހަކަ ހުށަހެޅުމަށް، [email protected] އަށް މެއިލް ކުރައްވާށެވެ.
ވަރަށް ސަޅި ވާހަކައެއް
ވަރަށް ފުރިހަމަ. ޥާހަކަ ލިޔުންތެރިޔާ އަށް އައްސަރިބަހާ ސާބަސް
ޥަރަށް ހިތް ގައިމު ވާހަކައެއް. ޥާހަކަ ލިޔުންތެރިޔާ އަށް އައްސަރިބަހާ ސާބަސް
ވަރަށް ފުރިހަމަ، ވަރަށް ރީތި ވާހަކައެއް. މާޝާالله ️