އޭލެވެލް އިމްތިހާނުގެ ފިޒިކްސް ޔުނިޓް-1ގެ ޕޭޕަރު ލީކުވެއްޖެ

މިއަހަރުގެ އޭލެވެލް އިމްތިހާނުގެ ފިޒިކްސް ޔުނިޓް-1ގެ ޕޭޕަރު ލީކުވެފައިވާ ކަމަށް އިތުބާރު ހުރި މަސްދަރަކުން މައުލޫމާތު ލިބިއްޖެއެވެ.

Ads by STELCO

މައުލޫމާތު ލިބިފައިވާ ގޮތުގައި ލީކުވެފައި ވަނީ ޕޭޕަރުގެ ސްކޭން ކޮޕީއެކެވެ. އަދި ޕޭޕަރުގެ ކޮޕީ ލީކުވެފައި ވަނީ މިއަދުގެ ހެނދުނުގެ ވަގުތެއްގައެވެ. ނަމަވެސް ޕޭޕަރު ލީކުވެފައި ވަނީ ކޮން ގައުމެއްގައި ކަމެއް އަދި ސާފުވެފައެއް ނުވެއެވެ.

މި ޕޭޕަރު މިއަދުގެ ހެނދުނުގެ ވަގުތެއްގައި ލީކުވީ އިރު މި ޕޭޕަރު އޮތީ މިއަދުގެ މެންދުރު 2:00ގައެވެ. އަދި މި ނޫނަސް އެހެން ވެސް އޭލެވެލް އިމްތިހާނު ކަރުދާސްތައް ލީކުވެފައިވާ ކަމަށް މައުލޫމާތު ލިބެއެވެ.

މިކަމާ ގުޅިގެން އެޑިއުކޭޝަން މިނިސްޓަރުގެ ނައިބު މުހައްމަދު އިހުސާނާ ހަވާލާދީ އޮންލައިން ނޫސް ވަގުތުގައި ބުނެފައިވަނީ އެފަދަ އަޑުތަކެއް ފެތުރިފައިވާ ކަމަށާއި އެކަން މިނިސްޓްރީގެ ސަމާލުކަމަށް އައިސްފައިވާ ކަމަށެވެ. އަދި އެކަމާ ގުޅިގެން ބަލަން ޖެހޭ ކަންކަން ބަލަމުންދާ ކަމަށް އިހުސާން ވިދާޅުވި ކަމަށް އެ ނޫހުން ރިޕޯޓް ކޮށްފައިވެއެވެ.

މީގެ އިތުރުން އެ ޕޭޕަރު ލީކުވެފައި ވަނީ ރާއްޖޭގައި ނޫން ކަމަށާއި އެފަދަ ކަމެއް ރާއްޖޭގައި ހިނގާފައި ނުވާނެ ކަން ޔަގީން ކަމަށް ވެސް އިހުސާން ވަނީ ވިދާޅުވެފައެވެ.