މިއަދު އެއް ބަޔަކު ރޯދަ ވީއްލީވެސް ވެކްސިން ޖަހަން ކިޔޫގައި ތިބެގެން
ކޮވިޑް-19 އިން ރައްކާތެރިވުމަށް މިރޭ ވެސް ވަރަށް ދިގު ކިޔޫއެއް ހަދައިފިއެވެ.
އެނގިފައިވާ ގޮތުގައި ސޯޝަލް ސެންޓަރަށް ވެކްސިން ޖަހަން ދިޔަ މީހުން މިއަދު ހަވީރު ފަހެއް ވެސް ނުޖަހަނީސް ވަނީ ކިޔޫއަށް އަރައިފައެވެ. ރޯދަ ވީއްލަން ތަކެތި ވެސް ހިފައިގެން ގޮސް، އެ މީހުން މިއަދު ރޯދަ ވީއްލީވެސް ކިޔޫގައި ތިބެގެން ކަމަށް ވަނީ މައުލޫމާތު ލިބިފައެވެ.
ދެ ކިޔޫއެއް އެސަރަޙައްދުގައި ހަދާފައިވާއިރު، ރަސްފަންނު ޕެވިލިއަންއާ ހަމައަށް ދަމާލާފައި އޮތް ކިޔުގައި ތިބީ ބިދޭސީންނެވެ. އަދި ސޯޝަލް ސެންޓަރުގެ އަނެއް ފަރާތުގައި ދިވެހިންގެ ކިޔ އެއް އޮތް ކަމަށާއި އެ ކިޔު ތަންކޮޅެއް ކުޑަކަމަށް، އެ ސަރަޙައްދުގައި އެވަގުތު ހަރަކާތްތެރިވި ސަން އޮންލައިންގެ ނޫސްވެރިއަކު ވަނީ މައުލޫމާތު ދީފައެވެ.
ވެކްސިން ޖަހަން ފަށަނީ ރޭގަނޑު 9:00 ގައި ކަމަށްވާއިރު، އެހާ ކުރިން މީހުން ކިޔޫ ހެދީ ވެކްސިން ހުސްވެދާނެ ކަމުގެ ބިރަށް ކަމަށް ކިޔޫގައި ތިބި ބައެއް މީހުން ވަނީ މައުލޫމާތު ދީފައެވެ. އެމީހުންނަކީ ވެކްސިންގެ ދެވަނަ ޑޯޒް ޖަހަން ގޮސް ތިބި މީހުން ކަމަށް ވެސް ބުނެފައިވެއެވެ.
އެތަނުގައި ހުރި އެއް ބިދޭސީއަކު ބުނީ، ވެކްސިން ހުސްވާން އުޅޭކަމުގެ މައުލޫމާތު ލިބިގެން، މިއަދު ހަވީރު 4:30 ގައި ކިޔޫ އަށް އެރީ ކަމަށެވެ.
ގައިދުރުކަމެއް ވެސް ނުބަހައްޓާ މިހާރު ކޮންމެ ދުވަހަކުހެން ވެކްސިން ޖަހަން ގޮސްފައި ތިބޭ މީހުންގެ ކިޔޫ ދިގުކަމާއި ގުޅިގެން މީސްމީޑިއާގައި އެތައް ބަޔަކު އަންނަނީ ކަންބޮޑުވުން ފާޅުކުރަމުންނެވެ.
Ads by STO
