ސްޓޮކް ކޮށްފައި ހުރި ވެކްސިންގެ އަދަދު މަދު: މަބްރޫކް
ވެކްސިން ޕްރޮގްރާމްގައި ބޭނުން ކުރަން ރާއްޖޭގައި ހުރި ވެކްސިން ޑޯޒްގެ އަދަދު މަދުވެފައިވާ ކަމަށް ރައީސް އޮފީހުން ބުނެފިއެވެ.
ނެޝަނަލް އެމަޖެންސީ އޮޕަރޭޝަން ސެންޓަރު (އެންއީއޯސީ) އިން ރޭ ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަމުން ރައީސް އޮފީހުގެ ތަރުޖަމާން މުހައްމަދު މަބްރޫކް އަޒީޒު ވިދާޅުވީ ވެކްސިންގެ ސްޓޮކް މަދުވެފައިވާ ކަމަށް ހެލްތު މިނިސްޓްރީ އާއި ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އަންގާފައިވާ ކަމަށެވެ.
މީގެ އިތުރުން މަބްރޫކް ވިދާޅުވީ ކޮވިޑްގެ އަދަދުތައް ދުވަހެއް ދުވަހަކަށް މައްޗަށް ދާކަމަށާއި، ހޮސްޕިޓަލުތަކުގައި އެޑްމިޓު ކުރެވޭ މީހުންގެ އަދަދުތައް ވެސް މައްޗަށް ދާކަމަށެވެ. އަދި މިކަމުގެ ސަބަބުން ދެކެން ބޭނުން ނުވާ ދުވަހެއް އައިސްދާނެ ކަމަށް މަބްރޫކް ވިދާޅުވިއެވެ.
މީގެ އިތުރުން މަބްރޫކް ވިދާޅުވީ އެފަދަ ދުވަހެއް ނުދެއްކެވުމަށް ދުއާ ކުރައްވާ ކަމަށާއި އަދި ކޮވިޑް-19 ކޮންޓްރޯލު ކުރުމަށް ކުރާ މަސައްކަތްތައް ކާމިޔާބުވެ، އާންމު ހާލަތަށް ރުޖޫއަވެވި، ކުރިން ދީފައި ހުރި ލުއިތަކާއެކު އިތުރު ލުއިތައް ވެސް ދެއްވަން އުންމީދު ކުރައްވާ ކަމަށެވެ.
ކޮވިޑުން ރައްކާތެރިވުމަށް ވުމަށް ޖަހާ ވެކްސިންގެ ދެ ޑޯޒް ރާއްޖެއިން 108،000 މީހުން ފުރިހަމަ ކޮށްފިކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން ބުނެފައިވެއެވެ.
މާލެ ސަރަޙައްދުގައި އިއްޔެ ވެކްސިންގެ ފުރަތަމަ ޑޯޒް ޖަހައިފައި ވަނީ 383 މީހުންނެވެ. އަދި ދެވަނަ ޑޯޒް ޖަހައިފައި ވަނީ 2,221 މީހުންނެވެ. އަތޮޅުތެރެއިން އިއްޔެ ވެކްސިންގެ ފުރަތަމަ ޑޯޒް ޖަހައިފައި ވަނީ 295 މީހުންނެވެ. އަދި ދެވަނަ ޑޯޒް ޖަހައިފައި ވަނީ 3,684 މީހުންނެވެ.
ކޮވިޑުން ރައްކާތެރިވުމަށް ރާއްޖޭގައި މިހާރު ދެމުން ގެންދަނީ ތިން ވައްތަރެއްގެ ވެކްސިނެކެވެ. އެއީ އިންޑިއާއިން ހަދިޔާކުރި އަސްޓްރާޒެނެކާ ކޮވިޝީލްޑް ވެކްސިނާއި ޗައިނާއިން ހަދިޔާ ކޮށްފައިވާ ސިނޮފާމް ވެކްސިންގެ އިތުރުން ބަޔޮއެންޓެކް ފައިޒާ ވެކްސިނެވެ.
މީގެތެރެއިން ކޮވިޝީލްޑް ވެކްސިންގެ ފުރަތަމަ ޑޯޒް ދިނުން ނިންމައި މިހާރު ދެނީ ދެވަނަ ޑޯޒެވެ. ސިނޮފާމްގެ މިހާރު ދެނީ ފުރަތަމަ ޑޯޒާއި ދެވަނަ ޑޯޒެވެ. އަދި ފައިޒާ ވެކްސިން ދެނީ ރިސްކް ހައި މީހުން ފަދަ ޚާއްޞަ ފަރާތްތަކަކަށް އެކަންޏެވެ.
