ކޮވިޑް-19 ގެ ހާލަތު ގޯސްވެފައިވާތީ ރާއްޖެއަށް ވެކްސިން ލިބުން ދަތިވެއްޖެ: އެޗްޕީއޭ
ކޮވިޑް-19 އިން ރައްކާތެރިވުމަށް ރާއްޖެއަށް ވެކްސިން ލިބުން ދަތިވެފައިވާ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ހާމަ ކުރައްވައިފިއެވެ.
އެގޮތުން އެޗްޕީއޭއިން ވިދާޅުވެފައި ވަނީ ރާއްޖެއަށް ވެކްސިން ލިބުމުގައި ދަތިވީ ދުނިޔޭގައި މިވަގުތު ކޮވިޑް-19ގެ ހާލަތު ގޯސްވަމުން އަންނާތީ އާއި ވަކިން ހާއްސަކޮށް ވެކްސިން އެންމެ ގިނައިން އުފައްދާ އިންޑިއާގެ ހާލަތު ގޯސްވެފައި ވާތީ ކަމަށެވެ.
"އެހެން ގައުމުތަކެކޭ އެއްގޮތަށް ރާއްޖެއަށް ވެކްސިން ލިބުމުގައި ދަތިތަކެއް ކުރިމަތިވެފައިވޭ" މިކަމާ ގުޅޭގޮތުން އެޗްޕީއޭއިން ނެރުނު ބަޔާނެއްގައި ބުނެފައިވެއެވެ.
ރާއްޖެއަށް ވެކްސިން ލިބުން ދަތިވެގެން އެ އެެޖެންސީން މިއަދު ވަނީ އިންޑިއާއިން ހަދިޔާ ކުރި ކޮވިޝީލްޑް ވެކްސިން ދިނުން ވަގުތީ ގޮތުން މެދުކަނޑައިލައިފައެވެ. ނަމަވެސް އެމަޖެންސީ ހާލަތްތަކުގައި ބަލި ހާލު ހުންނަ ގޮތުން ވެކްސިން ޖަހަން ޖެހިއްޖެ ހާލަތެއްގައި ޖަހައިދޭނެ ކަމަށް ވެސް ބުނެފައިވެއެވެ.
އެޗްޕީއޭ އިން ބުނެފައި ވަނީ ވެކްސިން ލިބުން ދަތިވެފައިވީ ނަމަވެސް ކޮވިޝީލްޑް ވެކްސިންގެ އިތުރު ޝިޕްމެންޓެއް ހޯދުމަށް ސަރުކާރުން މަސައްކަތް ކުރަމުންދާ ކަމަށެވެ. އެގޮތުން ކުރިއަށް އޮތް ދެ ހަފްތާ ތެރޭގައި އިތުރު ބެޗެއް ލިބޭނެ އިންތިޒާމްތައް ހަމަޖެއްސުމުގެ މަސައްކަތް މިހާރު ވެސް ހިނގަމުންދާ ކަމަށް އެޗްޕީއޭއިން ބުނެފައިވެއެވެ.
