ރޭގަނޑު 21:00ގައި ބްރިޖު ބަންދު ކުރާނެ
ރޭގަނޑު ނުވައަކުން ފެށިގެން ސިނަމާލެ ބްރިޖް ބަންދުކުރާނެ ކަމަށާއި އޭގެ ކުރިން ދަތުރުތައް ނިންމުމަށް ފުލުހުން އިލްތިމާސް ކުރައްވައިފިއެވެ.
އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ސުޕްރިންޓެންޑެންޓް އޮފް ޕޮލިސް ޢަބްދުﷲ ޝަރީފް ވިދާޅުވީ ކާފިއު ވަގުތު ފެށުމާއެކު ބްރިޖް ބަންދު ކުރާނެ ކަމަށެވެ. އަދި ރޭގަނޑު ނުވައެއްގެ ފަހުން ބުރިޖްއިން ދަތުރުކުރުމުގެ ހުއްދަ ދެވޭނީ ހުއްދަ އޮތް ފަރާތްތަކަށް އެކަނި ކަމަށް ވެސް ޝަރީފް ވިދާޅުވިއެވެ.
ކޮވިޑް-19 ގެ ހާލަތުން ރައްކާތެރިވުމަށް އަޅަމުންދާ ފިޔަވަޅުތަކުގެ ތެރެއިން، 6 މެއި 2021 ގައި މާލެ ސަރަޙައްދުގައި (މާލެ، ހުޅުމާލެ، ވިލިމާލެ) ރޭގަނޑު 9:00 އިން ފަތިހު 4:00 އަށް ކާފިއު ހިންގުމަށް ނިންމައިފައި ވެއެވެ. ކާފިއު ވަގުތު ފެށުނު ނަމަވެސް މަގުތައް ހިމޭން ވަނީ އޭގެ އެތައް އިރެއް ފަހުން ކަމަށް ފުލުހުން ވަނީ ބުނެފައެވެ. އަދި އެގޮތަށް އަމަލު ނުކުރުމަށް ވެސް އާންމުންނަށް ފުލުހުން ވަނީ އިލްތިމާސް ކުރައްވާފައެވެ.
ކާފިޢުގެ ވަގުތުތަކުގައި ހިނގާބިނގާވެ އުޅުމާއި ދުއްވާ އެއްޗެހި ދުއްވުމަކީ މަނާކަމެއް ކަމަށާއި ޟަރޫރީ ބޭނުމަށާއި ޑެލިވަރީގެ ޚިދުމަތްތަކަށް ފުލުހުން ހުއްދަ ދޫކުރަމުން ގެންދާނެ ކަމަށް އެޗްޕީއޭއިން ވަނީ މީގެ ކުރިން ބުނެފައެވެ.
ރާއްޖޭގައި އަނެއްކާ ވެސް ކޮވިޑް-19 ގެ ހާލަތު ގޯސްވެ، ފައްސިވާ އަދަދުތައް ދަނީ އިތުރުވަމުންނެވެ. އެހެންކަމުން އަދަދުތައް ކޮންޓްރޯލް ކުރުމުގެ ގޮތުން ރައީސް އޮފީހާއި އެޗްޕީއޭ ގުޅިގެން ވަނީ ހަރުކަށި ފިޔަވަޅުތަކެއް އަޅާފައެވެ.
ފަހުން އެޅުއްވި ފިޔަވަޅުތަކުގެ ތެރޭގައި މި މަހުގެ 5 އިން 15 ގެ ނިޔަލަށް ސަރުކާރު އޮފީސްތައް ބަންދުކޮށް އޮންލައިންކޮށް މަސައްކަތްތައް ނިންމުމަށް ބަދަލު ކުރުމާއި، ސްކޫލްތަކުގެ ކިޔެވުން ވެސް އޮންލައިންކޮށް ކިޔަވައިދޭ ގޮތަށް ބަދަލު ކުރުމުގެ އިތުރުން، ވެކްސިންގެ ދެ ޑޯޒް ފުރިހަމަ ކުރުމުން ރަށްރަށަށް ދަތުރު ކުރެވޭ ގޮތަށް ދިން ލުއި މި މުއްދަތުގެ ތެރޭގައި މެދުކަނޑާލުން އަދި މިސްކިތްތަކުގައި ގައިދުރުކަން ބެހެއްޓުމާއި މާސްކު އަޅައިގެން ނަމާދު ކުރުން ހިމެނެއެވެ.
