އަނެއްކާވެސް އިންތިޒާރެއް: މޯބައިލް ޑޭޓާ އަގުހެޔޮ ވާނީ އޮކްޓޯބަރު މަހު

އިންޓަނެޓުގެ އަގުހެޔޮ ވާނެ ދުވަހަކަށް ރައްޔިތުން ކުރަމުން އަންނަ އިންތިޒާރަށް އަނެއްކާ ވެސް 4 މަސް ދުވަސް އިތުރު ވެއްޖެއެވެ.

Ads by Hajj Corporation

ނެޓު ހެޔޮ އިވެންޓުގެ ނަމުގައި މިއަދު ސަރުކާރުން އިންޓަނެޓުގެ އަގުހެޔޮ ކުރުމަށް ބޭއްވި އިވެންޓުގައި ހާމަ ކުރި ގޮތުގައި މޯބައިލް ޑާޓާގެ އަގުތަކަށް ބަދަލު އަންނާނީ އޮކްޓޯބަރު މަހުން ފެށިގެންނެވެ.

ޕްރިޕެއިޓް ޑޭޓާ އެލަވަންސް، ޕޯސްޓްޕެއިޑް ހަޔަރ ޑޭޓާ އެލަވަންސް އަދި ބްރޯޑްބޭންޑް ޕެކޭޖުތަކުގައި ލިބޭ އެލަވަންސްއަށް އެންމެ މަދުވެގެން 20 އިންސައްތައިގެ އިތުރުވުމެއް އަންނާނެ ކަމުގައި ވެސް ސަރުކާރުން ވަނީ ހާމަ ކޮށްފައެވެ.

މިހާރު ކުރިއަށްދާ ރަސްމިއްޔާތުގައި އިއުލާންކޮށްފައި ވަނީ އިންޓަނެޓްގެ އަގު ހެޔޮ ކުރުމަށް ހަމަޖެހިފައި ވަނީ ފޭސްތަކަކަށް ބަހާލައިގެން ކަމަށެވެ. އެގޮތުން ފުރަތަމަ ފޭސްގައި ފިކްސްޑް ބްރޯޑްބޭންޑްގެ އަގު ހެޔޮ ކުރުމަށް ފަހު މޯބައިލް ބްރޯޑްބޭންޑްގެ އަގު ހެޔޮ ކުރުމަށް ހަމަޖެހިފައި ވަނީ ދެވަނަ ފޭސްގައެވެ. އެގޮތުން ޖުލައި މަހު ފިކްސްޑް ބްރޯޑްބޭންޑުގެ އަގުހެޔޮ ކުރާއިރު މޯބައިލް ޑާޓާގެ އަގު ހެޔޮވާނީ އޮކްޓޯބަރު މަހުން ފަށައިގެންނެެވެ.

ފިކްސްޑް ބްރޯޑްބޭންޑްގެ ތްރޮޓޮލް ސްޕީޑް ދަށް ކުރެވޭނީ 2 އެމްބީޕީއެސްއަށް

އިންޓަރނެޓުގެ އަގުހެޔޮ ކުރެވުމާއެކު އިންޓަނެޓުގެ ތްރޮޓޮލް ސްޕީޑް އެންމެ ދަށް ކުރެވޭނީ 2 އެމްބީޕީއެސް އަށް ކަމަށް ވެސް ވަނީ ކަނޑައަޅައިފައެވެ.
ފިކްސްޑް ބްރޯޑްބޭންޑްގެ އަގުތަކަށް ގެނައި ބަދަލުތައް:
30 ޖީބީ ލިބޭނީ 250 ރުފިޔާއަށެވެ. އެއީ 5 އެމްބީޕީއެސްގައެވެ. މިޕެކޭޖްގެ ތްރޮޓްލް ސްޕީޑަކީ 2 އެމްބީޕީއެސްއެވެ.
100 ޖީބީ ލިބޭނީ 500 ރުފިޔާއަށެވެ. އެއީ 13 އެމްބީޕީއެސްގައެވެ. މި ޕެކޭޖްގެ ތްރޮޓްލް ސްޕީޑަކީ 5 އެމްބީޕީއެސްއެވެ.
200 ޖީބީގެ އަގަކީ 700 ރުފިޔާއެވެ. އެއީ 25 އެމްބީޕީއެސްގައެވެ. މި ޕެކޭޖްގެ ތްރޮޓްލް ސްޕީޑަކީ ވެސް 5 އެމްބީޕީއެސްއެވެ.

އިންޓަނެޓުގެ އަގުހެޔޮ ކުރުމަށް ސަރުކާރުން ވީ ވައުދުގައި މިހާރު މިވަނީ އިންޓަނެޓުގެ ހެޔޮ އަގު އިއުލާން ކުރެވިފައެވެ. ނަމަވެސް އަދިވެސް އިންތިޒާރަކަށް ނިމުމެއް ނާދެއެވެ. ފިކްސްޑް ބްރޯޑްބޭންޑްގެ އަގު ހެޔޮވުމަށް ބާކީ މަހެއް އޮތްއިރު މޯބައިލް ޑާޓާގެ އަގު ހެޔޮވުމަށް 4 މަސް އެބައޮތެވެ.