މޯނިންގވިއު އަނދައި ހުލިވުން: ތިން މިލިއަން ރުފިޔާގެ ބޮޑު ގެއްލުމެއް!
މިއަދު ފަތިހު މއ. މޯނިންގވިއު ގަައި އަލިފާން ރޯވި ޚަބަރާއެކު ގިނަ ބަޔަކަށް ލިބުނީ ކުއްލި ސިހުމެކެވެ. އަލިފާން ރޯވި ގަޑީގައި ކަމެއް ހިނގައިގެން އުޅޭކަން އެ ގޭގެ ބައެއް މީހުންނަށް ވެސް ރޭކާލީ ނިދައިފައި ތިއްބާ ހޫނުވާން ފެށުމުންނެވެ.
ފަސް ފަނގިފިލާ ހިމެނޭ މޯނިންގވިއު، މިއަދު ހެނދުނު އިރު އެރި އިރު ވަނީ އެއްކޮށް އަނދައި ހުލިވެފައެވެ.
"އަޅުގަނޑުމެން ގޭ އެންމެން ތިބީ ނިދައިފައި. ގެއިން ކަރަންޓް ގޮސްގެން ހޫނުވާ ވަރުން ބޭބެއަށް އަސްލު ހޭލެވުނީ. ހޭލެވުނީމަ ބޭބެ ތިރިއަށް ފައިބައި ބެލިއިރު މިހުރީ ރޯވެފައި،" އެ ގޭގައި ދިރިއުޅޭ މީހަކު ކިޔައިދިނެވެ.
މުޅިއެކު 56 މީހުން ދިރިއުޅޭ މއ. މޯނިން ވިއުގެ ހަތަރު ވަނަ ފަންގިފިލާގައި އަލިފާން ރޯވެ، މުޅި އެޕާޓްމަންޓަށް އަލިފާންގަނޑު ފެތުރުނު ވާހަަކަ އޭނާ ކިޔައިދިނެވެ.
އެ ގޭގައި މީހުން ކުއްޔަށް ދިރި އުޅެމުން ދިޔައީ ފަސް ވަނަ ފަންގިފިލާއާއި ތިން ވަނަ ފަންގިފިލާގައެވެ. ދެން ހުރި ފަންގިފިލާތަކުގައި ދިރިއުޅުނީ ހުސް އެ އާއިލާގެ އެކި މީހުންނެވެ.
ރޭ ފަތިހު، 4:40 ހާއިރު ގޭގައި ރޯވި އަލިފާންގަނޑު، ނިއްވައިލެވުނީ ހެނދުނު 7:00 ހާއިރެވެ. އޭރު އެ ގޭގައި ހިފައި ގެންގުޅޭ ސާމާނު ހަލާކުވެ، ބޮޑު ގެއްލުމެއް ލިބިފައިވެއެވެ. ލާން ގެންގުޅުނު އަންނައުނުކޮޅުގެ ތެރެއިން ވެސް ސަލާމަތުން ހުރީ، އެ މީހުން އެ ވަގުތު ލައިގެން ނިކުތް ހެދުން އެކަނިކަން އެނގިފައިވެއެވެ.
ސަރުކާރުން މިވަގުތު ވަނީ އެ މީހުންނަށް ގެސްޓްހައުސްތަކުގައި ވަގުތީ ބޯހިޔާވަހިކަން ފޯރުކޮށްދިނުމުގެ މަސައްކަތް ކުރަމުންނެވެ. ނަމަވެސް އޭގެ ތެރެއިން ބައެއް މީހުން އަދިވެސް ތިބީ ގިޔާސުއްދީން ސްކޫލުގައި ކަމަށާއި އަނެއް ބަޔަކު ގެސްޓްހައުސްތަކަށް ގެންގޮސްފައިވާކަން އެނގިފައިވެއެވެ.
އެ އާއިލާގެ މެމްބަރަކު ބައެއް މީޑިއާތަކަށް މައުލޫމާތު ދިން ގޮތުގައި، އަލިފާނުގެ މި ހާދިސާގެ ސަބަބުން އެ މީހުންގެ ދިރިއުޅުން އަލުން ފަށަން ޖެހޭ ވަރަށް ވަނީ ގެއްލުން ވެފައެވެ.
އެގޮތުން އެ މީހުން ދިރިއުޅެމުން އައި ގެ އިމާރާތް ކުރަން ވެސް ތިން މިލިއަން ރުފިޔާ ހޭދަވިއިރު ގޭގައި ގެންގުޅޭ ފްރިޖާއި މެޝިން އަދި ލެޕްޓޮޕާއި ފޯނު ފަދަ ސާމަނު ވެސް ހަލާކުވެފައިވާ ކަމަށާއި އެހެންކަމުން ލިބުނު ގެއްލުމުގެ އަދަދު ތިން މިލިއަން ރުފިޔާއަށް ވުރެ މަތިވާނެ ކަމަށް ވެސް ބުނެފައިވެއެވެ.
މއ. މޯނިންގވިއު ގައި އަލިފާން ރޯވީ ކިހިނެއްކަމެއް އެ އާއިލާ މީހުންނަކަށް ވެސް އަދިއެއް ނޭނގެއެވެ. ނަމަވެސް އެމީހުންނަށް ހޭލެވުނު އިރު އަލިފާން ރޯވެފައި ހުރީ ހަތަރު ވަނަ ފަންގިފިލާގައެވެ.
