ރައީސް ޔާމީންގެ ޝަރީއަތް ފަސްކޮށްދޭން އެދިއްޖެ
ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ މައްޗަށް ދައުލަތުން ކްރިމިނަލް ކޯޓުގައި އުފުލައިފައިވާ ދެ ދައުވާއެއްގެ އަޑު އެހުން މާދަމާ ބޭއްވުމަށް ތާވަލްކޮށްފައިވީ ނަމަވެސް، އެ އަޑުއެހުންތައް ފަހުގެ ތާރީހަކަށް ފަސްކޮށްދިނުމަށް ރައީސް ޔާމީންގެ ވަކީލުންގެ ފަރާތުން އެދިވަޑައިގެންފިއެވެ.
ރައީސް ޔާމީންގެ ގާނޫނީ ވަކީލުން ނެރުއްވި ބަޔާނެއްގައި ވިދާޅުވެފައި ވަނީ މާދަމާ ބޭއްވުމަށް ހަމަޖެހިފައިވާ އަޑު އެހުމަކީ، ކުރިއާލައި ތާވަލްކުރެވުނު އަޑު އެހުމެއް ނަމަވެސް، މާދަމާގެ ޝަރީއަތް ކުރިއަށް ގެންދަން ހަމަޖެހިފައި ވަނީ ކޯޓުގައި ކަމަށްވާއިރު، ކޮވިޑު-19 ގެ ނުރައްކާތެރި ހާލަތަށް ރިއާޔަތްކޮށް އަޑުއެހުން ފަސްކޮދިނުމަށް އެދިލައްވާ ކަމަށެވެ.
"މިއީ ގެއިން ނިކުތުން ވެސް މަނާކުރެވިފައިވާ ދަނޑިވަޅަކަށްވާއިރު، މިފަދަ ދަނޑިވަޅެއްގައި، ރައީސް ޔާމީން ސިއްހީ ނުރައްކަލަށް ހުށަހެޅޭ ގޮތަށް ކޯޓަށް ހާޒިރު ކުރުމަކީ، ޤާނޫނުއަސާސީގެ 21 ވަނަ މާއްދާގެ ދަށުން ކަށަވަރުކޮށްދީފައިވާ ދިރިހުރުމުގެ ޙައްޤާއި، އަމިއްލަ މިނިވަންކަމާއި، ނަފްސު ރައްކާތެރިކުރުމުގެ ޙައްޤަށް ހުރަސް އެޅޭ ކަމެއްކަމަށް ވާތީ މާދަމާގެ އަޑުއެހުން ފަސްކޮށް، ކޮވިޑު19ގެ ބަލިމަޑުކަން ހަމައަކަށް އެޅި، ޢާންމު ޙާލަތަކަށް ދަންދެން މައްސަލައިގެ އަޑުއެހުންތައް ފަސްކޮށްދެއްވުން އެދި ކުރިމިނަލް ކޯޓުގައި އެދިފައިވާނެ" ކަމަށް ރައީސް ޔާމީންގެ ވަކީލުން ވިދާޅުވިއެވެ.
މަނީ ލޯންޑަރިންގެ ތުހުމަތަކާ ގުޅިގެން ރައީސް ޔާމީންގެ މައްޗަށް ވަނީ ފަސް އަހަރު ދުވަހުގެ ޖަލު ހުކުމެއް އިއްވާފައެވެ. އަދި އެ ޖަލު ހުކުމް ތަންފީޒު ކުރައްވަމުން ގެންދަވާ އިރު، ޖަލުގައި ކޮވިޑް-19ގެ ހާލަތާ ގުޅިގެން މިވަގުތު އެމަނިކުފާނު ހުންނެވީ ގޭ ބަންދުގައެވެ.
Ads by STO
