ހުޅުމާލޭ ފެސިލިޓީގެ އިހުމާލުން ބަލިމީހަކަށް އިތުރު އަނިޔާތަކެއް، ދަރުމަންތައަށް ގެންގޮސްދިނުމަށް އެދި އާދޭސްކުރަނީ!
ހުޅުމާލޭ ކޮވިޑް ފެސިލިޓީއަށް ގެންދިޔަ ބަލިމީހަކަށް އެތަނުގެ އިހުމާލުން އިތުރު ޖިސްމާނީ އަނިޔާތަކެއް ކުރިމަތިވި މައްސަލަ ފެންމަތިވެއްޖެއެވެ.
މި ކަމާ ގުޅިގެން ބަލިމީހާގެ ދަރިއަކު "ދެން"އާ ވާހަކަ ދައްކަމުން ބުނީ ކޮވިޑް ފެސިލިޓީއަށް ގުޅައި ކޮންމެ ދުވަހަކު ވެސް އެތައް ފަހަރަކު ބައްޕަގެ ހާލު ބަލަމުންދާ ކަމަށާއި ނަމަވެސް ކުއްލިއަކަށް ލިބުނީ ހިއްސާކޮށްފައި ނުވާ މައުލޫމާތެއް ކަމަށެވެ.
" މިއަދު ބުނީ ފޫކޮޅުގައި ފާރު ހެދިފައި ހުރި ވާހަކަ" އޭނާ ބުންޏެވެ.
އޭނާ ބުނީ ބައްޕައަކީ ހަކުރު ބައްޔާއި ހިތުގެ ބަލި ހުންނަ މީހެއް ކަމަށާއި މީގެ އިތުރުން ބައިޕާސް ސާޖަރީއެއް ހެދުމުގެ އިތުރުން ކިޑްނީ ބައްޔަށް ވެސް ބައްޕަ ފަރުވާ ކުރަމުންދާ ކަމަށެވެ. މިކަންކަމުގެ ސަބަބުން ރަނގަޅު ފަރުވާއެއް ހޯދައިދިނުމަށް ދަރުމަންތަ ހޮސްޕިޓަލަށް ގެންގޮސްދިނުމަށް އާދޭސް ކުރަމުންދާ ކަމަށާއި ނަމަވެސް ކޮންމެ ފަހަރަކު ވެސް ޖަވާބަކަށް ބުނަނީ "މި ބަލަނީ" ކަމަށެވެ. އޭނާ ބުނީ ބައްޕަގެ ގާތަށް އެހީތެރިއަކު ދިޔުމަށް ވެސް ތަކުރާރުކޮށް އެތައް ފަހަރަކު އާދޭސް ކުރެވިއްޖެ ކަމަށާއި ނަމަވެސް އެކަމަށް ވެސް ހުއްދަ ނުދީ މިއަދު ބުނީ 72ގަޑިއިރަށް ދެވިދާނެ ކަމަށެވެ.
"މިއަދު ކުއްލިއަކަށް ބުނީ 72 ގަޑިއިރަށް ދެވިދާނޭ ، އެއާއެކީ މި ބުނީ ބައްޕަގެ ބަލީގެ ވާހަކަ ވެސް ، އެއީ ކުރީން ދުވަހަކު ވެސް ދިމާވި ކަމެއް ނޫން ، އެތަނަށް ގެންގޮސް އެމީހުން ބައްޕަ ރަނގަޅަށް ސާފު ނުކުރާތީވީ ކަމެއް ކަމަށް ބެލެވެނީ"71 އަހަރުގެ ބައްޕައާ ގުޅޭ ގޮތުން އޭނާ ބުންޏެވެ.
އޭނާ ބުނީ އައިޖީއެމްއެޗާއި ދަރުމަވަންތަ އަދި ހުޅުމާލޭ މެޑިކަލް ފެސިލިޓީން ދޭ ޖަވާބު ވެސް ދިމާނުވާ ކަމަށާއި ދަރުމަވަންތައިން ޑައިލިސިސް ހެދޭތޯ ގުޅުމުން ތިން ތަނުން ވެސް އެކި ފަހަރު ދެނީ އެކި ޖަވާބު ކަމަށެވެ. އަދި ދަރުމަވަންތައިގައި ހުސް އެނދު ހުރިތޯ ބަލާލުމަށް ގުޅައިލުމުން ވެސް އެއްތަނުން ހުރި ކަމަށް ބުނެފައި އަނެއްތަނުން ބުނަނީ ނެތް ކަމަށް ކަމަށް ވެސް އޭނާ ބުންޏެވެ. މީގެ އިތުރުން ބައްޕަ ދަރުމަންތައަށް ބަދަލުކުރުމަށް ޑޮކްޓަރު ވެސް "ރިފަރ"ކޮށްފައިވާ ކަމަށާއި ބަދަލުކުރުން ލަސްވާތީ ގުޅުމުން ވެސް އެކި ފަހަރު ދެނީ އެކި ޖަވާބުކަމަށް އޭނާ ބުންޏެވެ.
"ބައްޕައަކީ އެކި ބަލިތައް ހުރި މީހަކަށް ވާތީ އަޅުގަނޑުމެން އާދޭސް ކުރަމުން މިދަނީ ދަރުމަވަންތައަށް ބަދަލުކޮށްދޭން ، އެއްބައިފަހަރު ބުނާނެ ލިސްޓްގައޭ ،އަނެއްބައި ފަހަރު ބުނޭ އެނދެއް ނެތޭ" ގޮތް ހުސްވެފައި ހުރެ އޭނާ ބުންޏެވެ.
ދަރުމަވަންތަ ހޮސްޕިޓަލްގައި ކޮވިޑްގެ ފެސިލިޓީއަށް ޚާއްޞަކޮށްފައިވަނީ 11 އަދި 17 ވަނަ ފްލޯއެވެ. އެ ދެތަނުން ވެސް ފަސޭހައިން އެނދު ލިބެނީ "ކަނެކްޝަން"ގެ ތެރެއިން ކަމަށް އެ ފެސިލިޓީގައި މަސައްކަތްކުރާ ނަރުހަކު "ދެން"އަށް ބުންޏެވެ.
Ads by STO
