އޯގާތެރި ސަރުކާރެއްގެ ސިފަ ގެއްލި ހިނގައްޖެ: ހަސަންޓޭ
އެމްޑީޕީއިން ވަކާލާތުކޮށްގެން އައީ އޯގާތެރި ސަރުކާރެއް އުފައްދައިގެންނޭ ކިޔައިގެން ކަމަށާއި އެހެން ނަމަވެސް މިއަދު އެ މަންޒަރު ގެއްލި ހިގައްޖެކަމަށް އިނގުރައިދޫ ދާއިރާގެ މެމްބަރު ހަސަން އަހުމަދު (ހަސަންޓޭ) ވިދާޅުވެއްޖެއެވެ.
ރައީސް ނަޝީދުގެ ސެކިއުރިޓީއާ ބެހޭ ގޮތުން އޮންލައިން ނޫހެއްގައި ޝާއިރުކުރި ލިޔުމަކާ ގުޅިގެން މަޖިލީހަށް ހުށަހެޅި މައްސަލައެއްގައި މިއަދު ބަހުސް ކުރައްވަމުން ހަސަންޓޭ ވިދާޅުވީ، ނޫހުގައި ޝާއިއު ކުރި ލިޔުމުން ގެއްލުން ލިބިގެން ދަނީ ހަމައެކަނި ރައީސް މުޙައްމަދު ނަޝީދަށް ނޫން ކަމަށެވެ. އެ ގޭގައި ކުއްޔަށް ދިރިއުޅޭ ފަރާތްތަކަށާއި ނަޝީދުގެ އާއިލާ ވެސް މިކަމުގެ ސަބަބުން ނުރައްކަލުގެ ތެރެއަށް ވެއްޓިގެންދާ ކަމަށް ހަސަންޓޭ ފާހަގަ ކުރެއްވިއެވެ. އަދި ރާއްޖޭގެ ރައްޔިތުންނަށް ރައްކާތެރިކަމެއް ނެތްކަން އެ ރިޕޯޓުން ސާފުކޮށް ހާމަވެގެން ހިނގައްޖެ ކަމަށް ވިދާޅުވިއެެވެ.
ހަސަންޓޭ ވިދާޅުވީ، ސެކިއުރިޓީ ބްރީޗްވީ ކެނެރީގޭ މުހައްމަދު ނަޝީދުގެ ނޫން ކަމަށާއި، މިއަދު ދެކެވެނީ ރާއްޖޭގައި ވެރިކަން ކުރެއްވި ރައީސެއްގެ ވާހަކަ ކަމަށެވެ. އަދި ގައުމީ ދިފާއީ ބާރަކީ ބޮޑު ހުވައެއް ކުރައްވައިގެން ތިބޭ ބައެއް ކަމަށާއި އެހުވަޔާ އެއްގޮތަށް މަސައްކަތް ކުރައްވަން ޖެހޭނެ ކަމަށް އޭނާ ވިދާޅުވިއެވެ. އަދި މިކަހަލަ ކޮންމެ ދަނޑިވަޅެއްގައި ރިޓަޔަރ ކުރައްވާފައިވާ ބޭފުޅުން މީޑިއާ އަރައި ވާހަކަފުޅު ދައްކަވާ ކަމަށާއި މީޑިއާތަކަށް އަރާ ގައުމީ ދިފާއީ ބާރާ ބެހޭ ގޮތުން ވާހަކަ ދެކެވިގެން ނުވާނެކަން އެއީ އެ މަނިކުފާނު ގަބޫލުކުރައްވާ ގޮތް ކަމަށް ހަސަންޓޭ ވިދާޅުވިއެވެ.
"ހަމަ ޤައުމުގައި މިއިން ކަމެއް ހިނގާއިރަށް ރިޓަޔަރ ކުރައްވާފައިވާ ބޭފުޅުން، އެތަނާ ބޭހޭ ގޮތުން، އެ މުއައްސަސާއާ ބެހޭ ގޮތުން އެތައް ވާހަކަތަކެއް ދައްކަވާ. އަޅުގަނޑު ދެކޭ ގޮތުގައި ޤައުމިއްޔަތެއް އުފެދޭ އިރުގައި އަދި އެޤައުމަކަށް ޚިދުމަތްކޮށްފަ ރިޓަޔަރ ކުރާއިރުގައި، އެ ބޭފުޅުންގެ ޑިގްނިޓީއެއް އޮންނަން ޖެހޭނެ" ހަސަންޓޭ ވިދާޅުވިއެވެ.
ހަސަންޓޭ އިތުރަށް ވިދާޅުވީ، މިފަދަ ކަންކަން ބެލުން ލަސްކޮށްފި ނަމަ އިތުރަށް ތަކުރާރުވުމުގެ ފުރުސަތު އެބައޮތް ކަމަށެވެ. މިކަން ގައުމަށް ޓަކައި ވެސް އެކަން ބަލާނެ ކަމަށް ވިދާޅުވެ ވިދާޅުވީ، މިގައުމުގައި އަމާން ކަމާ އެކު ރައްޔިތުންނަށް އުޅެވެން ޖެހޭ ކަމަށެވެ.
