ސިއްޙީ ހިދުމަތްތެރިން ކުރައްވާ ބުރަ މަސައްކަތަށް ޝުކުރު ހައްގު: ނަސީމް

ސިއްޙީ ހިދުމަތްތެރިން ކުރާ ބުރަ މަސައްކަތަށް ޝުކުރު ހައްގުކަމަށާއި އެ ކުރައްވަނީ ތައުރީފު ހައްގު މަސައްކަތްތަކެއް ކަމަށް ހެލްތު މިނިސްޓަރ އަހުމަދު ނަސީމް ވިދާޅުވެއްޖެއެވެ.

Ads by STELCO

ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ)ގެ ފަރާތުން މިހާރު ކުރިއަށް ގެންދާ ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން މިނިސްޓަރ ނަސީމް ވިދާޅުވީ ނަރުހުންނާއި، ފްރޮންޓްލައިންގައި މަސައްކަތް ކުރައްވާ ހުރިހާ ފަރާތްތަކުން އެ ކުރައްވަނީ ބުރަ މަސައްކަތެއް ކަމަށެވެ.

މީގެ އިތުރުން ސިއްހީ ހިދުމަތްތެރިންނާއި، ޑޮކްޓަރުންނާއި އަދި މި ނޫންވެސް އެކި ފަރާތްތަކުން ކުރައްވާ މަސައްކަތް މިނިސްޓަރ ވަނީ ފާހަގަކުރައްވާފައެވެ.

ހަމައެހެންމެ މިރޭގެ ނޫސްވެރިންގެ ބައްދަލުވުމުގައި މިނިސްޓަރ ވަނީ ކޮވިޑް19 މެނޭޖުކުރުމުގައި މިހާތަނަށް ކުރެވިފައިވާ މަސައްކަތްތަކާއި ކުރިޔަށް ކުރަން ހުރި ކަންތައްތަކަށް ވެސް އަލިއަޅުވާލައްވައިފައެވެ.

އަދި ހޮސްޕިޓަލަށް ނުގެންދެވި ގިނަ އިރު ވުމުގެ ސަބަބުން، 10 އަހަރުގެ ކުއްޖަކު ނިޔާވި މައްސަލާއާއި ގުޅޭ ގޮތުން ވެސް މިނިސްޓަރު ވަނީ މައުލޫމާތު ހިއްސާ ކުރައްވައިފައެވެ. މިކަމާ ގުޅިގެން މިނިސްޓަރ ވިދާޅުވީ ކަން ހިނގައިދިޔަ ގޮތް ބެލުމަށް ފަށާފައިވާ މަސައްކަތް މިރޭ ނިމޭނެ ކަމަށެވެ. އަދި ވިދާޅުވީ މިޝްކާއަށް ފަރުވާ ނުލިބި ގިނަ ވަގުތުތަކެއް ވެގެން ދިއުމުގައި އިހުމާލެއް އެބައޮތް ކަމަށާ މިހާރު ބަލަމުން ދަނީ އެއީ ކޮންކޮން އިހުމާލެއްތޯ ކަމަށެވެ.