ފޮރެންސިކް މުހިންމު ހެކިތަކެއް ލިބިފައިވޭ، އަދި ވީޑިއޯ ފުޓޭޖްތަކުން ވެސް ހެކިތައް ލިބިފައިވޭ: ހަސަން ޝިފާއު
ރައްޔިތުންގެ މަޖިލީހުގެ ރައީސް މުޙައްމަދު ނަޝީދަށް ދިން ހަމަލާގެ ތަހުގީގާ ގުޅިގެން ފޮރެންސިކް މުހިންމު ހެކިތަކެއް ލިބިފައިވާ ކަމަށާއި އަދި ވީޑިއޯ ފުޓޭޖްތަކުން ވެސް ހެކިތައް ލިބިފައިވާކަމަށް ސުޕަރިންޓެންޑަންޓް އޮފް ޕޮލިސް ހަސަން ޝިފާއު ވިދާޅުވެއްޖެއެވެ.
ފުލުހުން މިހާރު ކުރިއަށްގެންދާ ނޫސްވެރިންގެ ބައްދަލުވުމުގައި މައުލޫމާތު ދެއްވަމުން ޝިފާއު ވިދާޅުވީ މިދިޔަ މަހުގެ ހަ ވަނަ ދުވަހު ނީލޯފަރުގެ މަގުގައި ރައީސް ނަޝީދަށް އަމާޒުކޮށް ދިން ޓެރަރިސްޓް ހަމަލާގެ ތަހުގީގުން، ފޮރެންސިކް މުހިންމު ހެކިތަކެއް ލިބިފައިވާ ކަމަށާއި އަދި ވީޑިއޯ ފުޓޭޖްތަކުން ވެސް ހެކިތައް ލިބިފައިވާ ކަމަށެވެ.
ރައީސް ނަޝީދަށް ދިން ހަމަލާގެ ތަހުގީގު އަދިވެސް ކުރިއަށް ދާތީ، ފުލުހުންނަށް ލިބިފައިވާ ހެކިތަކުގެ އިތުރު ތަފްސީލެއް ދެއްވައިފައެއް ނުވެއެވެ.
މި ބައްދަލުވުމުގައި މައުލޫމާތު ދެއްވަމުން ކްރިމިނަލް އިންވެސްޓިގޭޝަން ކޮމާންޑްގެ ފަރާތުން ޗީފް ސުޕަރިންޓެންޑަންޓް އޮފް ޕޮލިސް މުޙައްމަދު ބަޝީރު ވިދާޅުވީ، މި ހަމަލާއާ ގުޅިގެން މިހާތަނަށް 25 ތަނެއް ބަލައިފާސްކޮށް، 14 މީހަކު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ.
ފުލުހުން އިތުރަށް ވިދާޅުވީ ރައީސް ނަޝީދަށް ދީފައިވާ އެ ހަމަލާއާ ގުޅިގެން 150 މީހަކު މައުލޫމާތު ފޯރުކޮށްދިން ކަމަށެވެ. ހައްޔަރު ކުރި 14 މީހުންގެ ތެރެއިން 4 މީހަކީ އެ ހަމަލާއާ ސީދާ ގުޅުން ހުރި ކަމަށް ތުހުމަތު ކުރެވޭ ހަތަރު މީހެއް ކަމަށާއި އަނެއް 10 މީހުންނަކީ ހަރުކަށި ފިކުރު ފަތުރާކަމުގެ ތުހުމަތުގައި ހައްޔަރު ކުރި 10 މީހުން ކަމަށް ވެސް ފުލުހުން ވިދާޅުވިއެވެ. ފުލުހުން މީގެ ކުރިން ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ، ރައީސް ނަޝީދަށް ދިން ހަމަލާއަކީ ހަރުކަށިފިކުރުގެ ބަޔަކު ރާވައިގެން ހިންގި ހަމަލާއެއް ކަމަށް ޤަބޫލު ކުރެވޭ ކަމަށެވެ.
ނިއުސްް ކޮންފަރެސްް އުޒުވެރިި