ބަހުގެ އެކެޑަމީން ބާއްވާ އަދަބީ އީދު މި ފަހަރު އޮންލައިންކޮށް!
ދިވެހި އަދަބު ކުރިއެރުވުމާއި އަދަބީ އުފެއްދުންތައް ހުށަހެޅުމުގެ ހުނަރު ތަރައްގީކޮށް ދެމެހެއްޓުމަށް ޓަކައި ތަފާތު އަދަބީ ހަރަކާތްތަކެއް ހިމެނޭ ގޮތަށް ދިވެހި ބަހުގެ އެކެޑަމީން ބާއްވާ އަދަބީ އީދު މި ފަހަރު އޮންލައިންކޮށް ބާއްވަން ނިންމައިފިއެވެ.
އާންމުކޮށް ހުޅުވައިލައިގެން ބާއްވާ މި އަދަބީ އީދު ޚާއްސަ ކުރެވިފައި ވަނީ މައިގަނޑު ތިން އުމުރު ފުރައަކަށެވެ. އެގޮތުން 10 އަހަރާއި 13 އަހަރާ ދެމެދުގެ އުމުރުފުރާ، 13 އަހަރާއި 17 އަހަރާ ދެމެދުގެ އުމުރުފުރާ އަދި 17 އަހަރާއި 20 އަހަރާ ދެމެދުގެ އުމުރުފުރާގެ ކުދިންނަށް މި މުބާރާތުގައި ބައިވެރިވެވޭނެއެވެ.
މި އީދުގައި ޖުމުލަ ތިން މުބާރާތެއް ބޭއްވުމަަށް ވަނީ ނިންމައިފައެވެ. އެއީ ބަނދި ކިޔުމާއި ޅެން ކިޔުން އަދި ވާހަކަ ހުށަހެޅުމުގެ އިތުރުން ރައިވަރު ކިޔުމެވެ.
އަދަބީ އީދުގައި ބައިވެރިވުމުގެ ފުރުސަތު މިހާރު ވަނީ ހުޅުވައިލެވިފައެވެ. މި އަދަބީ އީދުގައި ކޮންމެ ބައިވެރިއަކަށް ވެސް ބައިވެރި ވެވޭނީ ގިނަވެގެން ދެ މުބާރާތެއްގައެވެ. މުބާރާތުގައި ބައިވެރި ވެވޭނީ، ދިވެހި ބަހުގެ އެކެޑެމީން ތައްޔާރު ކޮށްފައިވާ ގޫގުލް ފޯމު ފުރިިހަމަ ކޮށްގެންނެވެ. އަދަބީ އީދަށް ހުށައަޅާ އުފެއްދުންތައް، ހުށަހެޅުމަށް 7986230އަށް ޓެލެގުރާމް ކުރުމަށް އެކެޑެމީން ވަނީ އެދިފައެވެ.
ހުށަހަޅާ އުފެއްދުންތައް ހުންނަން ވާނީ، އެމް.ޕީ 4 ފޯމެޓުގައި ލޭންޑްސްކޭޕް ކޮށެވެ، އަދި ޓެލެގުރާމަށް ފޮނުވާ ކޮންމެ އަދަބީ އުފެއްދުމެއްގައި ވެސް އެ ބައިވެރިއެއްގެ ނަމާއި، އެޑްރެހާއި އުމުރުފުރާ އަދި ދިވެހި ރައްޔިތެއްކަން އަންގައިދޭ ކާޑުގެ ނަމްބަރު ޖެހުމަށް ފަހު ވީޑިއޯއާ އެކު މެސެޖެއް ފޮނުވުމަށް އެކެޑަމީން އެދެއެވެ.
މި މުބާރާތުގައި ބައިވެރިވުމަށް އެދި ހުށަހަޅާ ފޯމާއި ތަކެތި ހުށަހެޅުމުގެ ސުންގަޑި ތިރީގައި އެވަނީއެވެ.
- 10 އަހަރާއި 13 އަހަރާ ދެމެދުގެ އުމުރުފުރާގެ ސުންގަޑިއަކީ 28 ޖޫން 2021
- 13 އަހަރާއި 17 އަހަރާ ދެމެދުގެ އުމުރުފުރާގެ ސުންގަޑިއަކީ 29 ޖޫން 2021
- 17 އަހަރާއި 20 އަހަރާ ދެމެދުގެ އުމުރުފުރާގެ ސުންގަޑިއަކީ 30 ޖޫން 2021
މިއިން ކޮންމެ ދުވަހެއްގެ ވެސް މެންދުރު ފަހު 2:00ގެ ކުރިން ފޯމާއި ތަކެތި އެކެޑެމީގެ ނަމްބަރަށް ޓެލެގުރާމު ކޮށްލުމުން މުބާރާތުގައި ބައިވެރި ވެވޭނެއެވެ.
ދިވެހި ބަހުގެ އެކެޑެމީގެ ރައީސް އަޝްރަފް ޢަލީ، "ދެން"އާ ވާހަކަ ދައްކަވަމުން ވިދާޅުވީ، މި މުބާރާތަކީ ކޮންމެ އަތޮޅެއްގެ ވެސް އަތޮޅު ވެރިކަން ކުރާ ރަށުގައި، އެ އަތޮޅެއްގެ ރަށްތަކުގެ ސުކޫލްތަކުގެ މެދުުގައި މީގެ ކުރިން ބާއްވަމުން އައި މުބާރާތެއް ކަމަށެވެ. އެގޮތުން 2019 ވަނަ އަހަރު މި މުބާރާތް ބޭއްވުނީ ނ. އަތޮޅު ސުކޫލުތައް ބައިވެރިކޮށް ނ.މަނަދޫގައި ކަމަށް ވެސް އަޝްރަފް ވިދާޅުވިއެވެ.
“2020ވަނަ އަހަރު އަޅުގަނޑުމެން އަދަބީ އީދު ބާއްވަން ނިންމީ ފުވައްމުލަކުގަ، އެހެން ނަމަވެސް ކޮވިޑްގެ ހާލަތާ ގުޅިގެން އެ އަހަރު ވެސް އީދު ބޭއްވޭ ގޮތެއް ނުވީ” އަޝްރަފް ވިދާޅުވިއެވެ.
އަޝްރަފް އިތުރަށް ވިދާޅުވީ، މި މުބާރާތް ބޭއްވުމުގެ މަގުސަދަކީ ގިނަ ކުދިންގެ އަދަބީ ހުނަރު ކުރިއަރުވައި، އެކުދިންގެ ހުނަރު ޓީވީއާއި މީސް މީޑިއާގެ އެކި މަންސަތައް މެދުވެރިކޮށް ގިނަ ބަޔަކާ ހަމައަށް ފޯރުކޮށްދިނުން ކަމަށެވެ. އަދި މި މުބާރާތުން ވަނަތަކަށް ހޮވޭ ބައިވެރިންނަށް ރަނގަޅު އިނާމުތަކެއް ދިނުމަށް ވެސް ހަމަޖެހިފައިވާ ކަމަށް އަޝްރަފް ވިދާޅުވިއެވެ.
މީގެ އިތުރުން ކޮވިޑްގެ ސަބަބުން ދަތުރުފަތުރަށް ހުރަސް އެޅިފައިވާތީ މިފަހަރުގެ އަދަބީ އީދު އޮންލައިންކޮށް ބޭއްވުމަށް ނިންމެވީ ރާއްޖޭގެ ކޮންމެ ހިސާބަކުން ވެސް މި މުބާރާތުގައި ބައިވެރިވެ އެ ބައިވެރިއެއްގެ ހުނަރު ދައްކައިލުމުގެ ފުރުސަތު ހޯދައިދިނުމަށްކަމަށް އަޝްރަފް ވިދާޅުވިއެވެ.
Ads by STO
