ރައީސް ޞާލިޙްގެ ހާރިޖީ ސިޔާސަތު، ދުނިޔޭން ގަބޫލުކޮށްފިކަން ހާމަވެއްޖެ: ފޮރިން މިނިސްޓަރ
އދ.ގެ އާންމު މަޖިލީގެ ރައީސް ކަމުގެ ގޮނޑި ރާއްޖެއަށް ކާމިޔާބުވުމަކީ މިއަދު ދުނިޔޭގެ ހުރިހާ ގައުމެއްގެ އިތުބާރު ރާއްޖެއަށް ލިބިފައިވާކަން ސާބިތުވާ ކަމެއް ކަމަށާއި ރައީސް އިބްރާހިމް މުހައްމަދު ޞާލިޙްގެ ޒައާމަތަށް މުޅި ދުނިޔެ ތަރުހީބު ދެމުން ދާކަން ސާބިތު ވެގެން ދިޔަކަމެއް ކަމަށް އެ ގޮނޑި ކާމިޔާބު ކުރެއްވި ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.
އދގެ އާންމު މަޖިލީހުގެ 76 ވަނަ ދައުރާ ކުރިމަތިލާއިރު ބޮޑެތި މައްސަލަތަކާއި ގޮންޖެހުންތައް އެބަހުރި ކަމަށް ވިދާޅުވެ ޝާހިދު ވިދާޅުވީ، މިދިޔަ އަހަރަކީ ބަލިމަޑުކަމާއި، ނުތަނަވަސްކަމާއި، އުއްމީދު ގެއްލިފައިވާ އަހަރެއް ކަމަށާއި ހަމަހަމަކަން ގެއްލި ބޭއިންސާފާއި ހަމަނުޖެހުން އިތުރު ވެފައިވާ ކަަމަށާއި ވަށައިގެންވާ ތިމާވެއްޓާއި، ކަނޑާއި، ދުނިޔެ އަށް ތަފާތު ގެއްލުންތައް ކުރިމަތިވަމުންދާ ކަމަށް މިނިސްޓަރު ވިދާޅުވިއެވެ.
"އދގެ އާންމު މަޖިލީހުގެ 76 ވަނަ ސެޝަން ވާނީ ގުދުރަތީ މާހައުލަށް ހާއްސާ ސެޝަނަކަށް، އެގޮތުން ސީއޯޕީ26 އޮން ކްލައިމެޓް ޗޭންޖް، ދަ އޯޝަން ކޮންފަރެންސް، އެމް ބަޔޯޑައިވަރސިޓީ އަދި ސީއޯޕީ15 އޮން ޑައިވަސިފިކޭޝަން، ދަ އެނާރޖީ ޑައިލޮގް، ކޮންފަރެންސަސް އޮން ސަސްޓެއިނަބަލް ޓްރާންސްޕޯޓް އެންޑް ފުޑް ސިސްޓަމްސް ފަދަ ގިނަ ބައްދަލުވުންތަކާއި ކޮންފަރެންސްތައް އެކުލެވިގެންދާ ސެޝަނަކަށް 76 ވަނަ ސެޝަން ވާނެ" ކަމަށް ވިދާޅުވިއެވެ.
މީގެ އިތުރުން އާންމުންގެ ބޭނުންތައް އަޑު އަހައި މަޝްވަރާ ކުރުމަކީ ވެސް މުހިއްމު ކަމެއް ކަމަށާއި އެންމެންގެެ ހައްގުތަކަށް އިހުތިރާމްކޮށް، ގިނަ ބައެއްގެ ބޭނުންތަކާއި އިހުސާސްތައް ހިމެނިގެން އިންސާނީ އެހީތެރިކަން ފޯރުކޮށް ދިނުމަކީ މެދުކެނޑުމެއް ނެތި ކުރިއަށް ދާންޖެހޭ މަސައްކަތެއް ކަމަށް ވެސް ޝާހިދު ވިދާޅުވި އެވެ. ހަމަ އެހެންމެ، އދ. ގެ އާންމު މަޖިލީހުގައި ޒުވާނުންގެ އަޑު އިތުރުކޮށް ޒުވާނުންނަށް އޮތް ޖާގަ އިތުރުކޮށްދޭނޭ ކަމުގެ ޔަގީންކަން ދެއްވާ ކަމަށް ވެސް ފޮރިން މިނިސްޓަރ ޝާހިދު ވިދާޅުވިއެވެ.
ޝާހިދު މަގާމު ކަށަވަރު ކުރެއްވީ 191 ވޯޓުގެ ތެރެއިން 143 ވޯޓު ކާމިޔާބު ކުރައްވައިގެންނެވެ. މިނިސްޓަރ ޝާހިދު ވަނީ ރާއްޖެ އަށް އދ. ގެ އާންމު މަޖިލީހުގެ ރައީސް ކަމުގެ ގޮނޑި ކަށަވަރުކޮށްދިނުމަށް މަސައްކަތްކުރި އެކުވެރި ގައުމުތަކަށް ޝުކުރު އަދާކުރައްވައިފައެވެ.
އދ.ގެ އާންމު މަޖިލީހުގެ 76 ވަނަ މަޖިލީހުގެ ރައީސްކަމާ ޝާހިދު ހަވާލުވެވަޑައިގަންނަވާނީ މި އަހަރުގެ ސެޕްޓެމްބަރު މަހުގެ ތެރޭގައެވެ.
