މާލެ ސިޓީ ކައުންސިލްގެ ޖަލްސާތައް ލައިވް ކުރަން ނިންމައިފި
މާލޭ ސިޓީ ކައުންސިލުން ބާއްވާ ޖަލްސާތައް ލައިވް ކުރުމަށް ނިންމައިފިއެވެ.
ކައުންސިލްގެ ހިންގާ ގަވާއިދު ފާސްކުރުމަށް މިމަހުގެ ހަތްވަނަ ދުވަހު ބޭއްވި ބައްދަލުވުމުގައި ހުށަހެޅުނު އިސްލާހުގައި ކައުންސިލް ހިންގާނެގޮތުގެ 13 މާއްދާއަކަށް އިސްލާހުތަކެއް ހުށަހެޅިފައިވީ ނަމަވެސް، ސިޓީ ކައުންސިލްގެ ސުޕަ މެޖޯރިޓީ އޮތް ޕީޕީއެމްގެ ކައުންސިލަރުންގެ ވޯޓުން، މި 13 މާއްދާގެ ތެރޭގައި ކޮރަޕްޝަނަށް މަގުފަހި ނުވާނެގޮތަށް ހުށަހެޅުނު 15 އިސްލާހެއް އެ މާއްދާއިން ވަނީ ފާސްނުކޮށް ބޭރުކޮށްލައިފައެވެ.
މިކަމާ ގުޅިގެން މާލެ ސިޓީ ކައުންސިލްގެ ގަލޮޅު އުތުރު ދާއިރާގެ މެންބަރު ސައިފް ފާތިހުގެ ވަނީ މީސްމީޑިއާގައި މޭޔަރ މުއިއްޒު އަދި ޕީޕީއެމްގެ އެހެން ކައުންސިލަރުންނަށް ފާޑު ވިދާޅުވެފައެވެ.
އެއާއެކު މޭޔަރުގެ އިސްނެންގެވުމަށް މިއަދު ބޭއްވުނު ކުއްލި ބައްދަލުވުމުގައި، މީގެ ތެރެއިން ބައެއް އިސްލާހުތައް ވަނީ އަލުން ފާސްކޮށްފައެވެ. އެއީ ކައުންސިލްގެ ޖަލްސާތަކުގައި ބައިވެރިވުމުގެ ފުރުސަތު ޖާގަހުރި މިންވަރަކުން ފަހިކޮށްދިނުމަށް އޮތް އިސްލާހުގެ އިތުރުން، ކައުންސިލްގެ ޖަލްސާތައް އާންމުކޮށް ފެންނާނެހެން މީޑިއާ މެދުވެރިކޮށް އުނިއިތުރަކާ ނުލާ ދެއްކުމާއި އިއްވުމަށް ހުށަހަޅާފައިވާ އިސްލާހާއި، ޖަލްސާތަކުގެ ޔައުމިއްޔާގެ އޯޑިއޯ، ރިކޯޑިންގެ އިތުރަށް ކޮންމެ ކަމެއްގެ ޔައުމިއްޔާ އަކުރުން އަކުރަށް ބަލަހައްޓަންވާނެ ކަމަށް އޮތް އިސްލާހެވެ.
Ads by STO
