ލާމު އަތޮޅުގެ ކޮވިޑް19ގެ ހާލަތު ރަނގަޅުވެ ވޭދަނަތައް ދަށަށް!
ހަރަކާތްތެރި ވޭދަނަތައް ލ.އަތޮޅުގައި ދަށްވެ އަތޮޅުގެ ހާލަތު ރަނގަޅުވާން ފަށައިފިއެވެ.
ގަމު ރީޖަނަލް ހޮސްޕިޓަލު (ޖީއާރްއެޗް) އިން މިއަދު އާއްމުކުރި އަދާހަމަތަކުން ދައްކާ ގޮތުން މިއަދު އެ އަތޮޅުން ކޮވިޑް ބައްޔަށް ފައްސިވެފައި ވަނީ އެންމެ 8 މީހުންނެވެ. އެއީ ގަމުން އެކަކާއި އިސްދޫއިން އެކަކާއި ކަޅައިދޫން އެކެއްގެ އިތުރުން މާވަށުން 5 މީހުންނެވެ. މިއަދަދުތަކާ އެކީ މިވަގުތު އެ އަތޮޅުގެ ހަރަކާތްތެރި ވޭދަނަތަކުގެ އަދަދަކީ 170އެވެ.
ލާމު ކޮވިޑްގެ އަދާހަމަތައް ދައްކާ ގޮތުގައި، މިހާތަނަށް 8321 ސުންކު އެ އަތޮޅުން ވަނީ ނަގައިފައެވެ. މީގެތެރެއިން އެންމެ ގިނަ ސުންކު ނަގައިފައި ވަނީ ގަމުންނެވެ. އެއީ 3099 ސުންކެވެ. އެންމެ މަދު ސުންކު ނަގާފައިވަނީ ކުނަހަންދޫއިންނެވެ. އެއީ 53 ސުންކެވެ.
އެ އަތޮޅުން މިހާތަނަށް 1375 މީހުންނަށް ކޮވިޑް-1919 ޖެހިފައިވާއިރު މިހާތަނަށް 1198 މީހުން ވަނީ ބަލިން ރަނގަޅުވެފައެވެ.
ޖީއާރްއެޗްއިން މިއަދު އާއްމުކުރި އަދާހަމަތަކުން ދައްކައި ގޮތުގައި އެއަތޮޅު މާންދޫ، ދަނބިދޫ، ކުނަހަންދޫ އަދި މާމެންދޫގައި މިވަގުތު ކޮވިޑް19 ގެ ވޭދަނައެއް ނެތެވެ.
ކޮވިޑް ބަލީގައި އެއަތޮޅުން 07 މީހަކު ވަނީ ނިޔާވެފައެވެ. އެއީ ގަމުން ނިޔާވި 3 މީހުންނާއި މާވަށުން ނިޔާވި ދެމީހުންނާއި މާންދޫއިން ނިޔާވި މީހެއްގެ އިތުރުން ހިތަދޫއިން ނިޔާވި މީހެކެވެ.
