ބޭރުގެ މަސް ބޯޓާ މެދު ފިޔަވަޅު އެޅުމުގެ މަސައްކަތް މިހާރު ވަނީ ފަށައިފައި : ފިޝަރީޒް
ރާއްޖޭގެ ކަނޑުގެ ސަރަޙައްދުން އެންމެ ފަހުން އަތުލައިގަތް ބޭރުގެ މަސް ބޯޓާ މެދު ފިޔަވަޅު އެޅުމުގެ މަސައްކަތް ފަށައިފައިވާ ކަމަށް ފިޝަރީޒް މިނިސްޓްރީން ހާމަކޮށްފިއެވެ.
ފިޝަރީޒް މިނިސްޓްރީގެ ޓްވީޓެއްގައި ބުނެފައި ވަނީ ރާއްޖޭގެ ފިޝަރީޒް އެކްޓުގެ ދަށުން މި ބޯޓަށް ފިޔަވަޅު އެޅުމުގެ މަސައްކަތް ފަށައިފައިވާ ކަމަށެވެ. ޓްވީޓާއެކު ފިޝަރީޒް މިނިސްޓްރީން ވަނީ އެ ބޯޓުގެ ފޮޓޯ ވެސް އާންމުކޮށްފައެވެ. އޭގެ ތެރެއިން އެއް ފޮޓޯގައި ބާނައިފައި ހުރި މިޔަރު ވެސް ފެންނަން ހުއްޓެވެ.
ޤަވާއިދާ ޚިލާފަށް މަސްވެރިކަން ކުރަން އުޅުނު ބޭރުގެ މަސް ބޯޓެއް އެމްއެންޑީއެފް ކޯސްޓްގާޑުގެ ބެލުމުގެ ދަށަށް ގެންގޮސްފައި ވަނީ މި ހަފްތާތެރޭގައެވެ.
އެމްއެންޑީއެފުން ވިދާޅުވާގޮތުގައި މި މަސްބޯޓު ފެނިފައި ވަނީ ލ.އަތޮޅުގެ އިރުން 45 މޭލު ބޭރުގައި މަސްވެރިކަން ކުރަން އުޅުން "ސީލައިން-03" ނަމަކަށް ކިޔާ ދޯންޏަށެވެ.
މި މަސް ބޯޓު ހޯދުމަށް އެމްއެންޑީއެފް ކޯސްޓްގާޑުން ކުރިއަށް ގެންދިޔަ ޚާއްޞަ އޮޕަރޭޝަންގައި، މި ބޯޓު ކޯސްޓްގާޑް ޝިޕް ހުރަވީގެ ބެލުމުގެ ދަށަށް ގެނެވިފައި ވަނީ، ލ.އަތޮޅުގެ އިރުން 139 ނޯޓިކަލް މޭލު ބޭރުންނެވެ. އަދި މި ބޯޓު ކޯސްޓްގާޑްގެ ބެލުމުގެ ދަށަށް ގެންދިޔައިރު ބޯޓުގައި ފަސް ފަޅުވެރިން ތިބިކަމަށް ވެސް އެމްއެންޑީއެފުން ވިދާޅުވެއެވެ.
Ads by STO
