އެމްއެމްޕީއާރްސީގެ ހިޔާނާތާ ގުޅިގެން 12 ކުންފުންޏެއް މިހާރު ވާނީ ލިސްޓުން އުނިކޮށްފައި: އެސެޓް ރިކަވަރީ
އެމްއެމްޕީއާރްސީގެ ފައިސާ ލިބުނު މީހުންނާއި ކުންފުނިތައް ހިމަނައި، މަޖިލީހަށް ފޮނުވި ލިސްޓަށް މިހާރު ބައެއް ބަދަލުތައް އައިސްފައިވާ ކަމަށާއި 12 ކުންފުންޏެއް މިހާރު ވާނީ ލިސްޓުން އުނިކޮށްފައިވާކަމަށް ހިޔާނާތް ބަލައި، އެސެޓް ރިކަވަނީ ކޮމިޝަނުން ވިދާޅުވެއްޖެއެވެ.
އެސެޓް ރިކަވަރީ ކޮމިޝަންގެ މަސައްކަތާ ބެހޭ ގޮތުން ބައެއް މިޑިޔާތަކަށް މައުލޫމާތު ދެއްވަމުން އެކޮމިޝަނުގެ ރައީސް އަހްމަދު އައްސަދު ވިދާޅުވީ މަޖިލީހަށް ފޮނުވި ލިސްޓަށް މިހާރު ބައެއް ބަދަލުތައް އައިސްފައިވާ ކަމަށާއި 12 ކުންފުންޏެއް މިހާރު ވާނީ ލިސްޓުން އުނި ކޮށްފައިވީ ނަމަވެސް ލިސްޓްގައި ހިމެނޭ ވަކިވަކި ފަރުދުންގެ އަދަދު ލިސްޓުން މަދު ނުވާނެ ކަމަށެވެ.
މިދިޔަ މެއިމަހު އެސެޓް ރިކަވަރީ ކޮމިޝަނުން ވަނީ އެމްއެމްޕީއާރުސީގެ ބޮޑު ހިޔާނާތުން ފައިސާ ލިބުނު މީހުންގެ ލިސްޓެއް ރައްޔިތުންގެ މަޖިލީހަށް ފޮނުވައިފައެވެ. ހިޔާނާތުގެ ފައިސާ ލިބުނުކަމަށް ބުނާ 281 ފަރާތެއް އެ ލިސްޓްގައި އޮތެވެ.
މީގެ އިތުރުން އެމްއެމްޕީއާރުސީ މައްސަލައާ ގުޅިގެން އެންޓި ކޮރަޕްޝަން ކޮމިޝަން (އޭސީސީ)އިން ތަޙްޤީޤުކޮށް ނެރެފައިވާ ލިސްޓާއި އެސެޓް ރިކަވަރީ ކޮމިޝަނުން ރައްޔިތުންގެ މަޖިލީހުގެ ކޮމިޓީއާ ހިއްސާކޮށް ޢާންމުކޮށްފައިވާ ލިސްޓާ ތަފާތުތަކެއް ހުރުމުގެ އިތުރުން، އެސެޓް ރިކަވަރީ ކޮމިޝަންގެ ލިސްޓުން ބައެއް ނަންތައް އުނިވެ އިތުރުވެފައިވާ ގޮތާމެދު އޮޅުވައިލުންތަކެއް އެކުލެވިފައިވާތީ އެކަމުގެ ކަންބޮޑުވުން އިދިކޮޅު ކޯޅިޝަނުން ވެސް ކުރިން ވަނީ ފާޅުކޮށްފައެވެ.
