ޕީޖީއަށް ފޮނުވާ 65 އިންސައްތަ މައްސަލައަކީ މަސްތުވާތަކެއްޗާ ގުޅޭ މައްސަލަ
ޖިނާއީ ދައުވާކުރަން ފޮނުވާ މައްސަލަތަކުގެ ތެރެއިން 65 އިންސައްތަ މައްސަލައަކީ މަސްތުވާތަކެއްޗާ ގުޅޭ މައްސަލަތައް ކަމަށް ޕްރޮސެކިއުޓާ ޖެނެރަލް (ޕީޖީ) ހުސެއިން ޝަމީމް ރޭ ވިދާޅުވެއްޖެއެވެ.
އިއްޔެ އަކީ މަސްތުވާތަކެއްޗާ ދެކޮޅަށް މަސައްކަތް ކުރާ ދުވަހަށް ވާތީ، ނޭޝަނަލް ބިއުރޯ އޮފް ސްޓެޓިކްޓިކްސްއިން އާންމު ކުރި މައުލޫމާތުތަކާ ގުޅިގެން ޕީޖީ ޝަމީމް ވިދާޅުވީ އެ އޮފީހަށް ހުށަހަޅާ މައްސަލަތަކުގެ ބޮޑު ބަޔަކީ މަސްތުވާތަކެއްޗާ ގުޅުންހުރި މައްސަލަތައް ކަމަށެވެ.
ފުލުހުން ހިއްސާކުރި މައުލޫމާތުތަކާ ހަވާލާދީ، ސްޓެޓިސްޓިކްސް ބިއުރޯއިން ބުނީ ޑްރަގާ ގުޅޭގޮތުން ހުށަހެޅި މައްސަލަތަކުގެ 46 އިންސައްތައަކީ މީހުންގެ އަތުން މަސްތުވާތަކެތި ފެނިގެން ދައުވާކުރަން ފޮނުވާފައިވާ މައްސަލަތައް ކަމަށެވެ. އަދި އެފަދަ ބާވަތްތަކުން ވިޔަފާރިކޮށްގެން 26 އިންސައްތަ މައްސަލަ، ބޭނުންކޮށްގެން 14 އިންސައްތަ މައްސަލަ މަސްތުވާތަކެތި އެތެރެކޮށްގެން 10 ޕަސެންޓް މައްސަލަ އަދި އެހެނިހެން ދައުވާކުރަން ހަތަރު ޕަސެންޓް މައްސަލަ ފޮނުވި ކަމަށެވެ.
ފުލުހުންނަށް މިދިޔަ އަހަރު މަސްތުވާތަކެއްޗާ ގުޅޭ 1،425 މައްސަލަ ރިޕޯޓުކުރިއެވެ. އެތަނުން 1،219 މީހުން ހައްޔަރުކޮށް ތަހުގީގު ކުރިއަށްގެންގޮސްފައިވެއެވެ. އޭގެ ތެރެއިން 98 ޕަސެންޓަކީ ފިރިހެނުންނެވެ.
އެ މައްސަލަތަކުގައި ހައްޔަރުކުރި މީހުންގެ ތެރެއިން ދެ އިންސައްތައަކީ 18 އަހަރުން ދަށުގެ ކުދިންނެވެ. އަދި 18-34 އަހަރާ ދެމެދުގެ 70 އިންސައްތަ އަދި 35 އަހަރުން މަތީގެ 28 އިންސައްތަ މީހުން ވެއެވެ.
ސްޓެޓިކްސް ބިއުރޯގެ ތަފާސް ހިސާބުތަކަށް ބަލާއިރު މަސްތުވާތަކެއްޗާ ގުޅޭ ފާއިތުވި 12،000 އަށް ވުރެ ގިނަ މައްސަލަ ފާއިތުވި 5 އަހަރު ދުވަހުގެ ތެރޭގައި ރިޕޯޓުކުރިއެވެ. އަދި މިދިޔަ އަހަރު އެކަނި ވެސް 2،850 މައްސަލަ ރިިޕޯޓުކުރިއެވެ.
Ads by STO
