ކުށުގެ ޚަބަރުތައް ސެންޝޭޝަނަލް ކުރުމަކީ ނޫސްވެރިކަމުގެ ބައެއް: ޕީޖީ ޝަމީމް
ކުށުގެ މައްސަލަތައް ސެންސޭޝަނަލައިޒް ކޮށްގެން ތަފާތު ގޮތްގޮތަށް ގެނެސްދިނުމަކީ ނޫސްވެރިކަމުގެ ވަރަށް ހާއްސަ ސިފައެއް ކަމަށާއި އެހެން ނަމަވެސް ކުޑަކުދިންގެ މައްސަލަތަކުގައި ކުދިންގެ މައުލޫމާތު އާއްމުކުރެވޭނީ އެކުއްޖާގެ ކަރާމާތަށް އުނިކަން ނާންނާނެ މިންވަރަށްކަމަށް ޕްރޮސެކިއުޓަރ ޖެނެރަލް ހުސެއިން ޝަމީމް ވިދާޅުވެއްޖެއެވެ.
ރަހީނުކޮށް މަރައިލައި، އެއްލައިލައިފައި އޮއްވާ މިދިޔަ ހަފްތާ ފެނުނު އުމުރުން 13 އަހަރުގެ ކުއްޖާގެ މައްސަލައިގައި ހަބަރުތައް ގެނެސްދިން ގޮތުން ބައެއް މީޑިޔާތަކާ މެދު ފިޔަވަޅު އަޅައިފައިވާ މައްސަލައާ ބެހޭ ގޮތުން އަމިއްލަ ބްލޮގްގައި ޝާއިއު ކުރެއްވި ލިޔުމެއްގައި ޝަމީމް ވިދާޅުވީ ކުށުގެ މައްސަލަތައް ސެންސޭޝަނަލައިޒް ކޮށްގެން ތަފާތު ގޮތްގޮތައް ގެނެސްދިނުމަކީ ނޫސްވެރިކަމުގެ ވަރަށް ހާއްސަ ސިފައެއް ކަމަށާއި އެހެން ނަމަވެސް ކުޑަކުދިންގެ އަދުލުގެ ނިޒާމާ ގުޅޭ ގޮތުން ދެ ގާނޫނެއް ފާސްކޮށްފައިވާކަމަށެވެ.
ޝަމީމް ވިދާޅުވީ އެ ގާނޫނުތަކުގައި ވަކި ފަރާތަކަށް ނުޖެހުމާ، ކުއްޖާގެ މަސްލަހަތު އިސްކުރުމަށް ބާރު އަޅައިފައިވާ ކަމަށާއި 13 އަހަރުގެ ކުއްޖާގެ މައުލޫމާތު ހާމަކުރުމާ ބެހޭ ގޮތުން ޚިޔާލު ތަފާތުވުމެއް އެބައޮތް ކަމަށެވެ. މިގޮތުން އެކަމުގައި ޤާނޫނު އޮތް ގޮތް ވަރަށް ސާފު ކަމަށާއި ކުއްޖާގެ މައުލޫމާތު ހާމަކުރަން ވާނީ ވަކި ވަރަކަށްކަމަށް ޝަމީމް ވިދާޅުވިއެވެ.
އެގާނޫނުތަކާ ބެހޭގޮތުން އިތުރަށް ވާހަކަ ދައްކަވަމުން ޝަމީމް ވިދާޅުވީ މައުލޫމާތު އާއްމު ކުރަން ވާނީ އެކުއްޖާގެ ކަރާމާތަށް އުނިކަން ނާންނާނެ މިންވަރަށް ކަމަށާއި މިކަމުގައި މުހިންމީ ނޫސްތަކަށް އަދަބުދިނުމެއް ނޫން ކަމަށާއި ހޭލުންތެރިކަން އިތުރުވެ، މިބާވަތުގެ ކަންކަން ތަކުރާރު ނުވުން ކަމަށް ޝަމީމް ވިދާޅުވިއެވެ.
ރަހީނުކޮށް މަރައިލައި ، އެއްލައިލައިފައި އޮއްވާ ފެނުނު ކުޑަކުއްޖާގެ މައްސަލަ ނޫސްތަކުން ގެނެސް ދިން ގޮތުން ބައެއް މީޑިޔާތައް ޖޫރިމަނާކޮށް އަދި ބައެއް މީޑިޔާތަކަށް ނަސޭހަތް ދީފައިވެއެވެ.
Ads by STO
