އެންމެ ގިނައިން ހުށަހެޅެނީ ގައިދީންނާ ގުޅުން ހުރި މައްސަލަތައް: އެޗްއާރުސީއެމް
އެޗްއާރްސީއެމްއަށް އެންމެ ގިނައިން ހުށަހެޅެނީ ގައިދީންނާ ގުޅޭ މައްސަލަތައް ކަމަށާއި މިގޮތުން މިދިޔަ އަހަރު އެކަނިވެސް ގައިދީންނާ ގުޅުން ހުރި 60 މައްސަލައެއް ހުށަހެޅިފައިވާ ކަަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރސީއެމް)އިން ވިދާޅުވެއްޖެއެވެ.
އެޗްއާރުސީއެމްއިން މިރޭ ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަފުޅު ދައްކަވަމުން އެކޮމިޝަންގެ މެންބަރު މަރިޔަމް މުނާ ވިދާޅުވީ، އެޗްއާރސީއެމްއިން މިހާރު ވެސް 633 މައްސަލައެއް ބަލަމުންދާ ކަމަށާއި މީގެ ތެރެއިން ގިނައީ ޖަލުތަކުގެ ޤައިދީންނާ ގުޅުން ހުރި މައްސަލަތައް ކަމަށެވެ.
"އެންމެ ގިނައިން މި އަންނަނީ ޖަލުގެ ދާއިރާގެ މައްސަލަތައް. އެއީ އިންމޭޓްސް (ގައިދީންނަށް) ލިބިދެން ޖެހޭ ހައްޤުތަކާއި އިނާޔަތްތައް ނުލިބުމުގެ މައްސަލަތަކާއި އަދި ލިބިދޭން ޖެހޭ އެކިއެކި މެޑިކަލް ކަންތައްތައް ނުލިބުމުން" މުނާ ވިދާޅުވިއެވެ
މުނާ ވިދާޅުވީ އެކޮމިޝަނަށް ގައިދީންނާ ގުޅުން ހުރި 60 މައްސަލައެއް މިދިޔަ އަހަރު ހުށަހަޅައިފައިވާ ކަމަށާއި އަދި މިއަހަރު މިހާތަަނަށް 30 މައްސަލައެއް ހުށަހަޅައިފައިވާ ކަމަށެވެ.
މީގެ އިތުރުން ފުލުހުންގެ ފަރާތުން އެކި ފަރާތްތަކަށް ލިބިދެން ޖެހޭ ހައްޤުތައް، މިސާލަކަށް ލޯޔަރުންގެ ޚިދުމަތް ދިނުމާއި، ޖަލުތަކުގައި ބައްދަލުވުންތައް ބާއްވައި ނުދިނުން ފަދަ މައްސަލަތައް ގިނަކަން ފާހަގަ ކުރައްވާ މުނާ ވިދާޅުވީ މިހާރު ވެސް މިފަދަ 40 މައްސަލައެއް ބަލަމުން އަންނަ ކަމަށެވެ.
މުނާގެ ވާހަކަފުޅުގައި ވިދާޅުވީ ކޮވިޑް-19ގެ ސަބަބުން މި ދެ އަހަރަށް ބަލާއިރު، ބިދޭސީ މަސައްކަތްތެރިންގެ ހައްޤުތަކާއި ވަޒީފާ ގެއްލުމުގެ ސަބަބުން ލިބެން ޖެހޭ މައްސަލަތައް އިތުރުވެފައިވާ ކަމަށެވެ. މިގޮތުން ވަޒީފާއާ ގުޅޭ 38 މައްސަލަ މިހާރު ބަލަމުންދާކަމަށް ވިދާޅުވިއެވެ.
މީގެ އިތުރުން ސިއްހީ ދާއިރާގެ މައްސަލަތައް އިތުރުވިއިރު، ކޮވިޑް-19 އެކަށީގެންވާ ފަރުވާ ނުލިބޭތީއާއި އެކަށީގެންވާ އަވަސް މިނުގައި ފަރުވާ ނުލިބޭތީ މައްސަލަތައް ހުށަހަޅައިފައިވާ ކަމަށްވެސް މުނާ ވިދާޅުވިއެވެ.
އެ ކޮމިޝަނުން މިއަހަރުގެ ތެރޭގައި މިހާތަނަށް 129 މައްސަލައެއް ބަލައި މައްސަލައިގައި ގޮތް ނިންމައިފައިވާ ކަމަށްވެސް މުނާ ވަނީ ވިދާޅުވެފައެވެ. މީގެ ތެރެއިން ފަސް މައްސަލައެއް އެންޓި ޓޯޗާރ ޤާނޫންގެ ދަށުން ދައުވާކުރުމަށް ޕްރޮސެކިއުޓާ ޖެނެރަލްގެ އޮފީހަށް ފޮނުވާފައިވާ ކަމަށް ވެސް އޭނާ ފާހަގަ ކުރެއްވިއެވެ. އަދި އިންސާނީ ޙައްޤު ގެއްލިއްޖެ ކަމަށް 9 ވޭދަނައެއް ނިންމައިފައިވާކަން މުނާ ފާހަގަ ކުރެއްވިއެވެ.
