މައްސަލަތައް ލަސް ކުރާތީ ގާޒީ ފައްޔާޒަށް ފިޔަވަޅު އަޅައި ދިނުމަށް އެދިއްޖެ!
މައްސަލަތައް ލަސް ކުރާތީ ގާޒީ ފައްޔާޒު ޝާތިރުއާ މެދު ފިޔަވަޅު އަޅައި ދިނުމަށް “ދަ ލިޓިޖެންޓްސް”އިން އެދިލައްވައިފިއެވެ.
ޖުޑީޝަލް ސާވިސް ކޮމިޝަން (ޖޭއެސްސީ)ގެ ރައީސް ހިސާން ހުސެއިންއަށް އެޑްރެސްކޮށް ލިޓިޖެންސްގެ ވަކީލު އަހުމަދު ނާޒިމް އަބްދުއްސައްތާރު ސޮއިކުރައްވާ ފޮނުއްވި ސިޓީއެއްގައި ވިދާޅުވީ މޫވްއެންޕިކް ކުރެދިވަރު ރިސޯޓުގެ މައްސަލައާ ގުޅިގެން ރިޖްވުޑް ހޮޓެލްސް އެންޑް ސުއިޓްސްއާ ދެކޮޅަށް ދައުވާކޮށް މައްސަލަ ކޯޓުގައި ރަޖިސްޓްރީ ކޮށްފައި ވަނީ، 2019 ވަނަ އަހަރުގެ ޑިސެމްބަރު މަހުގެ 29 ވަނަ ދުވަހު ކަމަށާއި މި މައްސަލަ ބެލުމަށް ގާޒީ ފައްޔާޒްއާ ހަވާލު ކުރެވުނީ 2020 ވަނަ އަހަރުގެ މާރިޗު މަހުގައި ކަމަށެވެ.
އެއަށް ފަހު ދައުވާ ރައްދުވާ ފަރާތުން 23 ޑިސެމްބަރު 2020 ގައި އިޖުރާއީ ނުކުތާއެއް ހުށަހެޅުމުން އެކަމަށް ގޮތެއް ނިންމައިފައި ވަނީ އެ ނުކުތާ ހުށަހެޅިތާ ނުވަ މަސް ދުވަސް ފަހުން ކަމަށް ވެސް އެ ސިޓީގައި ވިދާޅުވެފައިވެއެވެ.
“ދަ ލިޓިޖެންޓްސް”ގެ ފަރާތުން ޖޭއެސްސީއަށް ފޮނުވާފައިވާ ސިޓީގައި ވިދާޅުވެފައި ވަނީ މައްސަލަ ބެލުން ލަސްވަނީ ކީއްވެތޯ ބަލައިދިނުމަށް އެދި ގާޒީ ފައްޔާޒުގެ ސެކްޝަނަށް ފޮނުވައިފައިވާ ސިޓީގެ ޖަވާބު ލިބުން ލަސްވާ ކަމަށާއި، 2020 ވަނަ އަހަރު ޑިސެމްބަރު މަހު ފޮނުވި ސިޓީއަށް އަދިވެސް ޖަވާބެއް ނުލިބޭ ކަމަށެވެ.
ވީމާ ގާޒީ ފަައްޔާޒުގެ ސެކްޝަނަށް ފޮނުވާ މައްސަލަތައް އާންމުގޮތެއްގައި ވެސް ބެލުން ލަސްވާ ކަމަށާއި ފޮނުވާ ސިޓީތަކަށް ޖަވާބު ދެއްވުން ވެސް ލަސްވުމާ ގުޅިގެން، ގާޒީ ފައްޔާޒުއާ މެދު ފިޔަވަޅު އަޅައިދިނުމަށް ލިޓިޖެންޓްސުން ވަނީ އެދިލައްވައިފައެވެ.
