ޑރ. އިޔާޒް ޤައުމީ ޔުނިވާސިޓީގެ ވަޒީފާއިން ވަކިކޮށްފި

ޤައުމީ ޔުނިވާސިޓީގެ އެސިސްޓަންޓް ޕްރޮފެސަރގެ މަގާމުގައި ހުންނެވި ރާއްޖޭގެ މަޝްހޫރު ދީނީ ޢިލްމުވެރިޔާ ޑރ. މުޙައްމަދު އިޔާޒް ޢަބްދުއްލަތީފު، އެ މަގާމުން ވަކިކޮށްފިއެވެ.

Ads by MWSC

"ދެން" އަށް އެނގިފައިވާ ގޮތުގައި ޑރ. އިޔާޒް ވަޒީފާއިން ވަކިކޮށްފައި ވަނީ މީގެ ކުޑަ އިރުކޮޅެއް ކުރިންނެވެ.

ޤައުމީ ޔުނިވާސިޓީގެ ވަޒީފާއިން ޑރ. އިޔާޒް މިއަދު ވަކިކޮށްފައި މިވަނީ، އެމަނިކުފާނަކީ އަންހެންކުދިން ޚިތާނު ކުރުމަށް ހިތްވަރުދޭ މީހެއްކަމަށް ބުނެ ގިނަ ފާޑުކިޔުންތަކެއް އަމާޒުވެފައިވާ ދުވަސްވަރެއްގައެވެ.

އެގޮތުން "ފީމޭލް ޖެނިޓަލް މިއުޓިލޭޝަން" (އެފްޖީއެމް)އަށް ހިތްވަރު ދިން ކަމަށް ބުނެ ޑރ. އިޔާޒާ ދެކޮޅަށް ރައްޔިތުންގެ މަޖިލީހަށް ވަނީ މައްސަލައެއް ވެސް ހުށަހަޅައިފައެވެ.

ފާޑުކިޔުންތަކާއި ތުހުމަތުތަކާ ގުޅިގެން މިދިޔަ ޖުލައި މަހުގެ 25 ވަނަ ދުވަހު ޑރ. އިޔާޒް ވަނީ ބަޔާނެއް ވެސް ނެރުއްވައިފައެވެ. އެބަޔާނުގައި އެމަނިކުފާނު ވިދާޅުވީ އަންހެންކުދިން ޚިތާނު ކުރަން ހިތްވަރު ދޭފަދަ ގޮތަކަށް އެއްވެސް އިރަކު ވާހަކަ ނުދައްކަވާ ކަމަށެވެ.

މިކަމާ ގުޅިގެން "ދެން"އިން ސުވާލު ކުރުމުން މީގެ ކުރިން ޑރ. އިޔާޒް ވިދާޅުވީ ކުރެއްވި ޓްވީޓަކާ ގުޅިގެން މަޖިލީހަށް މައްސަލައެއް ހުށަހަޅައިފައިވާ ކަމަށާއި އެމަނިކުފާނު ވަޒީފާއިން ވަކި ކުރަން އުޅޭކަމުގެ ޕްރެޝަރުތަކެއް ވެސް އައިސްފައިވާ ކަމަށެވެ.

"އަންހެންކުދިން ޚިތާނު ކުރުމާ ގުޅޭގޮތުން އިސްލާމިކް ކިޔުއޭއިން ކޮށްފަ އޮތް ދިރާސާއެއްގެ ޓްވީޓެއް އަޅުގަނޑު ކުރީ. އޭގަ އަޅުގަނޑު އެއްވެސް ވަރަކަށް އެކަން ޕްރޮމޯޓު ކުރާކަށް އަދި ނަފީ ކުރާކަށް ވެސް ނެތިން. އަޅުގަނޑު އެ ޓްވީޓު ކުރުމުގެ ހަމައެކަނި ބޭނުމަކީ އަންގައިލުން އެއީ ބަޔަކު މީހުން ކޮށްފައި އޮތް ދިރާސާއެއްކަން. އަޅުގަނޑު ބުނަން ބޭނުންވީ އެބޭފުޅުން ވެސް ނިކަން ދައްކަބަލާށޭ ދިރާސާއެއް، އެއީ ކުރަން ނުވާ ވަރު ކަމެއްކަން ދެއްކުމުގެ ގޮތުން." ޑރ. އިޔާޒް ވިދާޅުވިއެވެ.

ޑރ. އިޔާޒް އިތުރަށް ވިދާޅުވީ، އަންހެން ކުދިން ޚިތާނުކުރުން ޕްރޮމޯޓު ނުކުރައްވާ ކަމަށާއި އެކަން ކުރަން ވެސް ގޮވައިނުލައްވާ ކަމަށެވެ.