ނޫސްވެރިންނަށް ބިރުދެއްކުން ހުއްޓައިލާން އިދިކޮޅު ކޯލިޝަނުން ގޮވައިލައިފި
މިނިވަން ނޫސްވެރިކަމަށް ހުރަސް ނޭޅުމަށާއި، ވަކިވަކި ނޫސްވެރިންނަށް އަމާޒުކޮށް ބިރުދެއްކުން ހުއްޓައިލާން ސަރުކާރަށާއި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)އަށް އިދިކޮޅު ކޯލިޝަނުން ގޮވައިލައިފިއެވެ.
ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އިން މިއަދު ނެރުނު ނޫސް ބަޔާނެއްގައި ބުނެފައި ވަނީ، ދިޔަރެސް ނޫހުގެ ކޯފައުންޑަރ އަދި ޗީފް އެޑިޓަރ އަހުމަދު އަޒާންއަށް އަމާޒުކޮށް ބިރުދެއްކުމުގެ ގޮތުން، އެމްޑީޕީން ނެރެފައިވާ ބަޔާން އިދިކޮޅު ކޯލިޝަނުން ހަރުކަށި އިބާރާތުން ކުށްވެރި ކުރާ ކަމަށެވެ.
މީގެ އިތުރުން މީޑިއާއަކީ ޑިމޮކްރަސީގެ ހަތަރުވަނަ ބާރުކަން ފާހަގަކޮށް އިދިކޮޅުން މިއަދު ނެރުނު ބަޔާނުގައި ބުނެފައި ވަނީ، އެމްޑީޕީން އަޒާންއަށް އަމާޒުކޮށް ނެރުނު ބަޔާނަކީ، މިނިވަން ނޫސްވެރިކަމަށް ހުރަސް އެޅޭ ފަދަ އަދި ނޫސްވެރިންގެ ގަލަމުގެ މިނިވަންކަމަށް އަރައިގަނެވޭ ފަދަ އަމަލެއް ކަމުގައި ދެކޭ ކަމަށެވެ.
ހަމައެއާ އެކު، މީޑިއާގެ ފަރާތްތަކަށް މިނިވަންކަމާ އެކު، ހަރަކާތްތެރި ވެވޭނެ މާހައުލެއް ގާއިމް ކޮށްދިނުމަކީ، ކަމާ ބެހޭ މުއައްސަސާއިން ކުރަން ޖެހޭ ކަމަކަށް ވާއިރު، މީީޑިއާގައި މަސައްކަތް ކުރާ ފަރާތްތަކަށް ކުރިމަތިވާ މިފަދަ ބިރުދެއްކުމާއިި އިންޒާރުގެ އަމަލުތައް، ކަމާބެހޭ ފަރާތްތަކުން ބަލައި އިންޒާރު ލިބެމުންދާ ފަރާތްތަކަށް ރައްކާތެރި މާހައުލެއް ހޯދައިދިނުމަށް މީޑިއާތަކުގެ ބެލެނިވެރި ފަރާތްތަކަށް ގޮވައިލައި ކަމުގައި ވެސް އެ ބަޔާނުގައި ވެއެވެ.
މި ބަޔާނުގައި އިތުރަށް ބުނެފައި ވަނީ، ވަކި ފަރާތަކަށް ނުޖެހި މިނިވަން ނޫސްވެރިކަން ކުރެވޭނެ މަގު ފަހި ކޮށްދިނުމަށް ގޮވައިލާ ކަމަށާއި، މީޑިއާތަކުގެ ނޫސްވެރިން ލިޔާ ލިޔުންތަކާ ގުޅިގެން އެކަން ހުއްޓުވުމަށް ބޭރުގެ އެކި ފަރާތްތަކުން ސަރުކާރު މެދުވެރިކޮށް ފިއްތާ ފިއްތުންތަކުގެ ސަބަބުން، ސަރުކާރުގެ މަޖިލިސް މެމްބަރުންނާއި، ސަރުކާރުގެ މުވައްސަސާތަކުން ނޫސްވެރިންގެ އަނގަ ބަންދުކޮށް ނޫސްވެރިންނާ މެދު ފިޔަވަޅު އެޅުމަށް ކުރަމުންދާ މަސައްކަތްތަކަކީ ވަރަށް ދަށު ދަރަޖައިގެ އަމަލެއް ގޮތުގަައި ސިފަ ކުރާ ކަމަށެވެ.
