ދެ މަސް ދުވަހަށް ފަހު އައްޑޫގެ މިސްކިތްތައް ހުޅުވައިލައިފި
ދެ މަސް ދުވަހުގެ ދިގު މުއްދަތަކަށް ފަހު އައްޑޫ ސިޓީގެ މިސްކިތްތަކުގައި ނަމާދު ކުރަން ހުޅުވައިލައިފިއެވެ.
"ދެން" އަށް މައުލޫމާތު ދެއްވަމުން އައްޑޫ މޭޔަރު އަލީ ނިޒާރު ވިދާޅުވީ އައްޑޫ މޮނީޓަރިންގެ ހާލަތަށް ދިޔައީ 1 މެއި 2021 ގަައި ކަމަށާއި މޮނީޓަރިންގަށްލުމަށް ފަހު މިސްކިތްތަކުގައި ޖަމާއަތުގައި ނަމާދު ކުރުން ވެސް ހުއްޓައިލި ކަމަށެވެ.
"މިހާރު ހުޅުދޫ މީދޫގެ މޮނީޓަރިންގް އެއްކޮށް މިވަނީ އުވާލައިފަ. މަރަދޫ، މަރަދޫ ފޭދޫ އަދި ފޭދޫ މި ތިން ރަށުގެ ހާލަތު މިހާރު އިރާދަ ކުރެއްވީތީ ރަނގަޅު. އެ ތިން ރަށް މޮނީޓަރިންގައި އޮތަސް ޖަމާއަތުގައި ނަމާދު ކުރެވޭނެ ގޮތަށާއި ބޭރަށް ނިކުމެ ވެސް އުޅެވޭ ގޮތަށް އޮތީ" ނިޒާރު ވިދާޅުވިއެވެ.
މޭޔަރު އިތުރަށް ވިދާޅުވީ މިސްކިތްތައް ހުޅުވި ނަމަވެސް ގުޅިފައިވާ ރަށްތަކުގެ ކެފޭ ރެސްޓޯރަންޓުތަކުގެ ހިދުމަތް އަދި ނުހުޅުވާ ކަމަށެވެ. އެތަންތަނުގެ ހިދުމަތް ދޭން ފަށަން އަދި ދުވަސްކޮޅެއް ނަގާނެ ކަމަށާއި މި ހަފްތާ ތެރޭގައި އެކަށީގެންވާ ވަރަށް ސާމްޕަލް ނެގުމަށް ފަހު، ނަތީޖާއަށް ބަލައިފައި އެތަންތަން ހުޅުވަން ނިންމައިގެން ހުރި ކަމަށެވެ.
"ހިތަދޫގައި ވެސް މިހާރު ނަމާދު ކުރެވޭނެ މިސްކިތްތަކުގައި. އެހެންނަމަވެސް ނަމާދު ކުރެވޭނީ ޖަމާއަތުގައެއް ނޫން." އަލީ ނިޒާރު ވިދާޅުވިއެވެ.
ކޮވިޑް-19އާ ގުޅިގެން އައްޑޫސިޓީގައި އިއުލާނު ކޮށްފައިވާ ކާފިއު ގަޑިވެސް މިހާރު ވަނީ ކުރުކޮށްފައެވެ. އެގޮތުން މިހާރުގެ ކާފިއު ގަޑިއަކީ ރޭގަނޑު 9:00 އިން ފަތިހު 4:00 އަށެވެ.
