ވޯކްޝޮޕްތައް އިންޑަސްޓްރިއަލް ވިލެޖަށް ބަދަލުކުރާނީ ރައްޔިތުން ބޭނުންވާ ނަމަ: ޑރ. މުޢިއްޒު
މާލޭގެ އެކި ސަރަޙައްދުތަކުގައި ހުރި ސިނާއީ މަސައްކަތް ކުރާ ތަންތަން އިންޑަސްޓްރިއަލް ވިލެޖަށް ބަދަލުކުރާނީ ރައްޔިތުން އެކަން ކުރަން ބޭނުންވާ ނަމަ ކަމަަށް މާލޭ ސިޓީގެ މޭޔަރ ޑރ. މުޙައްމަދު މުޢިއްޒު ވިދާޅުވެއްޖެއެވެ.
މާލޭ ސިޓީ ކައުންސިލްގެ މަސައްކަތްތަކާގުޅޭ ގޮތުން މަޢުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި މޭޔަރ ޑރ. މުޙައްމަދު މުޢިއްޒު ވިދާޅުވީ، ވިސްނުމަކީ މިހާރު މާލޭތެރޭގައި ހުރި ގަރާޖްތަކާއި ގުދަންތަކާއި ވޯކްޝޮޕްތައް އިންޑަސްޓްރިއަލް ވިލެޖަށް ބަދަލުކުރުން ކަމަށެވެ.
މުޢިއްޒު ވިދާޅުވީ މާލޭގެ އެކި ސަރަޙައްދުތަކުގައި ހުރި ސިޏާޢީ މަސައްކަތް ކުރާ ތަންތަން އިންޑަސްޓްރިއަލް ވިލެޖް ސަރަޙައްދަށް ބަދަލުކުރުމަށް ރައްޔިތުންގެ ޚިޔާލާ ހޯދާނެ ކަމަށާއި ގޮތެއް ކަނޑައަޅާނީ ރައްޔިތުންގެ ޚިޔާލާ އެއްގޮތަށް ކަމަށެވެ.
"ވިސްނުމަކީ މިހާރު މާލޭތެރޭގައި ހުރި ގަރާޖްތަކާއި ގުދަންތަކާއި ވޯކްޝޮޕްތައް އިންޑަސްޓްރިއަލް ވިލެޖަށް ބަދަލުކުރުން. އެއީ ކުރިންސުރެ އެކަމަށް ޚާއްސަކުރެވިފައިވާ ތަނަކަށްވާތީ. ނަމަވެސް އެކަން ނިންމާނީ މާލޭގެ ރައްޔިތުން. އިންޑަސްޓްރިއަލް ވިލެޖާބެހޭ ބައި ސިޓީ ކައުންސިލުން މިހާރު ފަށާފައިވާ ލޭންޑް ޔޫސް ޕްރޮސެސްގެ ތެރެއިން ރައްޔިތުންގެ ޚިޔާލާއެއްގޮތަށް ކަނޑައަޅާނީ. ކޮންމެގޮތެއް ވިޔަސް އެތަންތަން ބަދަލުކުރަން ޖެހޭ މާލެތެރެއިން ބޭރަށް" މޭޔަރ ޑރ. މުޢިއްޒު ވިދާޅުވިއެވެ.
މީގެ އިތުރުން މުޢިއްޒު ވިދާޅުވީ، މާލޭގެ އެކި ސަރަޙައްދުތަކުގައި ހުރި އެކި ކަހަލަ ނުރައްކާތެރި ކެމިކަލް ގުދަންތަކާއި، ސިނާޢީ މަސައްކަތްކުރާ ތަންތަން އާއްމުން ދިރިއުޅޭ ސަރަޙައްދުން ދުރަށް ގެންދިއުމަކީ އެއީ ކޮންމެހެން ވެސް ކުރަންޖެހޭ ކަމެއް ކަމަަށެވެ.
ތީހަމަ މިހާރުވެސް ކުރަން ޖެހިފައިވާކަމެއް