ހިޔާ ފުލެޓް އެއްބަސްވުމުގައި ފަސޭހައިން ސޮއިކުރުމަށް ޕޯޓަލްގައި ރަޖިސްޓްރީވުމަށް އެދިއްޖެ

ހިޔާ މަޝްރޫއުގެ ދަށުން އެޅި ފްލެޓްތަކުގެ އެއްބަސްވުމުގަައި ސޮއި ކުރުމުގެ މަސައްކަތް ފަސޭހަކަމާ އެކު ކުރުމަށް "ހިޔާ 7000 ޕޯޓަލް"ގައި ޕާރސަނަލް އެކައުންޓު ހުޅުވުމަށް ހައުސިން ޑިވެލޮޕްމަންޓް ކޯޕަރޭޝަނުން ހިޔާ ފުލެޓު ލިބުނު ފަރާތްތަކުގެ ކިބައިން އެދިއްޖެއެވެ.

Ads by STELCO

އެޗްޑީސީން މިއަދު ނެރުނު ބަޔާނެއްގައި ވިދާޅުވީ ހިޔާ ފުލެޓު އެއްބަސްވުމުގައި ސޮއި ކުރުމުގައި ހިޔާ 7000 ޕޯޓަލްގެ ބޭނުން ކުރުމުން ފުލެޓު ލިބުނު ފަރާތްތަކަށް ލިޔެކިޔުންތައް ހުށައަޅަށް ފަސޭހަވާނެ ކަމަށާއި ކޮވިޑް19 ސަބަބުން ކުރިމަތިވާ ހުރަސްތަކާއެކު ވެސް ހުއްޓުމެއް ނެތި އެއްބަސްވުން ތަކުގައި ސޮއިކުރުން ކުރިއަށް ގެންދެވޭނެ ކަމަށެވެ.

އެޗްޑީސީގެ މި ބަޔާނުގައި ފުލެޓު ލިިބުނު ފަރާތްތަކުން އެއްބަސް ވުމުގައި ސޮއިކުރުމަށް ބޭނުންވާ ލިޔެކިޔުންތަކުގެ ތަފްސީލު ވަނީ ހިމަނައިފައެވެ. މީގެ އިތުރުން ފުލެޓު ލިބުނު ފަރާތުގެ ބަދަލުގައި ޒިންމާ އަދާކުރާނެ ފަރާތެއް ހަމަޖެއްސުމުގައި އަމަލު ކުރަންވީގޮތުގެ ތަފްސީލް ވެސް ވަނީ ބުނެދީފައެވެ. އަދި ހަމައެހެންމެ ހިޔާ މަޝްރޫއުގެ ދަށުން ފުލެޓް ލިބުނު ފަރާތްތަކުގެ މެދުގައި ފުލެޓް ބަދަލުކުރާނެ އުސޫލާއި އެއްވެސް ސަބަބަކާ ހުރެ ފުލެޓް އެއްބަަސް ވުމުގައި ސޮއިކުރަން ނާދެވޭ ފަރާތަކުން ބަދަލުގައި މީހަކު ފޮނުވާނަމަ އަމަލު ކުރަންވީގޮތުގެ ތަފްސީލްގެ އިތުރުން ފުލެޓްގެ ޑައުންޕޭމަންޓް ފައިސާ ދެއްކުމާއި ފުލެޓަށް ފައިސާ ދައްކާނެ މުއްދަތާ ބެހޭ ގޮތުގެ މައުލޫމާތު ވެސް އެޗްޑީސީން އާންމު ކުރައްވައިފައި ވެއެވެ.

ހިޔާ ފުލެޓް ލިބުނު ފަރާތްތަކުން ހިޔާ 7000 ޕޯޓަލްގައި ރަޖިސްޓްރީވުމަށް މިބަޔާނުގައި ވަނީ ތަކުރާރުކޮށް އެދިފައެވެ. އެހެން ނަމަވެސް އެއްބަސްވުމުގައި ސޮއި ކުރުމަށް ބޭނުންވާ ފޯމާއި ލިޔެކިޔުންތައް އޮންލައިންކޮށް ނޫނަސް ހުށައެޅޭކަމަށް އެ ކޯޕަރޭޝަނުން ބުނެއެވެ.

އޮންލައިން ޕޯޓަލް މެދުވެރިކޮށް ފޯމާއި ލިޔެކިންތައް ހުށައެޅުން އޮންނާނީ މި ޖުލައި މަހުގެ 5 ވަނަ ދުވަހުން ފެށިގެންނެވެ. އަދި ކޯޕަރޭޝަނަށް ލިޔެކިޔުންތައް ހުށައަޅަން ބޭނުންވާ ފަރާތްތަކަށް އެފުރުސަތު ވެސް ވަނީ ހުޅުވައިލައިފައެވެ.