"ރައީސް ޔާމީން ތާއީދު ކުރައްވާ ނިޒާމެއް ރައީސް ނަޝީދަކަށް އެނގިވަޑައެއް ނުގަންނަވާނެ"
އިދިކޮޅު ލީޑަރު ރައީސް ޔާމީންއާ ގުޅުވައިގެން ރައީސް ނަޝީދު މިރޭ ދެއްކެވި ބައެއް ވާހަކަތަކަށް އިދިކޮޅުގެ އެކްޓިން ލީޑަރު ޢަބްދުއްރަޙީމް ޢަބްދުﷲ (އަދުރޭ) ރައްދު ދެއްވައިފިއެވެ.
އާސްކް ސްޕީކަރގެ ތިންވަނަ ޕްރޮގްރާމްގައި ރައީސް ނަޝީދު މިރޭ ވަނީ ވަރަށް ގިނަ ބައެއްގެ ސުވާލުތަކަށް ޖަވާބު ދެއްވައިފައެވެ. އެގޮތުން މެއި ހައެއްގައި އެ މަނިކުފާނަށް ކުރިމަތިވި ނިރުބަވެރި ހަމަލައާއި އެ ހަމަލާ ދިނުމުގެ ފަހަތުގައި ތިބީ ކޮންބައެއް ކަމާއި އަދި އެ ހަމަލާގެ ތަހުގީގާ ގުޅޭ ބައެއް މައުލޫމާތުތައް އެމަނިކުފާނު ވަނީ އާންމުންނާ ހިއްސާ ކުރައްވައިފައެވެ. މީގެ އިތުރުން 2023ވަނަ އަހަރު އެމްޑީޕީގެ ރިޔާސީ ކެނޑިޑޭޓަކަށް ވެ ވަޑައިގަންނަވާނީ ރައީސް ނަޝީދުކަން ފާހަގަ ކުރައްވައި އެ މަނިކުފާނު ވަނީ ބަރުލަމާނީ ނިޒާމަށް ކުރައްވާ ތާޢީދު މިރޭ ވެސް ތަކުރާރު ކުރައްވައިފައެވެ.
މި ވަގުތު އިނގެރޭސި ވިލާތުގައި ހުންނެވި ރައީސް ނަޝީދު މިކަމާ ގުޅުވައިގެން ވިދާޅުވީ އެމްޑީޕީން ވެސް އަދި ރައީސް ޔާމީނާއި އިދިކޮޅު ޕީޕީއެމުން ވެސް ބަރުލަމާނީ ނިޒާމަށް ތާއީދު ކުރައްވާނެ ކަމަށާއި 2023ގެ އިންތިޚާބުގައި ރައީސް ޔާމީނަށް ވެސް ވާދަ ކުރެއްވެން ވާނެ ކަމަށެވެ.
މި ވާހަކަތަކާ ގުޅިގެން އިދިކޮޅު ހިންގުމާ ހަވާލުވެ ހުންނެވި ، ޕީއެންސީގެ ރައީސް ޢަބްދުއްރަޙީމް ވިދާޅުވީ ރައީސް ޔާމީން ތާއީދު ކުރައްވާނީ ރައްޔިތުންގެ ނިންމެވުމަށް ކަމަށާއި ރައްޔިތުން ވަނީ ވެރިކަމުގެ ނިޒާމަކީ ރިޔާސީ ނިޒާމުކަމަށް ނިންމައިފައި ކަމަށެވެ.
"ރައީސް ޔާމީން ތާއީދު ކުރައްވާ ނިޒާމެއް ރައީސް ނަޝީދަކަށް އެނގިވަޑައެއް ނުގަންނަވާނެ ، ރިޔާސީ އިންތިޚާބުގައި ރައީސް ޔާމީނަށް ވާދަ ކުރެއްވެން ޖެހޭނެ، އެއީ ގައުމު އެދޭ ގޮތް" ޢަބްދުއްރަޙީމް ވިދާޅުވެފައި ވެއެވެ.
އާސްކް ސްޕީކަރގެ މިރޭގެ ޕްރޮގްރާމްގައި ސަރުކާރުގެ މަސައްކަތްތަކާ މެދު ހިތްހަމަ ނުޖެހޭކަން ފާޅު ކުރައްވައި ރައީސް ނަޝީދު ވިދާޅުވީ ވެރިކަމުގެ ނިޒާމު ބަދަލުވާން ޖެހޭ ކަމަށާއި ބަރުލަމާނީ ނިޒާމަކަށް ގައުމު ބަދަލު ކުރުމުގައި ރައީސް ޔާމީނާއި ޕީޕީއެމްގެ ބައިވެރިވުމަށް އެދިވަޑައިގަންނަވާ ކަމަށެވެ.
