މިއަދު ފޯނު ބޭނުން ކުރަން ފަށައިފިން، ލިބުނު 7862 މެސެޖު ކިޔައިފިން: ރައީސް ނަޝީދު
މެއި މަހުގެ ހަވަނަ ދުވަހުގެ ރޭ ބޮމެއް ގޮއްވައިލާ އަވަހާރަކޮށްލަން ދިން ނިރުބަވެރި ހަމަލާއަށް ފަހު މިއަދު ފޯނު ބޭނުންފުޅުކުރައްވަން ފަށައިފި ކަމަށް މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.
އެ މަނިކުފާނު ދެންމެ ކުރެއްވި ޓްވީޓެއްގައި ވިދާޅުވީ މިވަގުތު ޖަވާބު ނުދެވި ހުރީ 7862 މެސެޖު ކަމަށެވެ. އަދި ހުރިހާ މެސެޖެއް ވެސް ކިޔައިފައިވާނެ ކަމަށް ވިދާޅުވެ ރައީސް ނަޝީދު ވަނީ މެސެޖު ކުރެއްވި ބޭފުޅުންނަށް ޝުކުރު އަދާ ކުރައްވައިފައެވެ.
“ސަލާމް. އަޅުގަނޑު މިއަދު ފޯނު ބޭނުން ކުރަން ފަށައިފިން. މިވަގުތު އަޅުގަނޑަށް ޖަވާބު ނުދެވި 7862 މެސެޖް އެބަވޭ. އެންމެ ބޭފުޅުންގެ ޓެކްސްޓަށް ވަރަށް ބޮޑަށް ޝުކުރިއްޔާ. އަޅުގަނޑު ހުރިހާ ޓެކްސްޓް ކިޔައިފިން” ނަޝީދު ވިދާޅުވިއެވެ.
މެއި މަހުގެ 6 ވަނަ ދުވަހު ރައީސް ނަޝީދަށް އަމާޒުކޮށް ދިން ހަމަލާގެ ސަބަބުން ލިބުނު އަނިޔާތަކަށް އެ މަނިކުފާނު ޖަރުމަނުގައި ފަރުވާ ހޯއްދެވިއެވެ. ޖަރުމަނުގައި ރައީސް ނަޝީދުގެ ފުރަތަމަ ސަރޖަރީ ކުރެއްވީ މިމަހުގެ 11 ވަނަ ދުވަހުއެވެ. އެއަށް ފަހު މި މަހުގެ 17 ވަނަ ދުވަހު ދެވަނަ ސަރޖަރީއެއް ކުރެއްވިއެވެ.
އިތުރު ފަރުވާއަށް ވަޑައިގެންނެވި ޖަރުމަންވިލާތުގެ ބަރލިން ބުންޑެސްވެއަރ ހޮސްޕިޓަލްގެ ޕްރޮފެސަރ ޑރ.ސީ.ވިލީއާއި ޑޮކްޓަރުންނާއި އެހީތެރިންގެ އެމަނިކުފާނަށް ފަރުވާ ދެއްވައިފައި ވެއެވެ. ރައީސް ނަޝީދު މިހާރު ހުންނެވީ އިނގިރޭސިވިލާތުގައެވެ. އެއީ ޖަރުމަނުވިލާތުގެ ޑޮކްޓަރުން ރިފަރ ކުރައްވައިގެން އިތުރު ފަރުވާ ހޯއްދެވުމަށެވެ.
ރައީސް ނަޝީދަށް އަމާޒުކޮށް ދިން ނިރުބަވެރި ހަމަލާއާ ގުޅިގެން ފުލުހުން ހައްޔަރު ކޮށްފައިވަނީ މުޖާޒް އަހުމަދު، ތަހުމީން އަހުމަދު، އަދުހަމް އަހުމަދު ރަޝީދުގެ އިތުރުން އަހުމަދު ފާތިހު އަދި ނ. މަނަދޫ ނޫރީގެ އަލީ ހައިޝަމް (27އ.)އެވެ.
ތީ މި ގައުމުން ލިބޭނެ ޢަދަދު ތި ލިބުނީ..