ނަފްރަތުގެ ބިލާ ދެކޮޅަށް ރައްޔިތުންގެ މަޖިލީހުގެ 10 މެމްބަރެއް ނުކުމެއްޖެ

އާންމުތަނެއްގައި މުސްލިމަކު ކާފަރެއްގެ ގޮތުގައި ސިފަ ކުރުމާއި، ސިފަކުރުމުގައި ބައިވެރި ވުމާއި މުސްލިމަކަށް ކާފަރެއްކަމުގެ ތުހުމަތު ކުުރުމަކީ ކުށަކަށް ހެދުމަށް ގާނޫނުލްއުގޫބާތަށް އިސްލާހު ގެނައުމަށް ރައްޔިތުންގެ މަޖިލީހަށް ތުޅާދޫ ދާއިރާގެ މެމްބަރު ހިސާން ހުސެއިން ހުށައެޅުއްވި ބިލާ ދެކޮޅަށް ރައްޔިތުންގެ މަޖިލީހުގެ 10 މެންބަރަކު ބަޔާން ނެރުއްވައި ފާޅުގައި ދެކޮޅު ހައްދަވަައިފިއެވެ.

Ads by STELCO

މި ބަޔާނުގައި ސޮއި ކުރައްވައިފައި ވަނީ، ދަނގެތީ ދާއިރާގެ މެމްބަރު ކާނަލް ރިޓަޔާޑް މުހައްމަދު ނާޒިމްއާއި، ތިމަރަފުށީ ދާއިރާގެ މެމްބަރު އަބްދުﷲ ރިޔާޒާއި، ވިލިނގިލި ދާއިރާގެ މެމްބަރު ސައުދު ހުސައިންއާއި، ކެންދޫ ދާއިރާގެ މެމްބަރު އަލީ ހުސައިންއާއި، ވިލިމާލެ ދާއިރާގެ މެމްބަރު އަހްމަދު އުޝާމްގެ އިތުރުން، ތުލުސްދޫ ދާއިރާގެ މެމްބަރު އިބްރާހިިމް ނަސީމްއާއި، ނިލަންދޫ ދާއިރާގެ މެމްބަރު އަބްދުލް މުހްސިން ހަމީދާއި، އިސްދޫ ދާއިރާގެ މެމްބަރު އަލީ ހަމީދުއާއި، ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުﷲ އަދި ކުޑަހުވަދޫ ދާއިރާގެ މެމްބަރު އަހްމަދު އާމިރެވެ.

މަޖިލީހުގެ މި 10 މެމްބަރުން ސޮއި ކުރައްވާ ނެރުނު ބަޔާނުގައި ، ގާނޫނުލް އުގޫބާތަށް ގެންނަން އުޅޭ އިސްލާހަކީ ގިނަ ރައްޔިތުންތަކެއްގެ ކަންބޮޑުވުން އޮތް އިސްލާހެއްކަން ފާހަގަ ކުރައްވައި ނަފުރަތުގެ އަމަލުތަކުގެ ސަބަބުން ދިވެހި އެތައް ރައްޔިތުންނަކަށް ބޮޑެތި އަނިޔާތަކާއި ގެއްލުންތަކެއް ލިބިފައިވާކަމީ ދެބަސްވެވެން ނެތް ހަގީގަތެއް ކަމަށް ވެސް ވަނީ ފާހަގަކޮށްފައެވެ.

މީގެ އިތުރުން ވެސް މި ބަޔާނުގައި މިހާރު ހުށައަޅައިފައިވާ "ނަފްރަތުގެ ބިލަކީ" ނަފްރަތުގެ އަމަލުތައް ހުއްޓުވޭނެ ހައްލެއް ނޫންކަމަށް ވެސް ވަނީ ބުނެފައެވެ.

"ނަފުރަތުގެ އަމަލުތަކުގެ ސަބަބުން ދިވެހި އެތައް ރައްޔިތުންނަކަށް ބޮޑެތި އަނިޔާތަކާއި ގެއްލުންތަކެއް ލިބިފައިވާކަމީ ދެބަސްވެވެން ނެތް ހަގީގަތެއްކަމަށް ވީހިނދު، މި މައްސަލައަކީ ޙައްލެއް ހޯދަން ޖެހޭ މައްސަލައެކެވެ. އެހެން ނަމަވެސް، ދިވެހިރާއްޖޭގެ ޤާނޫނުލް އުގޫބާތަށް 124 ވަނަ މާއްދާގެ ގޮތުގައި އިތުރުކުރުމަށް މިހާރު ހުށަހަޅައިފައިވާ އިސްލާހަކީ މިކަމުގެ ޙައްލުކަމަކަށް ނުވަތަ މިފަދަ ގާނޫނެއް ފާސްކުރުމުގެ މަޤްސަދު ހާސިލް ވާނެ ބިލެއްކަމަކަށް އަޅުގަނޑުމެންނަށް ގަބޫލެއް ނުކުރެވެއެވެ." 10 މެމްބަރުން ސޮއިކުރައްވާ ނެރުނު ބަޔާނުގައި ވިދާޅުވެފައިވެއެވެ.

ރައްޔިތުންގެ މަޖިލީހުގެ ޖުޑީޝަރީ ކޮމިޓީން މިބިލަށް ގެނެސްފައިވާ އިސްލާހްތަކަށް ބަލާއިރު، މިއީ ނަފްރަތުގެ އަމަލުތައް ހުއްޓުވުމަށް އޮތް ޙައްލަކަށްވުމުގެ ބަދަލުގައި މިބިލުގެ ސަބަބުން މި މައްސަލަ އިތުރަށް ގޯސްވެގެންދާނެ ކަމަށް ގަބޫލުކުރައްވާ ކަމަށާއި މި ބިލުގެ ސަބަބުން ދިވެހިންގެ މެދުގައި އޮތް ދީނީ އެއްބައިވަންތަކަން ގެއްލިގޮސް، ރައްޔިތުންގެ މެދުގައި ހަމަނުޖެހުން އިތުރުވުމުގެ ފުރުސަތު އޮތް ކަމަށް ގަބޫލު ކުރައްވާކަމަށް ވެސް މި ބަޔާނުގައި ވަނީ ވިދާޅުވެފައެވެ.

"އިސްލާމްދީނުގެ އަސްލުތަކާއި ރައްޔިތުންގެ އަސާސީ ޙައްގުތަކާ ގުޅޭ މިފަދަ ބިލުތަކަކީ ވީހާވެސް ބޮޑަށް ރައްޔިތުންނާއި ދީނީ އިލްމުވެރިންނާ އަދި ކަމާގުޅުން ހުރި އެހެނިހެން ފަރާތްތަކުގެ މަޝްވަރާއާއި ލަފަޔާ އެކު ޑްރާފްޓް ކުރެވި،ފާސްކުރަން ޖެހޭ ބިލުތަކެކެވެ. އެހެން ނަމަވެސް މިފަދަ މުހިންމު ބިލެއް އެކުލަވައިލެވުނު އިރު އަދި ރައްޔިތުންގެ މަޖިލީހުގެ ކަމާގުޅުންހުރި ކޮމިޓީން މި ބިލުގެ މަސައްކަތް ކުރެވުނުއިރު، ކަމާ ގުޅުން ހުރި ގިނަ ފަރާތްތަކުގެ މަޝްވަރާ އެކަށީގެންވާ މިންވަރަށް ހޯދައިފައި ނުވާކަން ފާހަގަކުރަމެވެ." މިބަޔާނުގައި އިތުރަށް ވިދާޅުވެފައިވެއެވެ.

މި ބިލުގެ މަސައްކަތް ރައްޔިތުންގެ މަޖިލީހުގެ ކަމާގުޅުން ހުރި ކޮމިޓީން ކުރަމުން ދިޔައިރު، މި ބިލަށް މިނިސްޓްރީ އޮފް އިސްލާމިކް އެފެއާޒްއާއި ހިއުމަން ރައިޓްސް ކޮމިޝަން އޮފް ދަ މޯލްޑިވްސް ފަދަ އިދާރާތަކުން ހުށަހަޅާފައިވާ ގިނަ އިސްލާހްތަކަށް ރިއާޔަތް ނުކޮށް ކޮމިޓީން ނަފްރަތުގެ ބިލު ފާސްކޮށްފައިވާ ކަމަށާއި އެއީ ކަންބޮޑުވާކަމެއް ކަމަށް މެމްބަރުން ވަނީ ފާހަގަކުރައްވައިފައެވެ.

އެހެންކަމުން، ނަފްރަތުގެ އަމަލުތައް ހުއްޓުވައި، މި މައްސަލައާމެދު ރައްޔިތުންގެ މެދުގައި އުފެދިފައިވާ ހިޔާލު ތަފާތުވުންތަކަށް އެކަށީގެންވާ ޙައްލުތަކެއް ހޯދުމަށްޓަކައި މަޝްވަރާގެ ރިވެތި އުސޫލުގެ މަތިން ވީހާވެސް ފުޅާ ދާއިރާއެއްގައި މަޝްވަރާކޮށްގެން ގާނޫނުތައް އިސްލާހުކުރުމަކީ މުހިންމުކަމެއް ކަމަށް ދެކޭ ކަމަށާއި މިހާރު ހުށައަޅާފަައިވާ އިސްލާހު ހުށަހަޅައިފައިވާ ގޮތަށް ފާސްކުރުމަކީ ދިވެހި ރައްޔިތުންގެ މެދުގައި އޮތް ދީނީ އެއްބައިވަންތަކަން ގެއްލި، ދިވެހި ގައުމު އިތުރު ހަމަނުޖެހުންތަކެއްގެ ތެރެއަށް ދިއުމުގެ ފުރުސަތު އޮތްކަމެއް ކަމަށް ގަބޫލުކުރެވޭ ކަމަށް މި މެމްބަރުން ވަނީ ވިދާޅުވެފައެވެ. އެހެންކަމުން މިހާރު ހުށަހަޅައިފައިވާ ގޮތަށް މި ބިލު ފާސްކުރުމަށް ތާއީދު ނުކުރާކަމަށް އެ މެމްބަރުން އެދިވަޑައިގެންފައި ވެއެވެ.