އިސްލާމީ ކަންތައްތަކާބެހޭ މުސްތަޤިއްލު މަޖުލީހެއް ޤާއިމުކުރުމަކީ މުހިންމުކަމެއް: ޑރ. ޝަހީމް
ރާއްޖޭގެ އިސްލާމީ ކަންކަން ހިންގުމުގެ އިދާރީ އެންމެހައި ކަންކަމެއް އިޚުތިޞާޞްގެ ތެރޭގައި ހިމަނައި ގާނޫނެއްގެ ދަށުން މިނިވަން މުސްތަޤިއްލު މަޖިލީހެއް ޤާއިމުކުރުމަކީ، މުހިންމުކަމެއް ކަމުގައި ދެކޭކަމަށް ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ޑރ. ޝަހީމް މިއަދު ކުރެއްވި ޓްވީޓެއްގައި ވިދާޅުވީ ރާއްޖޭގައި "އިސްލާމީކަންތައްތަކާ ބެހޭ އެންމެ މަތީ މަޖިލީސް" އެއް ގާނޫނެއްގެ ދަށުން ގާއިމުކުރުމަކީ ތަފާތު ނުފޫޒުތަކުން އިސްލާމީ ކަންކަން މިނިވަންވެ އެކަންކަން ހިންގުމަށް ލިބިދެވޭނެ ކަމެއްކަމަށެވެ.
"ރާއްޖޭގެ އިސްލާމީ ކަންކަން ހިންގުމުގެ އިދާރީ އެންމެހާ ކަންކަމެއް އެކައުންސިލްގެ އިޚުތިޞާޞްގެ ތެރޭގައި ހިމަނައި މިނިވަން މުސްތަޤިއްލު ތަނެއްގެ ގޮތުގައި ޤާނޫނެއްގެ ދަށުން،" އިސްލާމީ ކަންތައްތަކާ ބެހޭ އެންމެ މަތީ މަޖުލިސް" ރާއްޖޭގައި ޤާއިމުކުރުމަކީ، މުހިންމުކަމެއްގެ ގޮތުގައި ދެކެން." ޑރ. ޝަހީމް ކުރެއްވި ޓްވީޓެއްގައި ވިދާޅުވިއެވެ.
މީގެ އިތުރުން ޑރ. ޝަހީމް ވިދާޅުވީ އިސްލާމީ ކަންތައްތަކާ ބެހޭ އެންމެ މަތީ މަޖުލިސް ވުޒާރާއެއްގެ ގޮތުގަައި ހިންގަން ފެށުމުން ދީނީ ކަންކަމުގައި މަަޞްލަޙަތު ދެމެހެއްޓި ޤައުމީ ދީނީ ކަންކަން ދެމެހެއްޓެނިވި ގޮތެއްގައި ޤާއިމުކުރެވޭނެ ކަމަށެވެ.
"ވުޒާރާއެއްގެ ބަދަލުގަައި މިގޮތަށް ކައުންސިލެއް ޤާއިމުކުރެވިއްޖެ ނަމަ ތަފާތު ނުފޫޒުތަކުން އިސްލާމީ ކަންކަން މިނިވަންވެ، އެކަންކަމުގެ މަަޞްލަޙަތު ދެމެހެއްޓި މަސްރަޙަށް އަންނަ ސިޔާސީ ބަދަލުތަކުން އެކަންކަން ސަލާމަތްވެ ޤައުމީ ދީނީ ކަންކަން ދެމެހެއްޓެނިވި ގޮތެއްގައި ޤާއިމުކުރެވޭނެ." ޑރ. ޝަހީމް ވިދާޅުވިއެވެ.
އާންމުތަނެއްގައި މުސްލިމަކު ކާފަރެއްގެ ގޮތުގައި ސިފަ ކުރުމާއި، ސިފަކުރުމުގައި ބައިވެރި ވުމާއި މުސްލިމަކަށް ކާފަރެއްކަމުގެ ތުހުމަތު ކުުރުމަކީ ކުށަކަށް ހެދުމަށް ގާނޫނުލްއުގޫބާތަށް އިސްލާހު ގެނައުމަށް ރައްޔިތުންގެ މަޖިލީހަށް ތުޅާދޫ ދާއިރާގެ މެމްބަރު ހިސާން ހުށައެޅުއްވި ބިލުގެ ސަބަބުން ޚިޔާލު ތަފާތުވެ ދީނީ އިލްމުވެރިންގެ ފާޑުކިޔުން މިބިލަށް ވަރަށް ބޮޑަށް އަމާޒުވެފައިވާ މިދަނޑިވަޅުގައި ދީނީ ކަންކަން ނިންމުމަށް ދީނީ އިލްމުވެރިންގެ ބަސް އެހުމަށް ގިނަ ބަޔަކު ދަނީ ސަރުކާރަށާއި މަޖްލިސް މެމްބަރުންގެ އަރިހުން އެދެމުންނެވެ.
