ރައީސް ޞާލިޙަށް ދެ ދައުރު ދޭން އެމްޑީޕީއަށް މަޖުބޫރުވާނެ: ރީކޯ މޫސަ
ރައީސުލްޖުމްހޫރިއްޔާ އިބްރާޙީމް މުހައްމަދު ޞާލިޙަށް އިތުރު ދައުރަކަށް ކުރިމަތި ލެއްވެން ޖެހޭނެ ކަމަށާއި ކުރިއަށް އޮތް 2023ވަނަ އަހަރު އެމްޑީޕީން ޕްރެޒިޑެންޓިއަލް ޕްރައިމަރީއެއް ބާއްވައިފިނަމަ އެ ޕާޓީގެ ބަހާއި އަމަލާ ދިމާނުވާނެކަމަށް އެމްޑީޕީގެ ކުރީގެ ޗެއަރ ޕާސަން މޫސާ މަނިކު ވިދާޅުވެއްޖެއެވެ.
ރާއްޖެޓީވީގެ "ފަށާއިރު" ޕްރޮގްރާމްގައި ވާހަކަ ދައްކަވަމުން މޫސަ ވިދާޅުވީ ރައީސް ޞާލިހަށް އަދި އެއް ދައުރު ދެއްވުމަކީ އެމްޑީޕީއަށް މަޖުބޫރުވާނެކަމެއް ކަމަށާއި އެއީ 2013 ވަނަ އަހަރު ރައީސް މުހައްމަދު ނަޝީދު ރާއްޖޭގެ ވެރިކަމަށް ކުރިމަތިލެއްވިއިރު ، އެއް ދައުރު ވެރިކަން ކުރެއްވި ބޭފުޅަކަށް ދެ ވަނަ ދައުރެއް ދޭން ޕާޓީން ނިންމައިފައިވުމުން ކަމަށެވެ.
އެމްޑީޕީއާއި ސަރުކާރަށް ތާއީދު ކުރައްވާ ވާހަކަދައްކަވަމުން މޫސަ އިތުރަށް ވިދާޅުވީ އެމްޑީޕީގެ އާންމު މެމްބަރުންނަކީ ހިތްވަރުގަދަ ބައެއް ކަމަށާއި ޕާޓީ ދެބައިވެ ރޫޅިގެންދާން އެ މެމްބަރުން ތަން ނުދޭނެ ކަމަށެވެ. މީގެ އިތުރުން ދުނިޔެއަށް މިހާރު ކުރިމަތިވެފައިވާ ކޮވިޑްގެ މިހާލަތާ އެކު ވެސް ރާއްޖޭގެ އެކި ކަންކޮޅުތަކުގައި ތަރައްގީގެ މަޝްރޫއުތައް ނުހުއްޓި ކުރިއަށްދާ ކަމަށާއި ސަރުކާރުގެ ދުވެލި ލަސް ނޫންކަމަށް ވެސް މޫސަ ވިދާޅުވިއެވެ.
"އެމްޑީޕީގެ އާންމު މެމްބަރުންނަކީ ހިތްވަރުގަދަ ބައެއް ،ޕާޓީ ދެބައިވެ ރޫޅިގެންދާން އެ މެމްބަރުން ތަން ނުދޭނެ.. އެމްޑީޕީގެ އާންމު މެމްބަރުގެ ބޮޑު މެޖޯރިޓީއެއް ރައީސް ޞާލިހަށް ތާއީދު ކުރޭ. އެކަން އެގޮތަށް ހިފެހެއްޓިއްޖެނަމަ ޕާޓީ ދެބައި ވެގެން ނުދާނެ.. އެކަމަކު ރައީސް ނަޝީދަށް ތާއީދު ކުރައްވާ ފަރާތްތަކުގެ ތެރެއިން ކޮންމެ ގޮތެއްވިޔަސް ރައީސް ނަޝީދު ވެރިކަމަށް ގެންނަން ބޭނުންވާ ފަރާތްތަކުގެ ސަބަބުން ޕާޓީއަށް ގޮންޖެހުންތަކާ ކުރިމަތިވާނެ" މޫސަ ވިދާޅުވިއެވެ.
މި ހަފްތާގެ ތެރޭގައި ގެނެސްދިން"އާސްކް ސްޕީކާ" ޕްރޮގްރާމްގައި ވާހަކަ ދައްކަވަމުން ރައީސް ނަޝީދު ވިދާޅުވީ، 2023 އިންތިހާބުގައި އެމްޑީޕީން ވާދަ ކުރާނެ ކެނޑިޑޭޓަކު ކަނޑައެޅުމަށް ޕްރައިމަރީ އޮންނާނެ ކަމަށާއި އެ ޕްރައިމަރީގައި ވާދަ ކުރައްވާ ކާމިޔާބު ހޯއްދަވާނެ ކަމަށެވެ. އަދި އިދިކޮޅު ކޯލިޝަންގެ ލީޑަރު އަދި ކުރީގެ ރައީސް އަބްދުﷲ ޔާމީނަށް ރިޔާސީ އިންތިޚާބުގައި ވާދަކުރެއްވެން ވާނެ ކަމަށް ވެސް ރައީސް ނަޝީދު ވަނީ ވިދާޅުވިއެވެ.
Ads by STO
